Everton vs. Krasnodar

Mynd: Everton FC.

Þegar ljóst var hvernig riðlarnir í Europa League myndu verða fyrir þetta tímabil fór maður að sjá, til dæmis á BBC, tilvitnanir um að Everton liðið hefði verið óheppið með dráttinn, því riðillinn væri með tveimur öðrum sterkum liðum og því í raun ekki ósvipaður Meistaradeildarriðli.

En eftir fimm leiki er þetta staðan í Europa League deildinni fyrir síðasta leik riðilsins:

 

Það verður hreinlega að segjast eins og er að ef það var rétt (að þetta sé eins og Champions League riðill) þá er ekki annað hægt að áætla en að Everton eigi vel heima í þeim félagsskap. Lille unnu frönsku deildina 2011 og Wolfsburg eru þessa stundina í öðru sæti í þýsku deildinni núna, sem gerir þetta bara enn sætara. Everton búið að tryggja sér efsta sæti riðilsins, fyrir síðasta leikinn — án þess að hafa leikið þann leik sem á pappír var metinn auðveldastur (taka á móti lakasta liðinu á heimavelli).

En það gerist einmitt núna á fimmtudagskvöldinu kl. 20:05 og má gera ráð fyrir að við fáum að sjá nokkuð af ungliðum og leikmönnum á jaðrinum sem hafa lítið fengið að spreyta sig. Gefið hefur verið út að Kone verði í framlínunni, gott að fá hann aftur úr meiðslum. Það verður annars ómögulegt að segja hvert liðið verður og kannski rétt að leyfa ykkur lesendum að spá fyrir um það í kommentakerfinu.

Í öðrum fréttum er það helst að:

– Everton dróst á móti West Ham í FA bikarnum rétt eftir áramót. Þetta verður hörkuleikur á Goodison Park.
– Jagielka var valinn leikmaður nóvembermánaðar eftir að hafa hjálpað til við að halda hreinu gegn Swansea City, Lille og Wolfsburg og skorað gegn Lille.
– Leikvangur okkar, Goodison Park, var valinn Spectator Ground of the Year, enda mjög góður heim að sækja.
– Og U18 ára liðið okkar sigraði Stevenage U18 2-1 í FA bikarkeppni U18 ára liða. Calum Dyson og Nathan Broadhead skoruðu mörk Everton.

Hvernig mynduð þið annars stilla upp liðinu gegn Krasnodar?