Everton – Chelsea 3-0

Mynd: Everton FC.

Þá er komið að 31. umferð ensku úrvalsdeildarinnar, með leik Everton á heimavelli gegn Chelsea. Þetta er aldeilis farið að styttast í annan endann, þar sem aðeins 8 leikir eru eftir af tímabilinu.

Uppstillingin: Pickford, O’Brien, Tarkowski (fyrirliði), Keane, Mykolenko, Gana, Garner, McNeil, Dewsbury-Hall, Ndiaye, Beto.

Varamenn: Travers, Coleman, Patterson, Branthwaite, Iroegbunam, Röhl, Dibling, Armstrong, Barry.

Tarkowski kemur aftur í byrjunarliðið eftir að hafa verið frá í síðasta leik og Branthwaite fer á bekkinn. Grealish er enn meiddur og George getur ekki spilað á móti eignarliði sínu. Hjá Chelsea eru Trevoh Chalobah, Reece James, Levi Colwill og Filip Jorgensen allir frá vegna meiðsla.

Ágætis tempo frá Everton í upphafi leiks, sem pressuðu leikmenn Chelsea vel.  Þeir sluppu með skrekkinn á 10. mínútu, þegar markvörður þeirra var að dóla með boltann og Beto náði að blokkera hreinsun út úr teig, en boltinn hrökk til varnarmanns, Chelsea til mikils léttis, því markvörður þeirra lá í grasinu. Garner fékk svo skotfæri, óvaldaður inni í teig, stuttu síðar, en skotið í varnarmann. 

Chelsea menn gerðu loks eitthvað af viti á 26. mínútu, þegar þeir komust í skyndisókn þrír á þrjá, en sólunduðu því með skoti beint í lappirnar á Tarkowski. Þeir náðu sókn stuttu síðar, þar sem þeir skutu tvisvar í samherja, að mér sýndist, og áttu svo tilraun á mark út við horn á vítateignum, regn Pickford greip það bara.

Á 33. mínútu náði Everton að setja mark á Chelsea og þar voru að verki Garner og Beto. Einfalt mark, löng stungusending frá Garner í hlaupaleið Beto, sem lagði boltann í fyrsta framhjá markverði Chelsea, sem kom hlaupandi út á móti.

En Chelsea reyndu að svara strax og náðu skoti á mark af stuttu færi, sem Pickford varði meistaralega. Ótrúleg viðbragða varsla sem sýndi enn á ný af hverju hann er fyrsti valkostur í marki Englands. 

1-0 í hálfleik.

Lítið að frétta í seinni hálfleik þangað til Enzo náði lúmsku skoti á fjærstöng frá horni vítateigs vinstra megin. Pickford hins vegar vandanum vaxinn og varði frábærlega í horn.

En Everton bætti við marki á 62. mínútu, og í þetta skiptið lagði Gana upp marktækifæri fyrir Beto. Gana gerði vel að lesa leikinn og stelast inn í sendingu fram, hjá Chelsea. Brunaði fram og skildi þá eftir, og renndi boltanum fyrir Beto inni í teig. Hann náði skoti á mark sem markvörður missti í gegnum klofið á sér og inn fyrir. 2-0 fyrir Everton!

Chelsea menn reyndu allt til að minnka muninn, meira að segja skot beint úr horni á 71. mínútu, sem fór í ofanverða slána. Pickford þó með það.

En Everton setti bara þriðja markið í andlitið á þeim og í þetta skiptið gaf Beto stoðsendingu þegar hann skallaði langt útspark til Ndiaye, sem þakkaði fyrir sig með því að smyrja boltanum upp í samskeytin hjá Sanchez í marki Chelsea! 3-0! Stuðningsmenn Chelsea forðuðu sér flestir út við þetta.

Everton náði flottri skyndisókn á 85. mínútu, þar sem Dewsbury-Hall komst í skotfæri og náði föstu skoti á mark, en Sanchez varði, merkilegri nokk.

En lengra náði það ekki. 3-0 verðskuldaður sigur staðreynd og Everton komið upp í 7. sæti!

Einkunnir Sky Sports: Pickford (9), O’Brien (7), Tarkowski (7), Keane (7), Mykolenko (7), Gueye (8), Garner (9), Dewsbury-Hall (7), McNeil (7), Ndiaye (8), Beto (9). Varamenn: Branthwaite (6), Barry (6).

Maður leiksins, að mati Sky Sports (og ritara), var Beto, enda kom hann að öllum mörkum Everto (setti tvö og gaf eina stoðsendingu). Leikmenn Chelsea voru við jaðar falleinkunnar, nánast allir sem einn. Gusto og Palmer náðu í 6, hinir lægra — og markvörður þeirra með fjóra í einkunn.