Everton – Newcastle 1-4

Mynd: Everton FC.

Það kemur í hlut Newcastle að mæta í heimsókn í dag á Hill Dickinson leikvanginn, í 13. umferð ensku úrvalsdeildarinnar. Af gestunum er það helst að frétta að útivallarform þeirra hefur verið afleitt á tímabilinu en þeir hafa tapað síðustu fjórum útileikjum í öllum keppnum og ekki tekist að vinna einn einasta útileik á tímabilinu í úrvalsdeildinni (þrjú 0-0 jafntefli og þrjú töp). Að sama skapi hefur heimaleikjaform Everton verið mjög gott, fjórir sigrar, tvö jafntefli og eitt tap. Það verður fróðlegt að sjá hvernig þetta fer.

Hjá okkar mönnum er Gana í leikbanni eftir rauða spjaldið sem hann fékk gegn United, en Patterson, Coleman og Branthwaite eru frá vegna meiðsla.

Uppstillingin: Pickford, Mykolenko, Keane, Tarkowski (fyrirliði), O’Brien, Iroegbunam, Garner, Grealish, Dewsbury-Hall, Ndiaye, Barry.

Varamenn: Travers, King, Welch, Campbell, Aznou, Alcaraz, McNeil, Dibling, Beto.

Barry leiðir línuna enn á ný og Iroegbunam og O’Brien koma inn í liðið fyrir Gana og Coleman.

Newcastle byrjuðu leikinn með miklum látum, náðu fyrsta skotinu í mark eftir skyndisókn og skoruðu svo úr horninu sem þeir fengu. 0-1 fyrir Newcastle eftir aðeins 58 sekúndur!

Það tók Everton um tíu mínútur að komast í takt við leikinn, þegar Keane náði flottu skoti á mark, eftir góðan undirbúning frá Tarkowski, sem tók boltann niður með kassanum. En Newcastle menn voru heppnir að ná að slengja fæti í boltann, því að Keane smellhitti boltann, sem var á leið á rammann. 

Everton meira með boltann eftir markið og sífellt að leita að glufum, en Newcastle menn vörðust vel.

Þeir fengu svo eina sókn á 25. mínútu þar sem þeir náðu að skjóta á mark við D-ið á vítateignum og boltinn skoppaði óþægilega fyrir framan Pickford, sem sló hann einhvern veginn undir sig, gegnum klofið og boltinn fór þaðan í netið. 0-2 fyrir Newcastle. Pickford, sem yfirleitt stendur sig mjög á móti Newcastle, ekki að gera gott mót þar.

Og Newcastle bættu við marki rétt fyrir hálfleik, eftir skyndisókn. Iroegbunam ekki nógu aggressívur í varnarvinnunni og náði ekki að stoppa skyndisóknina upp kantinn og sóknarmaður Newcastle, Woldemort, fékk boltann og vippaði yfir Pickford. 0-3 fyrir Newcastle.

Og þannig var það í hálfleik. Alcatraz inn á í hálfleik fyrir Iroegbunam.

Everton fékk flott tækifæri á 53. mínútu, þegar þung sókn Everton endaði á því að Alcaraz náði föstu skoti af nokkuð löngu færi, sem fór í slána og út. Newcastle menn heppnir þar. Og þeir sluppu aftur með skrekkinn stuttu síðar þegar Everton hefði getað fengið víti eftir horn, þegar boltinn fór í höndina á Barnes áður en hann hreinsaði, en dómarinn horfði framhjá því. Ekkert að því, svo sem, svo lengi sem sama gildir um bæði lið — sem átti eftir að koma í ljós að gilti ekki.

Barnes fékk upplagt færi vinstra megin í teig, sem Pickford varði. En þeir komu boltanum í netið skömmu síðar. Ekki góður vinnudagur hjá okkar mönnum í dag. Allt gekk upp hjá Newcastle í kvöld.

Barry skoraði svo óvænt — aftur ólöglegt mark — á 64. mínútu, sem var dæmt af. Greyinu er bara fyrirmunað að skora sitt fyrsta mark fyrir félagið. Ég vil reyndar setja mjög stórt spurningarmerki við það að markið skyldi vera dæmt af, því einn vinkill sýndi að boltinn hefði farið í hausinn á honum fyrst og svo hendina, sem á ekki að dæma hendi á. En Everton fékk ekki að njóta vafans eins og Newcastle stuttu áður.

Everton skoraði svo eiginlega óvænt mark á 68. mínútu, þegar Dewsbury-Hall var mættur fremstur og fékk háan bolta til sín, átti algjörlega sturlaða fyrstu snertingu, lagði boltann fyrir sig og potaði boltanum framhjá markverði. Varnarmenn Newcastle gátu ekki annað en að horfa á tilþrifin. Staðan orðin 1-4.

Pickford kom okkar svo mönnum til bjargar þegar hann varði úr dauðafæri Newcastle manns á 78. mínútu. Eins gott, því annars hefði þetta litið ansi illa út… heh…

Ndiaye og Grealish fóru svo út af fyrir Dibling og McNeil og Barry vék fyrir Beto stuttu síðar, en það breyttist lítið.

1-4 niðurstaðan og kannski best að lýsa þessum leik sem andlausum og máttlausum. Ekki góður vinnudagur hjá okkar mönnum og arfaslakt tap því niðurstaðan.

Ekki það að Newcastle hafi svo sem átt þriggja marka forystu skilið en það er heldur ekki hægt að fullyrða að Everton hafi átt neitt skilið úr þessum leik.

Einkunnir Sky Sports ekki komnar. Uppfæri síðar.