Burnley – Everton 0-0

Mynd: Everton FC.

Í 18. umferð mætti Everton í heimsókn á Turf Moor leikvanginn til að mæta Burnley. David Moyes sagði fyrir leikinn að hann byggist við því að hópurinn væri óbreyttur frá síðasta leik, sem þýddi að Dewsbury-Hall missti einnig af þessum leik, sem og Branthwaite og Seamus Coleman, en Gana og Ndiaye voru frá vegna Afríkukeppninnar. Það kom hins vegar í ljós að Grealish væri ekki partur af hóp í dag vegna veikinda, þannig að Dibling kemur inn í byrjunarliðið fyrir hann.

Hjá Burnley var beðið eftir fréttum af Maxime Esteve, sem hafði verið lykilmaður í vörn Burnley, en hann reyndist ekki nægilega góður af meiðslum til að taka þátt í þessum leik. Auk þess voru þrír leikmenn þeirra frá vegna Afríkukeppninnar: Axel Tuanzebe (annar miðvörður), Lyle Foster (sóknarmaður) og Hannibal Mejbri (miðjumaður).

Burnley voru fyrir leik í næst-neðsta sæti deildar með 11 stig eftir að hafa náð jafntefli í þeirra síðasta leik, sem endaði sjö leikja taphrinu hjá þeim.

Uppstillingin: Pickford, Mykolenko, Keane, Tarkowski (fyrirliði), O’Brien, Iroegbunam, Garner, McNeil, Alcaraz, Dibling, Beto.

Varamenn: Travers, King, Aznou, Patterson, Welch, Campbell, Röhl, Barry.

Það mátti glögglega sjá á varamannabekknum að hópurinn hjá Everton var orðinn ansi þunnur, en á bekknum voru tveir markverðir, tveir kjúklingar, og að auki var eitt sætið meira að segja autt! Röhl og Barry voru þeir einu á bekknum sem hafa fengið einhverjar mínútur með aðalliðinu á tímabilinu.

Meistari Ingvar Bærings sá annars um skýrsluna í fjarveru ritara og kunnum við honum bestu þakkir fyrir og gefum honum orðið..

Burnley átti hornspyrnu eftir 6 mínútur, Pickford reyndi að kýla boltann frá en hitti hann ekki, boltinn barst út í teiginn til Burnley-manns sem átti skot en hitti ekki markið.

Ca 10 mínútum síðar gerði Dibling vel á hægri kantinum, lék á varnarmenn Burnley, komst inn í teiginn og átti fasta fyrirgjöf sem Beto rétt missti af.

Eftir 28 mínútur gerði Dibling nokkuð vel í að ná löngum bolta áður en hann færi aftur fyrir endamörk, hann náði að koma boltanum fyrir og út í miðjan vítateig, þar sem Alcaraz kom og átti þokkalega fastan skalla en því miður beint á markvörðinn.

Everton fékk hornspyrnu í upphafi seinni hálfleiks sem McNeil tók, markvörðurinn kýldi boltann frá beint á Garner sem skaut en yfir markið.

Burnley komst í dauðafæri á 58. mínútu. Leikmaður Burnley slapp þá einn inn fyrir vörnina en skaut yfir.

Alcaraz átti hjólhestaspyrnu á 66. mínútu leiksins. Þokkaleg tilraun og hefði orðið glæsilegt mark en varið.

Barry átti ágætis færi eftir 76 mínútna leik þegar hann fékk boltann inni í teig Burnley. Hann náði góðu skoti sem markvörðurinn náði að koma hönd á, þannig að boltinn skrúfaðist undir hann en allur kraftur farinn úr skotinu og varnarmaður hreinsaði frá.

Dibling vann svo aukaspyrnu til hliðar við vítateig Burnley sem McNeil tók. Hann kom með hættulegan bolta fyrir en Burnley bjargaði í horn. Garner tók hornið, boltinn barst út í teiginn til Dibling sem átti hörkuskot að marki sem varnarmaður Burnley greip næstum, en Craig Pawson var fljótur að grípa þetta tækifæri til að svindla á Everton, dæmdi ekki neitt og auðvitað var VAR-ið jafn gagnslaust og venjulega.

Fleira markvert sá ég nú ekki gerast í þessum leik nema kannski það að Patterson kom inn á fyrir Dibling í uppbótartíma, líklega var Moyes þá bara að hugsa um að halda þessu eina stigi.

Svo mörg voru þau orð. Við þökkum Ingvari fyrir (aftur).

Engar einkunnir hafa enn litið dagsins ljós hjá Sky Sports, þótt komið sé fram að hádegi daginn eftir. Athuga síðar.