Everton – Man United 3-0

Mynd: Everton FC.

Þrátt fyrir blíðskaparveður í nágrenni Goodison Park sáu leikmenn Manchester United aldrei til sólar í þessum leik, enda Everton grimmari, ákveðnari og mun beittari í sínum sóknaraðgerðum og sigurinn aldrei í hættu. Everton liðið jafnframt líklegra til að bæta við en fá á sig mark.

Martinez stillti þessu svona upp: Howard, Baines, Stones, Jagielka, Coleman, Barry, McCarthy, Osman, Barkley, Lennon, Lukaku. Varamenn: Robles, Garbutt, Alcaraz, Besic, Mirallas, Naismith, Kone.

Fyrir leik var stutt minningarathöfn og einnar mínútu þögn um Sir Phillip Carter sem titlaður var „Club President for Life“ hjá Everton og lést á dögunum en svo flautaði dómarinn til merkis um að leikur væri hafinn.

Taktík Everton var augljós frá upphafi, liggja djúpt og leyfa United að dóla með boltann en sækja hratt um leið og færi gæfist. Og það skilaði árangri strax á 4. mínútu þegar United fengu horn en okkar menn unnu boltann og keyrðu hratt upp völlinn. Þetta féll allt með okkur í þeirri sókn. Lukaku vann skallaeinvígi, framlengdi á Coleman sem reyndi fyrirgjöf frá hægri en boltinn fór í hælinn á McNair og út við miðjan teig og barst þar til McCarthy sem kom á hlaupinu og sólaði tvo United menn (McNair og Blind). Komst einn upp að endamörkum og setti hann gegnum klofið á Gea sem kom á hlaupinu á móti honum. 1-0 Everton!

Fellaini var næstum búinn að jafna strax þegar hann braut á Barry, sem var aftastur, stal af honum boltanum og komst einn upp að marki… en skotið afleitt – yfir markið og uppskar hlátur frá Gwlady’s stúkunni fyrir vikið. Besta færi United í hálfleiknum og eiginlega eina almennilega færi þeirra fyrir hlé.

Blind átti skot af löngu á 10. mínútu en lítill kraftur og beint á Howard. Níu mínútum síðar áttu þeir svo skalla á markið eftir aukaspyrnu en aftur beint á Howard.

Lukaku svaraði með skoti af löngu færi á 27. mínútu — beint á De Gea en svo bætti Everton við öðru marki á 34. mínútu. Everton liðið fékk þá þrjár hornspyrnur í röð og úr þeirri þriðju stakk Stones varnarmann af, hljóp á nærsvæðið og skallaði í fjærhornið. 2-0 Everton!

Barkley fékk ákjósanlegt skotfæri af löngu eftir sendingu frá Lennon en skaut yfir. 2-0 í hálfleik. Everton með boltann tæp 40% en með fjögur skot sem rötuðu á rammann á móti tveimur frá Man United.

Falcao inn fyrir Fellaini í hálfleik, engin breyting hjá Everton.

United menn voru ekki langt frá því að minnka muninn strax í upphafi seinni hálfleiks þegar boltinn barst til Rooney sem var á auðum sjó, einn á móti markverði en Howard gerði gríðarlega vel að gera sig breiðan og loka á hann. Besta færi United í öllum leiknum og nánast eina almennilega færi þeirra í seinni hálfleik.

Lukaku átti stuttu síðar frábæra fyrirgjöf frá vinstri eftir að hafa stungið Valencia af og komist upp að endalínu en enginn samherji mættur til að pota inn á fjærstöng.

Mirallas kom inn á fyrir Osman á 68. mínútu og hann átti aldeilis eftir að setja mark sitt á leikinn.

Falcao átti reyndar fyrst skalla aftur fyrir sig (á mark) eftir langa fyrirgjöf fram. Hann gerði þar ráð fyrir að Howard myndi hlaupa á móti og ætlaði að setja boltann yfir hann. Howard hins vegar vel staðsettur, bakkaði aðeins og greip bara boltann.

En þá var komið að Mirallas — á 74. mínútu. Barkley reyndi langa sendingu fram á Lukaku en sá síðarnefndi augljóslega rangstæður. Lukaku hafði þó vit á að stoppa og láta boltann vera til að hafa ekki áhrif á leikinn en einhverra hluta vegna stoppuðu allir, héldu greinilega að dómarinn væri að fara að dæma óþarfa rangstæðu. Allir nema Mirallas, þeas, sem fékk þar með frítt færi, sótti boltann, hljóp upp að marki og lagði hann auðveldlega framhjá De Gea. 3-0 fyrir Everton.

Falcao náði loks að koma tuðrunni í netið fyrir United á 81. mínútu en augljóslega rangstæður í undirbúninginum þegar boltinn barst og dómarinn því ekki í vafa. Ekkert mark.

Mirallas var svo ekki langt frá því að bæti við öðru marki með glæsilegu skoti utan af velli sem De Gea sló yfir markið á lokamínútunum.

Kone og Naismith komu inn á fyrir Lukaku og Barkley á 86. mínútu en Everton landaði þessum sigri nokkuð auðveldlega. 16 stig af síðustu 18 mögulegum í höfn. Martinez hlýtur að vera í harðri samkeppni um titilinn stjóra mánaðar eftir þessa leikjahrinu.

Einkunnir Sky Sports: Howard 7, Baines 8, Stones 8, Jagielka 7, Coleman 8, McCarthy 9, Barry 7, Barkley 8, Lennon 7, Osman 7, Lukaku 7. Varamenn: Kone 7, Mirallas 8, Naismith 7. United fengu 6 niður alla línuna, fyrir utan Blind og Valencia sem fengu 5 og Luke Shaw sem fékk 7.