Aston Villa – Everton 4-0

Mynd: Everton FC.

Þá er komið að fyrsta útileik tímabilsins en hann er við Aston Villa á Villa Park kl. 13:00 að íslenskum tíma. Uppstillingin var birt fyrir nokkrum mínútum síðan og það var mikill léttir að sjá Calvert-Lewin í framlínunni. Það eru hins vegar ansi margir að jafna sig á meiðslum eða ná upp leikformi, eins og McNeil, Coleman, Harrison, Dele Alli, Gomes og Gbamin, sem allir eru meiddir. Chermiti og Danjuma eru báðir að reyna að koma sér í leikform, en sá síðarnefndi er á bekknum. Sýnist þetta vera 4-1-4-1 uppstilling, eða mögulega með tígul á miðsvæðinu. Kemur í ljós.

Uppstillingin: Pickford, Young, Tarkowski, Keane, Patterson, Gueye, Iwobi, Onana, Doucouré, Garner, Calvert-Lewin.

Varamenn: Virginia, Mykolenko, Branthwaite, Godfrey, Onyango, Danjuma, Dobbin, Cannon, Maupay.

Everton sá aldrei til sólar í fyrri hálfleik. Aston Villa menn byrjuðu af krafti og náðu að setja pressu á vörn Everton strax frá fyrstu sekúndum. Það tók Everton heilar tvær mínútur að snerta boltann á vallarhelmingi Villa og voru þeir þá búnir að gefa þeim tvær hornspyrnur. Fyrsta skotið kom á 9. mínútu þegar sóknarmaður Villa reyndi skot sem var nær því að enda bílastæðinu fyrir utan völl en í netinu. Engin hætta.

Aston Villa menn komust hins vegar yfir á 18. mínútu með flottri sókn upp hægri kant. Þar komust þeir upp að endalínu og sendu fyrir mark þar sem McGinn, fyrirliði þeirra, var óvaldaður og þrumaði inn af stuttu færi. 1-0 fyrir Aston Villa.

Villa menn fengu svo víti á 23. mínútu þegar Pickford lenti í samstuði við Ollie Watkins. Douglas Luiz fékk að taka vítið og Pickford giskaði á rétt horn en náði ekki að verja boltann, sem fór í netið alveg niðri í hægra horninu. Staðan orðin 2-0 fyrir Villa. Stuttu síðar áttu þeir skotfæri innan teigs, af nokkuð löngu færi, en Pickford vandanum vaxinn og kastaði sér á boltann til að verja. 

Villa menn betri á öllum sviðum fyrsta hálftímann og náðu að komast allt of auðveldlega í gegnum vörn Everton sem og að dæla boltum utan af köntunum og inn í teig.

Til dæmis á 32. mínútu, þegar Digne sendi háan bolta fyrir frá vinstri, beint á Diaby á fjærstöng sem tók viðstöðulaust skot á mark og smellhitti boltann. En Pickford varði með glæsilegum hætti í innanverða stöng hægra megin og þaðan út í horn hinum megin (sem segir ákveðna sögu um hversu tæpt þetta var). Ótrúleg varsla.

Á 36. mínútu settist Calvert-Lewin á jörðina og bað um skiptingu. Enn á ný er hann óheppinn með meiðsli, en hann hafði lent í samstuði við Martinez upp við mark Aston Villa eftir um korters leik og fékk högg á höfuðið, rétt fyrir neðan augað. Hann reyndi að halda áfram í um 20 mínútur en svo var það farið að vera sjáanlega bólgið og því var honum skipt út af. Danjuma inn á fyrir Calvert-Lewin. Everton fór þar með í 4-4-2 uppstillingu, með Danjuma og Doucouré frammi.

Það kom svo í hlut Danjouma að fá fyrsta færi Everton í leiknum, og það kom stuttu eftir að venjulegum leiktíma fyrri hálfleiks lauk. Hann komst einn inn í teig hægra megin, var ekki langt frá stöng en Martinez varði frá honum í horn. Ekkert kom úr horninu en Everton átti (loksins) ágæta spretti undir lokin, þó að ekki næðist færi út úr því.

2-0 í hálfleik.

Ein breyting hjá Everton í hálfleik en Dobbin kom inn á fyrir Gueye. Onana þar með settur aftastur á miðjuna, Dobbin yfir á vinstri kanti en Iwobi á þeim hægri. 

En hörmungin hélt bara áfram og strax í upphafi seinni hálfleiks dundi ógæfan yfir aftur þegar Everton missti annan leikmann í meiðsli. Iwobi tognaði nefnilega aftan á læri og var skipt út af á 50. mínútu. Maupay kom inn á fyrir hann og það tók Villa menn ekki nema nokkrar sekúndur að skora eftir það. Há sending barst inn í teig sem Keane reyndi að blokkera en var óheppinn og lagði boltann í staðinn snyrtilega fyrir sóknarmann Villa, sem setti hann í gegnum klofið á Pickford. Staðan orðin 3-0. 

Maupay fékk frábært skotfæri á fjærstöng eftir horn frá hægri — enginn að valda hann og hann náði því viðstöðulausu skoti á mark, en Martinez rétt náði að verja frá honum. Fín tilraun hjá Maupay, en eyðimerkurganga hans heldur áfram, því miður. Þetta var eina almennilega tilraunin á mark hjá Everton í seinni hálfleik (allavega sem ég man eftir).

Fjórða mark Villa kom stuttu síðar, eftir mistök hjá varnarmönnum Everton. Ashley Young tók langt innkast á Keane sem var samt of stutt, þannig að sóknarmaður Villa, Duran, sem var nýkominn inn á, komst inn í sendinguna og þar með var hann einn á móti Pickford. Átti svo ekki í neinum erfiðleikum með að leggja boltann í netið niðri hægra megin. Staðan orðin 4-0 fyrir Villa.

Onyango kom inn á fyrir Doucouré á næst-síðustu mínútu 9 mínútna uppbótartíma, en ekkert annað markvert gerðist. Stórt tap staðreynd í dag.

Einkunnir Sky Sports: Pickford (6), Patterson (5), Keane (4), Tarkowski (6), Young (4), Gueye (5), Garner (6), Doucoure (5), Onana (5), Iwobi (6), Calvert-Lewin (5). Varamenn: Danjuma (6), Dobbin (5), Maupay (6).

.