Bournemouth – Everton 2-1

Mynd: Everton FC.

Everton átti leik við Bournemouth á útivelli kl. 15:00 í dag, en þetta var 29. leikur Everton í ensku úrvalsdeildinni á tímabilinu. Aðeins níu leikir eftir.

Ritari var því miður á ferðalagi í augnablikinu en bræðurnir Elvar og Georg tóku að sér skýrsluna og við kunnum þeim bestu þakkir fyrir!

Uppstillingin: Pickford, Godfrey, Branthwaite, Tarkowski, Coleman (fyrirliði), McNeil, Onana, Garner, Harrison, Doucouré, Calvert-Lewin.

Varamenn: Virginia, Keane, Patterson, Young, Gana, Gomes, Chermiti, Warrington, Beto.

Gefum meisturunum orðið…

Fyrri hálfleikur var mjög jafn, mikið af mistökum hjá báðum liðum í uppbyggingu á sóknum og gekk frekar illa að koma sér í almennileg færi. Besta færi Everton í fyrri hálfleik kom á 32. mínútu þegar Pickford átti markspyrnu, sparkaði fram og Tarkowski setti hann til baka á Calvert-Lewin sem átti fínt skot, sem Neto varði vel í markinu. Besta færi Bournemouth í fyrri hálfleik var rétt fyrir lok fyrri hálfleiks, þegar þeir áttu skot í stöng eftir mikið klafs í teignum.

Staðan í hálfleik 0-0.

Bournemouth byrjaði seinni hálfleik aðeins betur en Everton. Everton var þó ansi nálægt því að komast yfir á 59. mín þegar Everton átti horn sem McNeil tók, Harrison fór framhjá varnarmannni Bournmouth og setti boltann í innanverða stöngina framhjá Neto í markinu, en boltinn fór af leikmanni Bournmouth og framhjá.

Það var svo á 64. mín sem Bournmouth skoraði eftir skyndisókn þar sem Kelly sendi hann inn í á Solanke sem gerði vel og skallaði hann í markið, Tarkowski hefði mátt vera betur staðsettur. Staðan 1-0 fyrir Bournemouth.

Seinni hálfleikur var að miklu leiti eins og sá fyrri þar sem bæði lið áttu í erfiðleikum með að klára sóknaruppbyggingu.

Það var svo á 87. mín sem McNeil á sendingu inn í, Neto gerir illa í markinu og missir boltann úr höndunum og Beto gerði vel, nýtti sér mistök Neto og setti boltann í netið af stuttu færi. Staðan 1-1 og lítið eftir.

Allt stefndi í 1-1 jafntefli en á 91. mínútu komst Bournmouth í 2-1, þeir áttu sendingu inn í teig, sem lendir hjá Coleman sem ætlaði líklega að kassa hann á Pickford en fer ekki betur en svo en hann setur hann í eigið net. Bournemouth því komið í 2-1.

Það fór að lokum svo að sjálfsmark Coleman var það síðasta marktæka í leiknum og gríðarlega svekkjandi tap því niðurstaðan.

Sem betur fer tapaði Luton sínum leik sem var 0-1 yfir gegn Tottenham í hálfleik og Nottingham Forest gerði jafntefli. Everton því 3 stig fyrir ofan fallsæti og á leik til góða.

Nokkuð ljóst að Everton verður að fara að vinna leiki og hafa ekki unnið leik í deildinni síðan 16. desember. Næsti leikur Everton er á útivelli gegn Newcastle. Everton vann Newcastle 3-0 á Goodison Park þann 7. desember.

Við þökkum bræðrunum kærlega fyrir skýrsluna og ljúkum þessu með einkunnum leikmanna…
 
Einkunnir Sky Sports: Pickford (6), Coleman (5), Tarkowski (6), Branthwaite (6), Godfrey (6), Harrison (6), Onana (6), Garner (6), McNeil (7), Doucoure (6), Calvert-Lewin (6). Varamenn: Young (6), Beto (7).