Jordan Pickford keyptur – STAÐFEST

Mynd: Everton FC.

Klúbburinn staðfesti í dag að hafa náð samkomulagi við Sunderland um kaup á aðalmarkverði þeirra, Jordan Pickford, sem er 23ja ára og er nú samningsbundinn Everton til júní 2022. Kaupverðið er 25M punda + 5M punda að ákveðnum skilyrðum uppfylltum (árangurstengt bæði liði og leikmanni) sem myndi gera Pickford að dýrasta breska markverðinum frá upphafi og þriðji dýrasta markverði í heimi (á eftir Gianluigi Buffon og Ederson). Ýmsir hafa tjáð sig um kaupin…

Pickford var einn af mjög fáum ljósum punktum við tímabil Sunderland en skv. OptaJoe var Pickford með flestar markvörslurnar í Úrvalsdeildinni á síðasta tímabili eða 4.7 vörslur per leik. Hann gat þó ekki einn síns liðs komið í veg fyrir að þeir féllu niður í Championship deildina.

Pickford hefur leikið með öllum unglingalandsliðum Englands, allt frá U16 til U21 og er nú með enska U21 landsliðinu. Þetta mun væntanlega enda sögusagnir um að Joe Hart sé á leiðinni til Everton.

Hér eru allar vörslurnar í einum leik gegn Arsenal:

Sæmilegt distribution skill líka…

Við kíktum af gamni á tölfræðina yfir markverði í Úrvalsdeildinni en skv. þessari var Pickford með næst flestar vörslurnar (135) á síðasta tímabili. Aðeins Tom Heaton hjá Burnley var með _örlítið_ fleiri vörslur (143 vs 135) en kaup á Heaton væru ekki framtíðarkaup því hann er 31 árs gamall (Pickford er 23ja). Nú gæti einhver bent á að það sé ekki að marka þá tölfræði þar sem Sunderland fengu á sig ógrynni af skotum enda með hripleka vörn. En þegar horft er á (úr sömu tölfræði) varin skot sem hlutfall af skotum sem rata á rammann þá lítur þetta svona út:

1. Hugo Loris	76.24%	(Tottenham, 30 ára)
2. Petr Cech	76.00%	(Arsenal, 35 ára)
3. Tom Heaton	75.66%	(Burnley, 31 árs)
4. Lee Grant	73.17%	(Stoke, 34ra ára)
5. David De Gea	71.84%	(United 26 ára)
6. Jordan Pickford	71.43%	(23ja ára)

Sem sagt, á sínu fyrsta heila tímabili í Úrvalsdeildinni er Pickford í 6. sæti og á pari við David De Gea hvað þessa tölfræði varðar. Hann er jafnframt með betra hlutfall en til dæmis markvörður Englandsmeistara Chelsea, Thibaut Courtois (sem er með 69.70% í 8. sæti). Til samanburðar má nefna að af öðrum liðum sem enduðu fyrir ofan Everton er Liverpool með sína markverði í 19. og 23. sæti (Mignolet með 63.41% og Karius með 62.50%) og City með sína í 10. og 29. sæti (Caballero með 68.89% og Bravo með 55.00%). Gaman að þessu.

Velkominn Jordan Pickford!

(PS. Markmenn með 5 leiki eða færri voru ekki teknir með í útreikningunum)