Sheffield Utd – Everton 2-2

Mynd: Everton FC.

Þá er komið að fjórðu umferð tímabilsins í ensku Úrvalsdeildinni og í þetta skiptið fer Everton í heimsókn til nýliða Sheffield United, en þeir komust upp úr Championship deildinni með því að enda í öðru sæti (á eftir Burnley) — og þurftu því ekki umspil.

Góðar fréttir bárust af því að McNeil og Calvert-Lewin væru byrjaðir af æfa aftur eftir meiðsli en erfitt er að segja hvort Dyche taki sénsinn á þeim svona snemma. Spurning líka hvort Gray detti ekki bara inn í hópinn aftur þar sem það virðist sem samningaviðræður hans við liðið frá Saudi-Arabíu hafi fallið niður.

Uppstilling: Pickford, Young, Branthwaite, Tarkowski (fyrirliði), Patterson, Gana, Danjuma, Onana, Doucouré, Garner, Beto.

Varamenn: Virginia, Lonergan, Mykolenko, Godfrey, Onyango, McNeil, Chermiti.

Uppstillingin var eins og ég spáði fyrir leik og varamannabekkurinn nákvæmlega eins líka, fyrir utan það að í færslu Everton kom fram að eingöngu 7 verma varamannabekkinn en ekki þessir hefðbundnu 9, sem er áhyggjuefni. Ætli það þýði að Keane og Dobbin séu meiddir?

4-1-4-1 uppstilling með Danjuma á vinstri kanti, Garner á hægri og Beto frammi, að sjálfsögðu.

Það var ákefð og einbeiting í leik Everton frá upphafi og þeir settu góða pressu á vörn Sheffield United. Fyrsta færið var þó Sheffield United megin — skalli á mark eftir aukaspyrnu en beint á Pickford. Lítil hætta.

Beto fékk fyrsta færi Everton á 14. mínútu, skotfæri við D-ið en boltinn breytti stefnu af öxl varnarmanns og fór því rétt framhjá stöng og í horn. Upp úr horninu náði Onana flottum skalla á mark sem Doucouré náði að breyta stefnu á. Markvörður Sheffield United náði að kasta sér á það og rétt svo að slengja hendi í boltann, með undraverðum hætti, en það lagði bara boltann aftur fyrir Doucouré sem skoraði auðveldlega af stuttu færi. 0-1 fyrir Everton. Endursýning sýndi líka að víti var gulltryggt ef Doucouré hefði ekki skorað, því varnarmaður Sheffield var í glímubrögðum við hann og togaði í treyjuna þegar hann missti af Doucouré inni í teig.

Sheffield United menn færðu sig ofar á völlinn við markið og það opnaði á skyndisókn Everton á 17. mínútu, þar sem þeir komust fjórir á móti tveimur. Danjuma brunaði með boltann inn í vítateig og reyndi að leika á varnarmann og skjóta en varnarmaður sá við honum, skriðtæklaði fyrir skotið og reddaði Sheffield United. Þarna hefði staðan átt að vera 0-2. Það á ekki að vera hægt að klúðra fjórum á tvo stöðunni svona auðveldlega.

Sheffield United menn komust inn í sendingu frá Gueye á 19. mínútu og sóknarmaður þeirra náði að bruna inn í teig en skotið slakt. Engin hætta. Þeir gerðu hins vegar betur á 20. mínútu þegar þeir reyndu skot af löngu færi, alveg niðri hægra megin (frá þeim séð) út við stöng en Pickford gerði vel, kastaði sér niður og varði glæsilega í horn.

Everton fékk hins vegar að gjalda fyrir það að hafa ekki bætt við mörkum (ekkert nýtt þar) þegar Sheffield United jöfnuðu á 33. mínútu. Hár bolti frá hægri á þeirra fremsta mann, sem var með tvo í sér, en lagði hann upp fyrir sóknarmanninn Archer sem var utar í teignum, óvaldaður, og hann þrumaði inn út við hægri stöngina. Staðan orðin 1-1. Þess má geta að þetta var fyrsti leikur Archer með Sheffield United eftir að hafa komið til þeirra frá Aston Villa.

Everton komst oft í ákjósanlega stöðu í sóknarleik sínum, til dæmis vinstra megin á 44. mínútu þegar Danjuma komst einn inn í teig og upp að marki, en missti boltann aðeins of langt frá sér og markvörður náði að kasta sér á boltann. 

En þetta er búið að vera sagan á þessu tímabili, Everton veður í færum en á erfitt með að nýta sér það. Og ógæfan skall yfir — enn á ný — hinum megin vallar, rétt fyrir lok venjulegs leiktíma í fyrri hálfleik. Aftur var nýi maður þeirra, Archer, að verki þegar hann reyndi skot af löngu færi sem fór í innanverða hægri stöngina og út aftur, í bakið á Pickford, sem lá í grasinu. Boltinn hrökk af honum og þaðan í netið, að sjálfsögðu. Ótrúlegur grís. Everton búið að vera mikið betra sóknarlega og áttu að vera tveimur til þremur mörkum yfir á þeim tímapunkti, en í staðinn lenda þeir einu marki undir.

2-1 í hálfleik.

Dyche hefur aldeilis lesið yfir hausamótunum á sínum leikmönnum, því Everton byrjaði seinni hálfleik af miklum krafti og ákefð. Þulirnir töldu fimm tilraunir á mark frá Everton fyrsta korterið — ekki viss, en færin voru allavega ekki dauðafæri.

Beto setti Danjuma inn fyrir vörnina strax í upphafi hálfleiksins, með flottri hælspyrnu fyrir hlaupaleiðina hjá Danjuma. Varnarmaður Sheffield var heppinn að gefa ekki víti þegar hann togaði Danjuma niður — gult spjald og aukaspyrna dæmd rétt utan teigs. Ekkert kom úr henni, hins vegar.

Jöfnunarmark Everton kom hins vegar á 54. mínútu, og það var einfaldlega ekkert minna en Everton átti skilið. Beto fann Patterson sem kom hlaupandi upp hægri kant og Patterson setti geggjaðan bolta fyrir á fjærstöng, þar sem Danjuma var mættur og þrumaði inn. 2-2. Game on!

Það kom smá skrekkur á 58. mínútu þegar Patterson náði ekki að hreinsa út úr teig og boltinn fór beint á leikmann Sheffield, en sóknarmaður Sheffield hitti boltann illa í skotinu utarlega í teig vinstra megin, og boltinn fór hátt yfir markið.

Everton hélt áfram að leika sér að eldinum á 70. mínútu þegar bakvörður Sheffield United komst á sprettinn upp vinstra megin inn í teig, fékk háa sendingu og þrumaði á mark en Pickford náði að koma út á móti honum,loka markinu og varði glæsilega.

McNeil kom inn á fyrir Garner á 75. mínútu. Fyrsti leikur McNeil á tímabilinu — gott að fá hann til baka, enda mikilvægur hlekkur í liðinu.

Varnarmaður Sheffield United sparkaði niður Onana, rétt utan teigs á 78. mínútu. Young tók aukaspyrnuna en beint á markvörð. Engin hætta.

Hvorugt lið var hins vegar sátt við stigið og börðust til loka. Andrúmsloftið var mjög taugaveiklað á vellinum þar sem eitt mark, öðru hvoru megin, myndi líklega tryggja þrjú stig. En ekki gerðist það í dag og liðin þurftu því að sætta sig við jafntefli.

Godfrey kom inn á fyrir Tarkowski rétt eftir lok leiks. McNeil reyndi skot af löngu færi. Ekkert annað markvert þar. Jú, reyndar — 6 mínútum var bætt við leikinn og þegar komið var _þremur_ mínútum fram yfir það (!) fengu Sheffield United hornspyrnu. Pickford kom Everton þar aldeilis til bjargar þar með geggjaðri tvöfaldri vörslu. Varði skalla upp í neðanverða slána og út og tók svo seinni tilraunina sem var af mjög stuttu færi með því að verja í stöngina (fékk líklega boltann frekar í andlitið en nokkuð annað, en það gildir alveg jafn mikið). 

2-2 niðurstaðan. 

Einkunnir Sky Sports: Pickford (7); Patterson (7), Tarkowski (6), Branthwaite (5), Young (6); Gueye (6), Doucoure (7), Onana (7); Garner (7), Beto (8), Danjuma (7). Varamenn: McNeil (6).