Norwich – Everton 2-1

Mynd: Everton FC.

Everton mætti Norwich í dag á heimavelli þeirra síðarnefndu og leikurinn spilaðist eiginlega eins og leikirnir flestir við lið fyrir neðan okkur á tímabilinu hafa spilast. Everton betra liðið, meira með boltann, mun beittari í sóknartilburðum, kemst yfir og fær þó nokkur tækifæri til að gera út um leikinn. Everton átti að fá allavega tvö víti (en fékk ekki) og er algjörlega fyrirmunað að bæta við mörkum. Andstæðingnum vex ásmegin og lauma svo inn marki á lokamínútum. Þessi leikur var svo sérstaklega frústrerandi þar sem Norwich laumaði inn tveimur mörkum á síðustu mínútunum þannig að í stað þess að missa niður þrjú stig í eitt sá Everton á eftir öllum þremur stigunum í leiknum.

Fyrstu tæpar 40 mínúturnar var staðan jöfn, 0-0, sem gæti gefið til kynna (fyrir þá sem ekki horfðu á leikinn) að þetta væri hundleiðinlegur leikur (eins og leikir gegn Norwich eru oft). En svo var þó ekki, eins og enski þulurinn benti á, því boltinn barst markanna á milli og þó nokkuð um færi hjá báðum liðum.

Coleman kom aftur í liðið eftir nokkra fjarveru og var það gleðiefni en Mirallas, sá sem maður vonaðist eftir að væri honum til aðstoðar á hægri kantinum var á bekknum. Uppstillingin því: Howard, Baines, Jagielka, Distin, Coleman, Pienaar, Gibson, Osman, Naismith, Fellaini, Jelavic. Varamenn: Mucha, Heitinga, Oviedo, Mirallas, Hitzlsperger, Neville og Duffy. Anichebe greinilega fjarri góðu gamni.

Norwich átti ágætis færi á 5. mínútu vinstra megin í teignum en Distin náði að tækla og blokkera skotið. Boltinn endaði í sveig ofan á markinu og fór pínulítið um mann. Aðeins mínútu síðar átti Coleman svo fyrirgjöf frá hægri í vítateig Norwich sem fer í varnarmann Norwich og markvörður þarf að slá frá marki til að verjast sjálfsmarki varnarmanns. Á hinum endanum átti Norwich svo flott skot á 18. mínútu en boltinn fór í bakið á þeirra eigin manni (Grant Holt) áður en reyndi á Howard. Fellaini átti tvö skot með stuttu millibili: fyrst í varnarmann Norwich en seinna skotið hátt upp í stúku. Það voru mörg moment í leiknum þar sem maður ranghvolfdi augunum yfir slökum skotum Everton manna á mark sem og hornspyrnum en það sem skorti á skotvissina var bætt upp með skallatækni hjá minnsta manni vallarins, Osman, á 38. mínútu þegar hann fékk frían skalla inn í teig eftir fyrirgjöf frá Baines (sem fékk boltnan frá Pienaar — en ekki hvað?) og gerði Osman vel og skoraði flott skallamark.

0-1 í hálfleik og Everton áttu forskotið skilið. Mun meira með boltann og alltaf líklegra liðið til að skora heldur en Norwich. Everton leit vel út í fyrri hálfleik og létt yfir mannskapnum í salnum sem var að horfa, sérstaklega eftir að Everton komst yfir. Leikurinn var aðeins daufari í seinni hálfleik, allavega til að byrja með. Tvisvar í leiknum sá maður leikmann Norwich halda utan um leikmann Everton inni í eigin teig þegar boltinn barst (minnir að það hafi verið Fellaini í bæði skiptin) og enski þulurinn hafði það á orði að þetta væri víti og ætti ekki að sjást — og minntist svo á að það yrði að fara að breyta reglunum þannig að ef varnarmaður heldur utan um sóknarmann þá eigi að dæma víti þó boltinn sé ekki í leik. Ég get ekki verið annað en sammála en þetta var greinilega taktíkin hjá Norwich, sem og að tækla fast allan leikinn en oft fékk maður fyrir hjartað að sjá sumar tæklingarnar hjá leikmönnum Norwich þar sem Everton maður lá eftir. Dómarinn, Lee Mason, var þó ragur við að sýna spjöldin, jafnvel þegar miðjumaður Norwich var með takkana á lofti og tæklaði í lærið á Fellaini svo að blæddi verulega úr. Dæmdi ekki einu sinni aukaspyrnu. Einu spjöldin sem hann sýndi voru fyrir Grant Holt fyrir að toga aftan í Coleman sem fíflaði hann á kantinum og á Baines fyrir að standa kyrr og láta leikmann Norwich hlaupa á sig.

Eins og svo oft áður á tímabilinu, þá horfði maður upp á Everton með eins stigs forskot slaka á klónni og leyfa andstæðingunum að komast meira og meira inn í leikinn og jafna svo með suckerpunch marki. Í þetta skiptið gerðist það á 84 mínútu þegar Norwich tóku aukaspyrnu (einu sinni kunni Everton að verjast föstum leikatriðum) en Kamara fékk frían skalla á markið þegar Fellaini átti að vera að dekka hann. Minn maður Fellaini er frábær skallamaður en hann hefur sýnt það allt of oft á síðustu tveimur tímabilum að hann er alls ekki nógu góður að fylgja sóknarmönnum andstæðingsins eftir og ræna af þeim skallafæri í föstum leikatriðum. Staðan orðin 1-1 og yfirburðir Everton orðnir að engu.

En svo kom rothöggið. Eftirlitsdómarinn bætti þremur mínútum við leikinn en Lee Mason hefur haldið að hann væri að leika á Old Trafford því hann leyfði leiknum að ganga nokkuð lengur (þó ekki hafi komið til frekari tafa) og á lokasekúndunni böðlar Grant Holt boltanum í netið hjá Everton, eins og honum er einum lagið og þar með stálu Norwich öllum þremur stigunum. Varla tími til að taka miðjuna og því 2-1 sigur Norwich staðreynd. Ósanngjarnt þegar litið er til þess að Everton stjórnaði leiknum nokkuð vel og hefði átt að vera búið að gera út um leikinn löngu áður en Norwich jafnaði. Ekkert nýtt þar, svo sem.

Hvar stendur Everton nú varðandi Evrópusæti hlýtur maður að spyrja sig. Ekki hafði ég mikla trú á þremur stigum gegn United á útivelli og því batt maður nokkrar vonir við það að nú væri þetta loksins að smella í gang aftur og hægt væri að ná í (helst tvo) sigurleiki — gegn Norwich og Reading (sem eru næstir í deild) til að setja pressu á Arsenal og Tottenham fyrir ofan okkur. Sérstaklega í ljósi þess að það eru nokkrir erfiðir leikir framundan á næstunni (Arsenal úti, City heima, Tottenham úti) og Everton ætlar sér greinilega að velja erfiðu leiðina (eins og venjulega) til að reyna að ná 4. sætinu. Maður veit þó aldrei hvað gerist — Everton á það til að bregðast manni þegar gatan virðist greiðfær og koma manni á óvart þegar allt virðist ómögulegt. Það þarf að stoppa lekann á síðasta korterinu ef það á að vera möguleiki en sú von fer dvínandi.

Einkunnir Sky Sports: Howard 7, Baines 7, Distin 6, Jagielka 6, Coleman 8, Pienaar 6, Osman 6, Gibson 6, Naismith 6, Fellaini 6, Jelavic 6. Varamennirnir Oviedo og Mirallas fengu 6. Einkunnir byrjunaliðs Norwich voru svipaðar: Fimm sjöur, restin með 6 nema ein fimma. Varamaðurinn Kamara (sem jafnaði) með níu.

Það var þó frábært ekki bara að sjá Coleman aftur í liðinu, heldur líka að sjá framlagið hjá honum en hann var besti leikmaður Everton í leiknum og átti frábæran leik í vörn og sókn — átti nokkrar „landsliðs-tæklingar“ sem drápu sóknir Norwich í fæðingu og maður hélt að hefðu komið frá Jagielka þangað til maður sá endursýningu og svo var hann líflegur frammi líka og átti það til að fífla varnarmenn Norwich.

Oldham næst í bikarnum. Forgangsatriði að vinna hann.