Everton – Crystal Palace 2-1

Mynd: Everton FC.

Þá er komið að sjöttu umferð ensku úrvalsdeildarinnar en kl. 14:00 mætir Everton Crystal Palace á Goodison Park.

Uppstillingin: Pickford, Mykolenko, Branthwaite, Tarkowski (fyrirliði), Young, Mangala, Doucouré, Ndiaye, McNeil, Lindström, Calvert-Lewin.

Varamenn: Virginia, Keane, O’Brien, Gana, Garner, Iroegbunam, Armstrong, Harrison, Beto.

Eitthvað virðist vera að létta til hvað meiðslastöðuna varðar, en Branthwaite fer beint inn í byrjunarliðið og tekur stöðu Keane í miðverðinum. Þetta verður því fyrsti leikur Branthwaite á tímabilinu og liðið hefur saknað hans ansi mikið. Ndiaye á vinstri kanti, McNeil í holunni og Lindström á hægri kanti. Doucouré og Mangala á miðjunni hjá Everton.

Fjörug byrjun á leiknum, en án færa þangað til á 10. mínútu, þegar Crystal Palace menn fengu horn hægra megin (frá þeim séð). Hár bolti barst á fjærstöng þar sem Doucouré tapaði skallaeinvígi við Palace mann sem náði að skalla aftur fyrir mark þar sem Guéhi, fyrirliði Palace, var á réttum stað til að pota boltanum framhjá Pickford og í netið. Staðan orðin 0-1 fyrir Palace.

McNeil skapaði færi fyrir Calvert-Lewin á 24. mínútu, sendi fastann bolta þvert fyrir mark frá vinstri en Calvert-Lewin náði ekki að pota boltanum í netið af stuttu færi.

Á 26. mínútu fengu Palace menn horn, tekið af sama stað og með sama hætti og næstum búnir að skora annað alveg eins mark en Ndiaye bjargaði á línu.

Mykolenko átti svo háa sendingu fyrir mark á 37. mínútu og McNeil var óvaldaður en náði ekki góðum skalla.

Palace menn náðu að skapa svolítinn usla í teig Everton en færin urðu ekki fleiri í fyrri hálfleik. Crystal Palace með undirtökin í fyrri hálfleik og 1-0 forystu. Slakur fyrri hálfleikur hjá okkar mönnum. 

Maður vonaðist eftir breytingu á spili Everton og sú ósk rættist heldur betur. Dyche gerði eina breytingu í hálfleik — Harrison inn á fyrir Lindström. Og það var allt annað að sjá til þeirra í öllum hálfleiknum.

Eftir aðeins 80 sekúndur af seinni hálfleik var Everton búið að jafna! Dwight McNeil fékk boltann hægra megin við D-ið, lagði hann fyrir sig og sendi boltann með vinstri fætinum í sveig alveg út við fjærstöng vinstra megin. Geggjað mark! Óverjandi fyrir Dean Henderson í marki Palace! Merkilegt nokk þá var þetta fyrsta skot Everton á rammann og staðan orðin 1-1!

Og McNeil var síður en svo hættur! Á 54. mínútu sendi Harrison frábæra sendingu frá hægri, þar sem McNeil lúrði á fjærstöng. Varnarmaður náði reyndar að blokkera sendinguna en fyrsta snertingin hjá honum slæm og hann lagði upp boltann smekklega fyrir McNeil, sem þakkaði fyrir sig með þrumuskoti í netið! 2-1 fyrir Everton! Tvö skot á rammann og tvö í netið! Meira svona!!

Crystal Palace menn áttu engin almennileg svör og náðu ekki að setja almennilega pressu á Pickford í seinni hálfleik. Everton líklegra liðið til að bæta við en að fá á sig mark.

Til dæmis á 81. mínútu þegar Calvert-Lewin setti boltann í hlaupaleiðina hjá Doucouré, sem komst einn á móti markverði, en varnarmaður Palace náði að hlaupa hann uppi og pota boltanum frá áður en Doucouré náði skoti. Illa farið með gott færi. Þar hefði staðan átt að vera 3-1.

Tvöföld skipting á 83. mínútu, McNeil og Mangala út af fyrir Garner og Gueye.

En það var lítið annað að frétta — og fyrsti sigur Everton því í höfn! „Comback“ sigur að auki, það er sætt.

Aðeins þrjú stig í liðin á miðsvæðinu. Skjótt skipast veður í lofti. Þess má auk þess geta að Everton hefur nú, skv. þuli, spilað 20 leiki í röð gegn Palace og aðeins tapað einum.

Einkunnir Sky Sports: Pickford (6); Young (7), Tarkowski (7), Branthwaite (7), Mykolenko (7); Mangala (7), Doucoure (7); Lindstrom (6), McNeil (9), Ndiaye (7); Calvert-Lewin (6). Varamenn: Harrison (7), Gueye (6), Garner (6).

Maður leiksins að mati Sky Sports var Dwight McNeil.