Everton – Leeds 1-1

Mynd: Everton FC.

Everton tekur á móti Leeds í kvöld, á Hill Dickinson leikvanginu, en flautað verður til leiks kl. 20:00. Þeir eru þessa stundina í 16. sæti, aðeins 5 stigum frá fallsæti en okkar menn í 11. sæti. Þetta er lokaleikur 23. umferðar og ljóst er að Leeds mun ólíklega hoppa um einhver sæti með sigri, en vitað að Everton færi upp um þrjú (í 7. sæti) með sigri.

Þær slæmu fréttir bárust á dögunum að Jack Grealish væri frá út tímabilið, eftir að hafa brákað bein í fæti. Það er aldeilis skarð fyrir skildi, en sem betur fer eru afríkumeistarar okkar, Gana og Ndiay, komnir aftur og ættu að vera klárir í leikinn. Þetta er þriðji og þar með síðasti leikurinn sem Keane missir af vegna rauða spjaldsins sem hann hlaut á dögunum og jafnframt er ólíklegt að Coleman eða Branthwaite láti sjá sig. Spurning með Dewsbury-Hall og Alcaraz, held að sá fyrrnefndi hafi hafið æfingar aftur á grasi. Uppfært 19:05: Þeir reyndust svo allir byrja á bekknum, ótrúlegt en satt.

Skilst að hjá Leeds sé Daniel James frá vegna tognunar í læri og hinn sænski, Gabriel Gudmundsson, er tæpur. Þeir eru auk þess komnir með nýjan lánsmann, Facundo Buonanotte (frá Brighton), sem gæti fengið sinn fyrsta leik í kvöld.

Uppstillingin: Pickford, Mykolenko, Tarkowski (fyrirliði), O’Brien, Patterson, Gana, Garner, Ndiaye, Armstrong, McNeil, Barry.

Varamenn: Travers, Aznou, Branthwaite, Coleman, Alcaraz, Röhl, Dibling, Dewsbury-Hall, Beto.

Ekki mikið að frétta framan af. Leeds aðeins meira með boltann fyrstu 20 mínútur og líklegri til að skora án þess að ná að koma boltanum almennilega á markið.

En á 28. mínútu komust gestirnir svo yfir eftir spil upp hægri kantinn, sendingu fyrir sem Calvert-Lewin kixaði á, en boltinn endaði hjá James Justin utar í teig, og hann setti boltann framhjá Pickford. 0-1 staðan.

Viðvörunarbjöllurnar áfram að hringja eftir markið og Calvert-Lewin komst í dauðafæri á 34. mínútu, en setti boltann í stöngina, blessunarlega.

Þetta varð eiginlega vandræðalegra eftir því sem leið á fyrri hálfleik og Everton rétt náði skoti á mark undir lok fyrri hálfleiks. Það var eina tilraunin á mark í þeim hálfleik, frá Garner, en í hliðarnetið.

0-1 fyrir Leeds í hálfleik. Eitthvað þarf að lesa yfir hausamótunum á mönnum í hléinu.

Moyes gerði tvær breytingar í hálfleik, því Branthwaite og Dewsbury-Hall komu inn á fyrir McNeil og Armstrong. Betra að sjá til liðsins eftir það. Svolítill viðsnúningur þar sem Everton var betri aðilinn.

Á 58. mínútu komst Everton í skyndisókn þegar Gana vann boltann á miðsvæðinu og brunaði fram. Komust í þrír á þrjá og Gana gaf til hægri á Ndiaye sem sólai varnarmann og náði skoti en varnarmaður náði að blokkera. Hefði viljað sjá hvar það hefði endað.

Leeds komust í sókn hinum megin og náði skoti, en Pickford ekki í vandræðum með það.

Barry fékk stungu inn fyrir vörn Leeds á 63. mínútu og náði flottu skoti á mark, sem markvörður Leeds náði að verja með útréttri hendi. Sá bolti stefndi beinustu leið í hliðarnetið, en markvörður Leeds gerði mjög vel.

Dibling kom inn á fyrir Patterson á 71. mínútu og stuttu síðar fór að draga til tíðinda, því Barry náði að jafna á 75. mínútu og það var týpískt framherja potmark. Hann fékk sendingu frá hægri frá Gana og var einfaldlega sneggri en varnarmaður til að pota boltanum yfir markvörðinn og upp í þaknetið.

Leeds menn virkuðu shaky eftir markið og voru næstum búnir að lenda undir strax á eftir þegar boltinn small í slánni eftir þrumuskot frá Gana utan teigs.

Beto inn á fyrir Barry á 89. mínútu. En niðurstaðan jafntefli í kvöld.

Einkunnir Sky Sports: Pickford (6); Patterson (6), Tarkowski (6), O’Brien (6), Mykolenko (6); Gueye (7), Garner (7); McNeil (5), Armstrong (5), Ndiaye (6); Barry (8). Varamenn: Branthwaite (7), Dewsbury-Hall (6), Dibling (6).

Maður leiksins, að mati Sky Sports, var Barry.