Newcastle – Everton 1-2

Mynd: Everton FC.

Ótrúlega fjörugur leikur að baki en afraksturinn þrjú stig í hendi. Þriðji sigurleikurinn í fjórum leikjum (með Fellaini mest megins í banni) og ekki hægt að biðja um meira en að taka 5. sætið af Arsenal, sem tókst ekki að sigra Southampton í gær. Aðeins tvö stig í Chelsea (sem töpuðu fyrir QPR í kvöld) og þrjú stig í Tottenham í þriðja sætinu. Ekki slæmt.

Það var sárt að tapa fyrir Chelsea í síðasta leik (sérstaklega í ljósi spilamennskunnar) en þessi umferð bætti fyrir það með mjög spennandi leik þar sem bæði lið hefðu getað landað sigrinum og hitt liðið hefði ekki getað kvartað. Everton liðið var hungrað eftir tapleikinn gegn Chelsea — og að ógleymdum tveimur stigum sem Newcastle stal af Everton á Goodison Park, sem var ekkert annað en rán um hábjartan dag! En þrátt fyrir hetjulega baráttu náði Newcastle ekki þeirri niðurstöðu sem þeir voru að vonast eftir og ekki var það sökum þess að hafa ekki skapað sér fjölmörg færi. Yfirleitt Everton í þeirri stöðu að ná ekki að klára færin, en við grátum ekki að vera á hinum endanum í þeirri jöfnu.

Uppstillingin: Howard, Baines, Distin, Heitinga, Jagielka (aftur í neyðar-hægri-bakverði). Osman og Neville á miðjunni. Pienaar á vinstri. Naismith á hægri. Fellaini fyrir aftan Jelavic frammi. Helstu fréttir frá Newcastle liðinu að Demba Ba var ekki með, en hann var að skrifa undir hjá Chelsea og um leið sjá þá tapa fyrir QPR. Gleðilegt að sjá ekki bara Fellaini aftur í liðinu heldur líka Neville, sem er kærkomið í fjarveru Gibson. Það var unun að sjá Fellaini aftur taka hvern boltann á fætur öðrum á kassann og niður og koma honum í leik, sem og Pienaar sem virðist alltaf geta skilað af sér klassasendingu, jafnvel þó hann sé á leiðinni í jörðina eftir að andstæðingurinn er búinn að djöflast í honum.

Newcastle fékk óskabyrjun í leiknum þegar þeir tóku aukaspyrnu á annarri mínútu á eigin vallarhelmingi (Jelavic hafði verið dæmdur rangstæður enn og aftur). Markvörður þeirra bombaði boltanum fram á við og Heitinga (með Distin sér við hlið og sóknarmann í sér) hitti ekki boltann þegar hann reyndi að skalla frá. Boltinn skoppaði inn í vítateig þar sem „litli Demba“ (Papiss Cisse) var mættur á hárréttum stað, einn á móti markverði og skallaði boltann yfir Howard, sem hljóp fyrst á móti honum en hætti svo við þegar hann sá hvert í stefndi. 1-0 Newcastle og leikurinn varla byrjaður. Stoðsending hjá markverði Newcastle. Er þetta ekki dæmigert fyrir heppni Everton á tímabilinu?

Og það var eins og Everton liðið væri ekki komið almennilega í gang því Newcastle fékk strax færi aftur, stuttu síðar en Cisse náði ekki að bæta við. Felli átti skot sem var varið en svo var Everton liðið stálheppið að fá ekki á sig mark á 29. mínútu þegar James Perch hjá Newcastle skallaði í stöng eftir aukaspyrnu. Pienaar hefði getað jafnað á hinum endanum en Krul bjargaði Newcastle. Cisse vildi fá vítaspyrnu stuttu síðar fyrir að kasta sér á Neville. Hefði ekki verið vítaspyrna þó Manchester City hefði beðið um hana. Á heimavelli.

Leikurinn var annars almennt séð nokkuð opinn og skemmtilegur og nóg af færum, þó Newcastle hefði forskotið í fjölda færa (enda á heimavelli). Það var ekki að sjá að þeir væru í vandræðum með að ná sér í stig, miðað við spilamennskuna í kvöld. En bæði lið fengu nóg af færum, svo mikið að ég á eiginlega í vandræðum með að telja þau öll upp.

Baines var þó atkvæðamikill í leiknum en Tim Krul varði vel frá honum tvisvar í leiknum (einu sinni úr aukaspyrnu) áður en Baines skoraði jöfnunarmarkið á 43. mínútu eftir að Fellaini fiskaði aukaspyrnu (sem ég get ekki séð að hafi verið aukaspyrna) nokkuð utan teigs. Baines, sem venjulega lyftir boltanum yfir vegginn í nærhornið, ákvað nú að breyta til og negla bara í fjærhornið, framhjá veggnum. Þvílík aukaspyrna sem hann tók af löngu færi og boltinn söng í netinu. 1-1, rétt fyrir hálfleik. Mark umferðinnar og mjög líklega mark mánaðarins hjá Everton.

Newcastle var næstum komið yfir aftur en Ameobi skaut rétt framhjá stönginni. Átti að gera betur þar.

Á 59. mínútu kom svo það sem reyndist sigurmark Everton þegar Jelavic fékk sendingu frá Fellaini og geystist upp vinstri kantinn, lék á varnarmann Newcastle og sendi frábæra sendingu fyrir markið þar sem Anichebe, supersöbbinn okkar enn á ný — í sinni fyrstu snertingu (nýkominn inn á) — setti boltann í netið. 1-2 Everton. Annað árið í röð skorar Anichebe sigurmarkið á útivelli í fyrsta leik okkar á nýju ári (síðast gegn West Brom).

Cisse fékk tvö tækifæri í sömu sókninni á 69. mínútu til að jafna, fyrst skalli beint í hausinn á Heitinga og svo skotið úr frákastinu beint á Howard.

Fellaini var ekki langt frá því að skora þegar hann náði óvænt að vippa yfir Krul í markinu en Krul reddaði því (í horn, að mig minnir). 6 mínútum bætt við. Þetta var svo rausnarlegt við heimaliðið að maður hélt maður væri bara kominn á Old Trafford? En ekki náðu Newcastle menn að nýta sér það.

Ef færin eru talin höfðu Newcastle yfirhöndina en, líkt og heima á móti Chelsea er það nýtingin sem skiptir öllu máli. Þrjú stig á útivelli sem reynist Everton yfirleitt erfiður. Grátum það ekki. Everton hefur nú skorað í 18 deildarleikjum í röð og hefur skorað í öllum leikjum tímabilsins í öllum keppnum að einum leik undanskildum (West Brom úti í deild). Öllu verra er að Everton hefur einnig fengið mark á sig í 16 leikjum í röð, en á meðan liðið er í og við Champions League sæti þá kvartar maður ekki mikið yfir því. Loksins sigur á hvað-sem-þeir-kalla-leikvanginn-í-dag vellinum. Coleman og Mirallas væntanlega klárir í næsta leik, heima gegn Swansea.

Bluekipper benti á það að stjóri Newcastle, Alan Pardew, hefði bent á það í fyrra (þegar Newcastle var að berjast um Champions League sæti) að Newcastle væru að spila í annarri deild en Everton og ef þeir halda áfram á sömu braut í ár væri aldrei að vita nema þeir myndu enda í annarri deild, eftir allt saman! 🙂 Get ekki annað en sagt að þetta sé verðskuldað eftir að hafa horft upp á strikamerktu drengina (með eigin augum) stela stigi með glæpsamlegum hætti á Goodison Park fyrr á tímabilinu.

Einkunnir Sky Sports: Howard 6, Baines 8, Distin 7, Heitinga 7, Jagielka 6, Pienaar 8, Neville 6, Osman 6, Naismith 6, Fellaini 7, Jelavic 7. Varamenn: Oviedo 7, Anichebe 8. Newcastle voru með þrjár sjöur (markvörðurinn Krul, markaskorarinn Cisse og Obertan), fimm með sexur og þrír með fimmur.