Everton – Southampton 1-1 (deildarbikar)

Mynd: Everton FC.

Þá er komið að þriðju umferð enska deildarbikarsins og í kvöld tekur Everton á móti Southampton, kl. 18:45, á Goodison Park.

Skv. Ölveri verður leikurinn sýndur í beinni útsendingu og það er meiningin að láta á það reyna.

Uppstillingin: Virginia, Dixon, O’Brien, Keane, McNeil, Mangala, Armstrong, Doucouré (fyrirliði), Lindström, Ndiaye, Beto.

Varamenn: Pickford, Begovic, Young, Iroegbunam, Harrison, Sherif, Butterfield, Moonan, Barker.

Sem sagt: Nánast allt byrjunarliðið reynslulítið hvað úrvalsdeildina varðar en þar má aðallega finna leikmenn á jaðri aðalliðsins. Bekkurinn er auk þess hálf-þéttsetinn af kjúklingum og eiginlega bara tveir þar (Iroegbunam og Harrison) sem geta líklega breytt gangi leiks ef þetta stefnir ekki í rétta átt.

Fjögurra manna varnarlína í kvöld. Beto frammi, Doucouré í holunni, með þá Ndiaye (vinstra megin) og Lindström (hægra megin) með sér. Ungliðinn Armstrong og Mangala á miðjunni.

Southampton meira með boltann en færin nánast öll hjá Everton.

Fyrsta færið á 12. mínútu, Lindström með skot innan teigs hægra megin en blokkerað. Boltinn hins vegar til Beto sem náði fínu skoti frá hægri, en markvörður varði í horn.

Ekki mikið að gerast þangað til á 20. mínútu, þegar Everton fékk hornspyrnu. Þetta leit út fyrir að ætla að verða að engu en Lindström, við fjærstöng, náði hælspyrnu, sem hélt boltanum inná. Keane gerði þar svakalega vel að vinna skallaeinvígi fyrir framan mark og koma boltanum á rammann, en Doucouré náði að breyta stefnunni og koma honum framhjá markverði. 1-0 fyrir Everton!

Örfáum mínútum síðar náði Lindström að sprengja rangstöðugildru Southampton og komast óáreittur upp að marki, en skotið afleitt. Þar hefði staðan átt að vera 2-0.

Og Southampton náðu að sjálfsögðu að refsa, gegn gangi leiksins. Fengu aukaspyrnu á vinstri kanti (frá þeim séð), skelltu háum bolta á fjærstöng þar sem þrír leikmenn Everton umkringdu sóknarmann Southampton sem vann skallaeinvígi og skoraði upp í samskeytin. 1-1.

Og þannig var það í hálfleik.

Á 54. mínútu fékk Lindström besta færi leiksins fram að því, þegar Beto sendi hann inn fyrir vörnina með frábærri sendingu. Lindström komst, líkt og í fyrri hálfleik, einn inn í teig með bara markvörð eftir en skotið (aftur) arfaslakt. Illa farið með gott færi.

Harrison og Young komu inn á á 62. mínútu fyrir Armstrong og Beto. Harrison settur á vinstri kant og Ndiaye beint í framlínuna. McNeil þar með í framlínuna.

Iroegbunam út af fyrir Doucouré á 79. mínútu.

Hvorugu liðinu tókst að skapa sér almennileg færi, aðallega að vinna með hálffæri, en Southampton menn náðu slöku skoti á mark á ca. 80. mínútu.

Everton fékk frábært skallafæri á 82. mínútu eftir horn, en skallaði rétt yfir. Southampton menn heppnir.

Southampton fengu eitt gott skotfæri, rétt fyrir lok leiks, svona um það bil þegar við vorum að ræða hverjir myndu taka vitin í vítaspyrnukeppni sem stefndi í. Skotið hins vegar nokkuð vel yfir.

Ashley Young átti eitt skot að marki rétt fyrir lokaflautuna, en framhjá marki.

Vító framundan!

Southampton byrjuðu, með öruggu viti í mitt mark frá Fernandes. 0-1.

Keane fyrstur fyrir okkar menn, öruggur vinstra megin. 1-1.

Southampton svöruðu einnig til vinstri og skoruðu. 1-2.

McNeil á punktinn, öruggur niðri hægra meginn. 2-2.

Diaz svaraði niðri í vinstra horn, öruggt. 2-3.

Ndiaye á punktinn. Aftur öruggt niðri vinstra meginn. 3-3.

Southampton svöruðu, aftur niðri í vinstri. 3-4.

Lindström með næsta, stöngin inn vinstra megin. 4-4.

Southampton öruggir í næsta, hægra megin í þetta skiptið. 4-5.

Harrison næstur. Öruggur í hægri. 5-5. Bráðabani!

Southampton niðri í vinstri aftur. 5-6.

Ashley Young á punktinn. Skaut vinstra megin en markvörður varði í stöng og út.

Og þannig fór um sjóferð þá — Southampton áfram í bikarnum.