Liverpool – Everton 2-1

Mynd: Everton FC.

Þá er komið að fimmtu umferð ensku úrvalsdeildarinnar og hún hefst með derby leiknum, Liverpool – Everton, kl. 11:30 í dag. 

Fyrir leik var rætt um það að Branthwaite og Mykolenko væru frá, en þar sem Keane hefur átt flotta byrjun á tímabilinu hafði maður hafði eiginlega meiri áhyggjur af fjarveru Mykolenko, í vinstri bakvarðarstöðunni, og því að Garner þyrfti að vera spilaður úr stöðu til að leysa Myko af. En svo er þó ekki, því að Mykolenko er í byrjunarliðinu, sem þýðir að Garner getur fært sig ofar á völlinn, þar sem hann nýtur sín betur.

Uppstillingin: Pickford, Mykolenko, Keane, Tarkowski (fyrirliði), O’Brien, Gana, Garner, Grealish, Dewsbury-Hall, Ndiaye, Beto.

Varamenn: Travers, Aznou, Patterson, Coleman, Iroegbunam, Alcaraz, McNeil, Dibling, Barry.

Þetta lítur út fyrir að vera nokkurn veginn okkar sterkasta lið í augnablikinu (fyrir utan Branthwaite) og gott að sjá nokkuð jafnvægi á bekknum, en ekki tvo markverði og þrjá kjúklinga, eins og stundum hefur verið á undanförnum tímabilum.

Mjög gott að sjá þríeykið okkar, Grealish, Dewsbury-Hall og Ndiaye í framlínunni. Grealish þarf að halda línunni, ein stoðsending að meðaltali per leik.

Þetta verður annars krefjandi og erfiður leikur en Liverpool hafa verið að missa niður forystu í leikjum, þannig að þeir verða örugglega á nálum út leikinn hvernig sem staðan verður.

En þá að leiknum…

Liverpool meira með boltann og pressuðu meira. En það var lítið að frétta þangað til á 10. mínútu, þegar Liverpool komust yfir. Hófu sóknina á því að brjóta á Ndiaye við miðlínu þegar hann var að hefja skyndisókn, sendu yfir á Salah sem chippaði inn í teig og Gravenberch lyfti boltanum í fyrstu snertingu yfir Pickford og í hliðarnetið. 

Grealish lagði upp flott færi á 25. mínútu, þegar hann fór illa með varnarmann Liverpool og sendi frábæra stutta sendingu á Dewsbury-Hall, en skotið frá honum rétt fram hjá.

Liverpool refsuðu strax í næstu sókn. Stunga inn fyrir vörnina, og Ekitike kláraði það.

Ndiaye skapaði færi fyrir Beri á 35. mínútu, eftir að Allison átti lélega sendingu út úr teig, beint á hann. En sendingin var aftur fyrir Beto, sem náði því ekki að stýra honum á mark af stuttu færi. 

Rétt um lok venjulegs leiktíma fékk Gana fínt skotfæri, utan teigs. Náði að stýra honum á mark út við stöng hægra megin, en Allison varði. 

2-0 í hálfleik.

Beto út af fyrir Barry í hálfleik. Mun betra að sjá til Everton í seinni hálfleik.

Everton minnkaði muninn á 55. mínútu og það mark kom eftir sprett frá Grealish upp vinstri kantinn, þar sem hann sendi háan bolta fyrir á fjærstöng. Boltinn fór beint á Ndiaye, sem lagði hann fyrir Gueye, sem smellhitti boltann og setti hann í samskeytin uppi vinstra megin. 2-1, Game on!

Liverpool fengu fínt skallafæri á 71. mínútu, sem leit út fyrir að vera sitter fyrst, en endursýning sýndi að bæði Grealish og Pickford voru með þetta.

Dibling og Alcaraz komu svo inn á fyrir Mykolenko og Ndiaye á 86. mínútu.

Everton reyndi að sækja og Liverpool menn urðu taugaveiklaðari með hverri mínútunni og gerðu allt til að tefja í lokin, en þetta hafðist ekki í dag fyrir okkar menn.

2-1 tap niðurstaðan.

Einkunnir Sky Sports: Pickford (6), Mykolenko (6), Keane (6), Tarkowski (7), O’Brien (6), Garner (6), Grealish (8), Dewsbury-Hall (7), Ndiaye (6), Gueye (7), Beto (5). Varamenn: Barry (6).