Nýr völlur — uppfærsla

Mynd: Everton FC.

Blaðið Independant greindi frá því nýverið að vinna við byggingu nýs vallar fyrir Everton myndi hefjast innan 12 mánaða. Farhad Moshiri, einn eigandi Everton, heimsótti svæðið í síðasta mánuði og hefur verið í viðræðum við eigendur Bramley Moore Dock svæðisins um kaup á landskikanum þannig að skriður virðist kominn á málið. Þetta yrði mjög flott staðsetning í hjarta Liverpool City, nálægt miðbænum og í sæmilega góðu göngufæri frá því hóteli sem við gistum venjulega á í Íslendingaferðunum.

Ekki er búið að hanna nýja leikvanginn, svo við vitum, en þó búið að velja arkitektinn sem hitti forráðamenn Everton í vikunni. Hönnunin hér að ofan sýnir King’s Dock leikvanginn sem hætt var við á sínum tíma — sem minnir okkur á að það er ekkert í hendi enn sem komið er. En nú eru þó aðrir tímar og fjárráðin meiri þannig að líkurnar á að þetta verði að veruleika hafa aukist til muna.

Áhorfendafjöldinn á leiki Everton og sala ársmiða hefur aukist ár frá ári og löngu kominn tími til að stækka við sig, enda uppselt á nánast alla — ef ekki alla — leiki Everton núna og búið að vera þannig um nokkurt skeið. Við krossleggjum því fingur og vonum það besta en völlur við hafnarbakkann myndi verða flott kennileiti á borginni og verður það fyrsta sem ferðamennirnir sjá í Liverpool þegar þeir mæta á skemmtiferðaskipunum. Völlurinn ætti jafnframt að sjást vel á loftmyndum af borginni og gera þannig Everton vörumerkið enn sýnilegra út um allan heim.