Everton – Tottenham 3-2

Mynd: Everton FC.

Nú er komið að heimaleik Everton við Tottenham í 22. umferð ensku úrvalsdeildarinnar. Það vill svo til að bæði þessi lið eru í augnablikinu í einu af neðstu 6 sætunum, en það er örugglega mjög langt síðan það gerðist síðast í viðureign þessara liða.

Uppstillingin: Pickford, Mykolenko, Branthwaite, Tarkowski (fyrirliði), O’Brien, Lindström, Gana Managla, Ndiaye, Doucouré, Calvert-Lewin.

Varamenn: Virginia, Begovic, Patterson, Young, Armstrong, Keane, Harrison, Sherif, Beto. 

Fyrsta færið kom í hlut Lindström á 6. mínútu, en hann átti fast skot rétt utan teigs sem stefndi í netið vinstra megin, en Kinsky, markvörður Tottenham, varði í horn. Það tók töluverðan tíma að taka hornið, því að dómarinn missti sambandið við aðstoðardómara en ekkert kom úr horninu þegar búið var að laga það.

Mark Everton kom hins vegar á 13. mínútu, eftir að Gana fann Calvert-Lewin inni í teig vinstra megin. Hann var með þrjá í kringum sig en sveigði með boltann — fyrst til hægri, svo vinstri og svo aftur til hægri, þannig að varnarmenn Tottenham vissu varla í hvorn fótinn þeir ættu að stíga. Allir bjuggust svo við skoti hægra megin, þar sem meira pláss var að finna, en Calvert-Lewin setti boltann vinstra megin í markið með markvörð á leiðinni í vitlaust horn. Everton komið 1-0 yfir!

Það hafði ekki verið nein ógnun í Tottenham fyrstu 18 mínúturnar, en þá komst Son í dauðafæri eftir mjög langa sendingu fram, komst einn á móti Pickford, en Tarkowski náði að hlaupa hann uppi og stoppa skotið. 

Á 24. mínútu fann Kulusevski Son á auðum sjó utarlega í vítateig. Hann náði skoti á mark, en skotið slakt, lágt og olli Pickford litlum vandræðum. Illa farið með gott færi — sem betur fer.

Everton svaraði í næstu sókn 25 með löngum bolta fram sem fann hlaupaleiðina á Calvert-Lewin. Hann komst einn á móti markverði en síðasta snerting fyrir skot brást honum og leyfði markverði að komast í boltann áður en hann náði skotið. 

Næsta færi Everton kom aðeins mínútu síðar, þegar Calvert-Lewin fékk boltann inn í teig. Hann var ekki í góðri aðstöðu til að skjóta, þannig að hann sendi stutt til hliðar á Mangala, sem reyndi skot út við stöng. En markvörður Tottenham rétt náði að vera í utanverða stöng og út og hélt Tottenham inni í leiknum. Heppnir þar.

Son reyndi að fiska vítaspyrnu í næstu sókn þeirra, sem hefði verið harður dómur. Hefði verið ákveðinn vendipunktur, því að í staðinn skoraði Everton og það mark var af einfaldara taginu. Ndiaye komst framhjá miðjumanni með góðu þríhyrningarspili við Mykloenko (sýndist mér). Ndiaye brunaði með boltann fram og alla leið inn í teig, komst auðveldlega framhjá Dragosin í vörn Tottenham og þrumaði rétt yfir hausamótunum á markverðinum. 2-0 fyrir Everton!

7 mínútum bætt við og skömmu áður en þeim tíma lauk tók Lindström frábæra aukaspyrnu sem fann Tarkowski inni í teig, fremstur beint fyrir framan markið. Hann beygði sig langt niður til að ná skallanum á mark, en náði ekki að stýra boltanum framhjá markverði. 

Tottenham skoruðu svo snoturt sjálfsmark rétt fyrir lok fyrri hálfleiks. Það byrjaði með hárri sendingu fyrir mark frá Lindström, sem var á hægri kanti, og fann þar með Tarkowski á fjærstöng. Tarkowski skallaði fyrir mark aftur og Calvert-Lewin framlengdi skallan og Tottenham maður reyndi hreinsun í liðsfélaga sinn, Grey, í vörninni og þaðan inn. Staðan orðin 3-0 fyrir Everton og þannig var það í hálfleik!

Everton aðeins með boltann 37% af fyrri hálfleik, en það sem meira máli skipti var að Everton átti tvöfalt fleiri tilraunir á marki en Tottenham og þrefalt fleiri sem rötuðu á mark.

Ein breyting á liðunum í hálfleik, Dragoshin fór út af fyrir Tottenham vegna meiðsla á auga, sem hann hafði hlotið fyrr í leiknum. Tilraun þeirra með þriggja manna varnarlínu endaði þar með og Richarlison kom inn á. Þeir stilltu því upp í 4-3-3 í seinni hálfleik.

Tottenham virtust ætla að gefa Everton mark á silfurfati á 60. mínútu þegar Kinsky í markinu sparkaði út úr teig beint á Lindström á hægri kanti, sem brunaði með boltann inn í teig og fann Calvert-Lewin fyrir framan mark. Fyrsta snerting hans ekki góð, missti boltann aðeins frá sér en náði, með bakið í marki, að snúa og skjóta — en rétt framhjá stöng.

Lindström fór svo út af á 69. mínútu, þreyttur eftir frábæra frammistöðu. Young kom inn á fyrir hann.

Maddison reyndi skot af löngu færi á 73. mínútu en of hátt og langt framhjá. Þetta var fyrsta tilraun þeirra á mark í um 40 mínútur (!!). Á þeim tímapunkti breyttu þeir í 4-2-4 og uppskáru mark á 77. mínútu þegar þeir komust í skyndisókn með Maddison fremstan. Pickford þurfti að koma langt út frá marki og til vinstri. Varð að vera þar til að loka á Maddison því að enginn kom til að leysa hann af, en eftir smá darraðadans endaði boltinn hjá Kulusevski, við hornið á vítateig vinstra megin, frá okkur séð, og Kulusevski náði að vippa rétt svo yfir þrjá eða fjóra varnarmenn Everton í línu milli Kulusevski og marksins. Fullkominn sveigur sem endaði í netinu. Staðan orðin 3-1. Patterson kom svo inn á fyrir Ndiaye á 80. mínútu. 

Richarlison náði tveimur skotum innan teigs á 85. mínútu, í sömu sókninni, en blokkerað af varnarmanni í bæði skiptin.

Calvert-Lewin komst í dauðafæri á 85. mínútu þegar hann náði að stela boltanum af aftasta varnarmanni, Grey. En rétt áður en hann náði að lyfta boltanum yfir Kinsky, sem kom hlaupandi út úr markinu, náði Kinsky að slá boltann frá honum. Tottenham stálheppnir þar.

Keane kom inn á fyrir Jake O’Brien á 87. mínútu og Everton fór þar með í 5 manna varnarlínu með Mykolenko og Patterson í bakvarðarstöðunum. 

Á 92. mínútu náði Richarlison enn að minnka muninn eftir háa sendingu á fjarstöng vinstra megin sem hann böðlaði inn. Það fór svolítið um mann við það mark, því við munum allt of vel eftir Bournemouth leiknum — og Villa leiknum, fyrr á tímabilinu. En jafntefli hefði verið miklu meira en Tottenham áttu skilið. Þetta var einfaldlega afleit frammistaða hjá Tottenham ef frá er skilið þetta stutta skeið þar sem þeir skoruðu mörkin.

3-2 sigur því niðurstaðan í dag, sem lítur allt of vel út fyrir Tottenham, miðað við frammistöðu þeirra í dag.

Einkunnir Sky Sports: Pickford (6), O’Brien (7), Tarkowski (7), Branthwaite (6), Mykolenko (6), Gueye (7), Mangala (7), Lindstrom (7), Doucoure (7), Ndiaye (8), Calvert-Lewin (8). Varamenn: Young (6), Patterson (6), Keane (6).

Maður leiksins, að mati Sky Sports, var Calvert-Lewin.

Byrjunarlið Tottenham var allt vel fyrir neðan meðalmennskuna í einkunnagjöfinni, því þar á bæ voru þetta fjarkar og fimmur á línuna, fyrir utan tvo (Kulusevski og Maddison) sem fengu 6.