Brighton – Everton 1-1

Mynd: Everton FC.

Everton átti leik við Brighton í dag í 26. umferð ensku úrvalsdeildarinnar og var hann leikinn á heimavelli Brighton.

Uppstillingin: Pickford, Mykolenko, Branthwaite, Tarkowski (fyrirliði), Godfrey, McNeil, Garner, Gueye, Harrison, Doucouré, Calvert-Lewin.

Varamenn: Virgínia, Keane, Patterson, Coleman, Young, Onana, Hunt, Chermiti, Beto.

Everton byrjaði leikinn af mikilli ákefð, greinilega staðráðnir í að gefa Brighton engan frið á boltanum, vinna hann af þeim og bruna í skyndisókn. Brighton menn greinilega fyrirskipað að gefa langa bolta upp kantinn á vinstri kantmann sinn, Adingra. Engin dauðafæri fyrsta korterið en Brighton meira að hóta og miklu meira með boltann en aðallega samt í að vinna hornspyrnur sem ekkert kom úr.

Dunk með fyrstu tilraun sem rataði á rammann, skalli eftir horn en beint á Pickford sem greip boltann auðveldlega.

Doucouré komst í flott skotfæri inni í teig eftir sendingu af kantinum, einn á móti markverði en Dunk var fljótur til baka og potaði boltanum aftur fyrir endalínu áður en Doucouré náði skoti.

Calvert-Lewin fékk dauðafæri eftir að Mykolenko komst upp vinstri kant og gaf frábæran háan bolta fyrir mark. Calvert-Lewin mættur til að skalla inn en Dunk var á undan í boltann og skallaði rétt framhjá eigin marki í horn.

Everton nálægt því að skora undir lok fyrri hálfleiks, en varnarmaður bjargaði í horn en Doucouré ranglega dæmdur rangstæður í aðdragandanum.

0-0 í hálfleik.

Á 48. mínútu gerði Dyche breytingu á liðinu þegar hann setti Onana inn á fyrir Gueye. Vissulega þvinguð breyting, þar sem Gueye fann eitthvað til í nára (?). En strax tíu mínútum síðar var varamaðurinn Onana hársbreidd frá því að skora. Fékk háan bolta inn í teig frá vinstri og var óvaldaður hægra megin. Tók viðstöðulaust skot á mark, kom boltanum framhjá markmanni en varnarmaður rétt náði að skalla frá af marklínu. Besta færi leiksins fram að því.

Beto kom svo inn á fyrir Calvert-Lewin á 68. mínútu og hann fékk strax skallafæri upp við mark en náði ekki að stýra boltanum á mark. Brighton svöruðu með skoti á mark, en enn á ný beint á Pickford. Leikurinn svolítið að opnast og loksins kom markið.

Á 73. mínútu fékk Everton aukaspyrnu í eigin hálfleik og Pickford tók hana, sendi langan háan bolta inn í teig sem Brighton rétt náðu að stoppa með skalla. Boltinn féll hins vegar vel fyrir Branthwaite, sem var utarlega í teig vinstra megin og smurði boltanum upp í samskeytin hægra megin. 0-1 fyrir Everton!

Á 82. mínútu versnaði svo staða Brighton þegar Billy Gilmour var rekinn út af fyrir ljóta tæklingu á Onana.

Everton hamingjusamir með að sitja nokkuð djúpt og beita skyndisóknum. Í einni slíkri komst Beto í færi hægra megin í teig, stuttu síðar, eftir flott hlaup inn fyrir vörn Brighton. Var hins vegar eltur uppi af tveimur varnarmönnum og skotið slakt.

Ansu Fati með skot af löngu sem Pickford þurfti að hafa sig allan við að slá frá út við stöng. Young kom svo inn á fyrir Doucouré á 89. mínútu.

Níu mínútum bætt við og á 5. mínútu uppbótartíma gaf Everton horn og upp úr því skoruðu Brighton jöfnunarmarkið. Everton náði reyndar að hreinsa fyrirgjöfina úr horninu en boltinn beint til Brighton aftur utan teigs, og þeir sendu á kantinn og náðu þar fyrirgjöf sem Dunk skallaði inn alveg út við stöng hægra megin. Óverjandi.

Harrison fékk svo frábært skotfæri hægra megin í teig undir lokin en sneri boltanum rétt framhjá stöng vinstra megin. Það reyndist síðasta færi leiksins.

1-1 því niðurstaðan. Brighton áfram taplausir á heimavelli frá því í október en Everton aðeins hársbreidd frá því að rjúfa sigurlausa göngu sína undanfarið.

Einkunnir Sky Sports voru ekki birtar vegna tæknigalla.