Everton – Brighton 2-0

Mynd: Everton FC.

Brighton fengu þann heiður að vera fyrsta úrvalsdeildarliðið sem mætti í heimsókn á Hill Dickinson völlinn, stolt Liverpool borgar, í annarri umferð ensku úrvalsdeildarinnar í dag, en flautað var til leiks kl. 13:00 að íslenskum tíma.

Uppstillingin: Pickford, Garner, Keane, Tarkowski (fyrirliði), O’Brien, Gana, Iroegbunam, Ndiaye, Dewsbury-Hall, Grealish, Barry.

Varamenn: Travers, Coleman, Aznou, Armstrong, Onyango, McNeil, Alcaraz, Chermiti, Beto.

Grealish var á vinstri kantinum, Ndiaye á þeim hægri og Garner í vinstri bakverði, en annað hefðbundið. Andrúmsloftið var gott á vellinum, mikið sungið og trallað og aðsóknin afar góð á þessum fyrsta heimaleik Everton á Hill Dickinson, en 51.759 áhorfendur voru á vellinum, skv. BBC.

Fyrsta skotið á mark kom frá Brighton á 12. mínútu, skot við D-ið en auðvelt fyrir Pickford að grípa. Mitoma fékk betra tækifæri á 18. mínútu, þegar hann náði að losa sig við báða miðverðina okkar inni í teig og skjóta á mark. Boltinn í ofanverða slána og út af, en hann snerti boltann með hendi í aðdragandanum, þannig að VAR hefði snúið því við… líklegast, annars veit maður aldrei þessa dagana. En aðeins mínútu síðar komust þeir í dauðafæri upp við mark, þegar Welbeck fékk sendingu fyrir framan markið, og sem betur fer kom sendingin aðeins aftur fyrir hann, þannig að í stað þess að pota inn af stuttu færi skóflaði hann boltann vel yfir slána.

Viðvörunarbjöllurnar farnar að hringja en Everton brást rétt við og komust yfir á 22. mínútu. Markið kom upp úr skyndisókn þar sem langur bolti var sendur fram á Barry, sem hélt honum vel og kom honum svo í leik. Leikmenn Everton voru snöggir að láta boltann ganga upp völlinn, Ndiaye á Gana sem sendir á Dewsbury-Hill og hann framlengdi á Grealish, sem kom honum inni í teig vinstra megin. Þar náði hann frábærri sendingu yfir á fjærstöng hægra megin, framhjá markverði, þar sem Ndiaye kom á hlaupinu og þurfti bara, upp við mark, að pota boltanum í autt netið. Staðan orðin 1-0 fyrir Everton! Ndiaye þar með aftur að skrifa sig í sögubækurnar, í þetta skipti með fyrsta markið á nýja leikvanginum — og Grealish með fyrstu stoðsendinguna.

Iroegbunam fékk fínt skotfæri utan teigs á 34. mínútu, við D-ið, en skaut framhjá stönginni vinstra megin, frá honum séð.

Á 38. mínútu náði nr. 6 hjá Brighton föstu skoti af löngu færi, sem breytti um stefnu af varnarmanni Everton og fór í innanverða stöngina og út aftur. Lukkan með Everton í það skiptið. Á 45. mínútu var lukkan aftur með Everton þegar Tarkowski sendi slaka sendingu aftur á Pickford sem sóknarmaður Brighton komst inn í og þar með í dauðafæri einn á móti Pickford. Reyndi að fara framhjá honum vinstra megin og skjóta í netið en Pickford las þetta hárrétt og náði að loka á hann og verja. 

Staðan 1-0 fyrir Everton í hálfleik.

Á 52. mínútu skoraði Everton annað mark sitt í leiknum og þar var að verki James Garner með þrumuskoti utan teigs sem fór inn alveg við stöngina, eftir flottan undirbúning frá liðsfélögum, sem unnu sig upp hægri kantinn og Jack Grealish lagði lokahönd á það með stoðsendingu. Glæsimark hjá Garner.

Á 59. mínútu náðu Brighton menn föstu skoti á mark utan teigs, sem Pickford sá seint, því það fór í gegnum klofið á Tarkowski. En, Pickford var vandanum vaxinn.

Beto og Alcaraz komu inn á fyrir Barry og Ndiaye á 62. mínútu og stuttu síðar, eða á 71. mínútu, kom McNeil inn á fyrir Iroegbunam.

Á 75. mínútu fengu Brighton víti þegar Dewsbury-Hall varði boltann með hendi inni í teig. Annar leikurinn í röð sem andstæðingurinn fær víti en líklega sanngjarn dómur í þetta skiptið, ólíkt því síðasta. En lukka Everton hélt áfram, því Pickford giskaði á rétt horn og varði vítið frá Welbeck!

Grealish setti upp flott skotfæri á 85. mínútu þegar hann hljóp í átt að endalínu vinstra megin og sendi lága sendingu aftur út í teig, beint á McNeil en hann náði ekki góðu skoti. Ef hann hefði náð að skora hefði Grealish farið frá leiknum með stoðsendingarþrennu. Boltinn barst hins vegar til Beto sem reyndi skot eftir snúning, en setti boltann framhjá. Tvö fín tækifæri til að komast í þriggja marka forystu. Stuttu síðar reyndi McNeil aftur skot á mark en setti boltann í hliðarlínuna. 

Sjö mínútum var bætt við og á 93. mínútu skipti Moyes Armstrong inn á fyrir Grealish en fleiri urðu færin ekki.

2-0 sigur í höfn í fyrsta heimaleiknum á Hill Dickinson.

Einkunnir Sky Sports: Pickford (7), O’Brien (6), Tarkowski (5), Keane (6), Garner (7), Gueye (6), Iroegbunam (7), Dewsbury-Hall (6), Ndiaye (7), Grealish (8), Barry (6). Varamenn: Beto (6), Alcaraz (6), McNeil (5).

Maður leiksins, að mati Sky Sports, var Jack Grealish.