Leicester – Everton 3-1

Mynd: Everton FC.

Everton mætti nýbökuðum Englandsmeisturum Leicester og áttu arfaslakan leik, ef frá er talinn 5-10 mínútna kafli í upphafi seinni hálfleiks. 3-1 tap niðurstaðan og hefði getað verið stærra ef Robles hefði ekki verið í markinu.

Uppstillingin: Joel, Baines, Stones, Pennington, Oviedo, Cleverley, McCarthy, Lennon, Barkley, Niasse, Lukaku. Varamenn: Howard, Connolly, Besic, Gibson, Osman, Mirallas, Dowell.

Leicester menn skoruðu mark strax í upphafi leiks (5. mínútu) þegar King fékk boltann utan við teig og sá fékk eins mikinn tíma og hann vildi til að velja samherja til að senda á. Hann sendi háan bolta fyrir á Vardy sem þurfti nánast bara að pota inn fyrir framan markið. Staðan 1-0 fyrir Leicester.

King var svo nálægt því að bæta við á 9. mínútu — aftur eftir háa fyrirgjöf frá hægri en King skallaði beint á Robles alveg upp við mark. Hefði átt að gera betur þar.

Fyrsta færi Everton kom eftir um fimmtán mínútuna leik, þegar Ovideo, skildi vinstri bakvörð Leicester eftir í rykinu og komst upp hægri kant. Hann gaf flottan lágan bolta fyrir til Lukaku sem náði skoti en miðvörður Leicester náði að kasta sér fyrir boltann og blokkera í horn.

Everton fékk tvö hálffæri í kjölfarið, m.a. skot frá Lennon, en ekkert kom út úr þeim færum.

King bætti svo við öðru marki fyrir Leicester eftir um hálftíma leik. Mahrez stakk sér á milli Baines og Cleverley inn í teig, Baines sýndist mér tækla boltann frá honum en beint til King sem þrumaði inn. Staðan 2-0 fyrir Leicester og þannig var það í hálfleik.

Skelfilega lélegur fyrri hálfleikur hjá Everton, líklega einn sá versti á tímabilinu.

Everton byrjaði seinni hálfleikinn fjörlega og gerðu harða hríð að marki Leicester á fyrstu mínútunum. Niasse átti fyrsta færið þegar hann og Lukaku komust tveir á móti einum varnarmanni Leicester. Schmeichel kominn í skógarhlaup út úr teig, einhverra hluta vegna, en Niasse reyndi bara skot á autt markið en hitti fyrir hausinn á Schmeichel. Illa farið með gott færi. Stuttu síðar átti Lukaku hælspyrnu alveg upp við mark en varið í horn og Schmeichel sá svo aftur við honum á 58. mínútu þegar Lukaku átti skalla að marki eftir horn. En svo fjaraði þetta út aftur hjá Everton og Leicester tóku völdin á vellinum aftur.

Robles átti algjörlega frábæra vörslu frá Fuchs, sem komst einn upp að marki vinstra megin á 60. mínútu. Robles náði með fætinum að verja lágt skot frá Fuchs.

Tvöföld skipting hjá Everton á 65. mínútu: Gibson og Mirallas inn á fyrir Cleverley og Niasse og það átti eftir að draga dilk á eftir sér nokkrum mínútum síðar.

En fyrst náðu Leicester menn að bæta við marki. Vardy fékk stungusendingu á 63. mínútu gegnum vörn Everton. Hann var klárlega rangstæður þegar sendingin kom, eins og varnarmenn Everton gáfu til kynna og endursýning sýndi, en dómarinn ekki sammála. Pennington felldi hins vegar Vardy inni í teig og Vardy skoraði úr vítinu sem dæmt var. Vítið þótti reyndar vafasamt þar sem Vardy steig niður og lét sig síðan detta. Leit svolítið út eins og dýfa en hann var, eins og kunnugt er, nýkominn úr banni fyrir aðra dýfu var, að mínu mati, minni dýfa en þessi. Hvað um það, Vardy skoraði örugglega úr vítinu og staðan orðin 3-0 fyrir Leicester.

Lennon fékk dauðafæri stuttu síðar þegar Baines sendi glæsilega háa sendingu utan af velli. Boltinn fór yfir alla sem stóðu fyrir framan markið og beint til Lennon sem var á auðum sjó hægra megin en í fyrstu snertingu slice-aði hann boltann í dauðafæri og setti hann aftur fyrir markið.

Hinum megin varði Robles aftur úr dauðafæri, í þetta skiptið frá Vardy en Robles vann aldeilis fyrir kaupinu sínu í dag, þrátt fyrir að hafa fengið á sig þrjú mörk.

Það var ekki svo að Leicester menn þyrftu hjálp í leiknum en Gibson ákvað að gefa hana samt á 70. mínútu þegar hann tæklaði Leicester mann inni í teig. Mun augljósara brot en í fyrra vítinu en í þetta skiptið brást Vardy bogalistin þegar hann þrumaði boltanum yfir mark.

Oviedo átti stuttu síðar flott skot af löngu færi sem Schmeichel þurfti að slá í horn. Ullola svaraði með skalla rétt framhjá marki hinum megin og endurtók svo þann leik á 80. mínútu.

Pennington sýndi hins vegar hvers hann er megnugur með frábærri tæklingu á Vardy sem var í algjöru dauðafæri alveg upp við mark. Stáltaugar greinilega hjá þessum unga og efna miðverði.

Stuttu síðar var Barkley svo skipt út af fyrir Osman.

Þrátt fyrir afleitan leik hjá Everton endaði leikurinn hins vegar á jákvæðu nótunum fyrir bæði lið því Leicester voru krýndir meistarar eftir leikinn en ekki þó fyrr en eftir að Mirallas hafði lagað stöðuna örlítið fyrir Everton — með marki á 87. mínútu. Algjört einstaklingsframtak: Hann vann boltann af harðfylgi á vallarhelmingi Leicester, sólaði tvo inni í teig og komst alveg upp að marki og renndi honum framhjá Schmeichel. Staðan 3-1.

Og þannig endaði sá leikur.

Einkunnir Sky Sports: Robles (6), Baines (6), Stones (6), Pennington (5), Oviedo (6), McCarthy (6), Cleverley (5), Lennon (6), Niasse (5), Barkley (5), Lukaku (6). Varamenn: Gibson (5), Osman (5), Mirallas (6).