Crystal Palace – Everton 0-0 (FA bikar)

Mynd: Everton FC.

Jæja, þá er stund milli stríða, allavega hvað úrvalsdeildina varðar, því nú er komið að ensku FA bikarkeppninni en Everton fékk erfiðan drátt hvað fyrsta leik varðar, útileik gegn úrvalsdeildarliði Crystal Palace.

Uppstillingin: Virginia, Mykolenko, Branthwaite, Tarkowski, Coleman (fyrirliði), Onana, Garner, McNeil, Harrison, Danjuma, Calvert-Lewin.

Varamenn: Pickford, Keane, Godfrey, Patterson, Gomes, Chermiti, Dobbin, Hunt, Beto.

Smá vesen á útsendingunni hjá mér aftur, en held ég hafi náð mestu.

Palace menn með fyrsta skot á mark, á 3. mínútu, en skotið slakt og þó Virginia varði það hefði það líklega farið framhjá marki. Danjuma með næsta skot, innan teigs vinstra megin á 16. mínútu, en í hliðarnetið utanvert (varið í horn).

Everton annars betra liðið í fyrra hálfleik en náðu ekki að brjóta niður varnarlínu Palace.

Á 27. mínútu voru Palace menn nokkuð heppnir þegar boltinn sigldi framhjá öllum eftir hornspyrnu, og endaði á að rata á rammann þar sem markvörður þurfti skyndilega að bregðast hratt við til að forðast mark, með því að hreinsa frá á marklínu.

Bæði lið fengu skotfæri undir lok fyrri hálfleiks. Crystal Palace menn skutu rétt yfir mark en Garner, hinum megin, náði skoti á rammann, sem var blokkerað af aftasta varnarmanni.

Smá líf í Palace mönnum undir lok fyrri hálfleiks, en engin færi til að tala um.

0-0 í hálfleik.

Engin breyting á liðunum í hálfleik en Everton var líka betra liðið í seinni hálfleik og mun líklegri til að skora.

Garner átti fyrsta skot seinni hálfleiks þegar hann reyndi sveig upp í hægra hornið af löngu færi en boltinn framhjá marki. Engin hætta. Hinum megin náði Eze skot á mark Everton, en Virginia sló það í horn sem ekkert kom úr.

Calvert-Lewin komst í mjög gott færi á 63. mínútu þegar miðjumaður Everton náði að blokka bolta frá miðjumanni Palace og beint í hlaupaleiðina hjá Calvert-Lewin en Henderson í marki Palace náði að verja skotið í horn (sem Everton náði ekki að nýta). Danjuma fékk svo skotfæri utarlega hægra megin í teig, eftir snögga sókn Everton á 74. mínútu, en skotið varið.

Á 79. var dómarinn svo skyndilega sendur í VAR sjána til að skoða tæklingu frá Calvert-Lewin sem við fyrstu sýn virtist vera frábærlega útfærð. Ekki nokkur sála á staðnum, hvorki dómarinn, aðstoðardómararnir, andstæðingurinn eða þá áhorfandi hafði séð neitt athyglisvert við tæklinguna en dómarinnn gaf Calvert-Lewin rautt eftir skoðun í VAR sjánni. Þetta var afar ströng túlkun á reglubókinni og manni fannst vanta alla skynsemi í þetta hjá VAR dómaranum. Vissulega rétt snerti hann fótinn á Palace manninum en það var nákvæmlega engin kraftur í tæklingunni og mér sýndist Palace maðurinn ekki sýna nein viðbrögð! 

Maður veltir líka fyrir sér — hvenær ætla dómarar að hafa kjark til að segja, „takk fyrir endursýninguna, en veistu… ég held ég hafi haft rétt fyrir mér þegar ég dæmdi ekkert“. Lesendur vita að ég er mikill VAR-kall, en þetta finnst mér vera misnotkun á VAR tækinni, ég verð bara að segja það. Það eru allavega fyrstu viðbrögð og ég þarf að sjá þetta aftur.

Everton því manni færri. þegar 10 mínútur voru eftir af venjulegum leiktíma, og Beto kom inn á fyrir Danjuma strax þar á eftir. Stuttu síðar kom Gomes inn á fyrir McNeil sem meiddist, að því virtist illa. 

9 mínútum bætt við en ég missti eiginlega af þeim öllum, því miður. En Everton landaði jafntefli, sem verður að teljast afar frústrerandi niðurstaða miðað við yfirburðina og var keypt dýru verði (rautt spjald á Calvert-Lewin og meiðsli á McNeil). Ekki eins og liðið megi við því.

Minnir að Sky Sports gefi ekki út einkunnir leikmanna fyrir bikarleiki. Held að það yrði ekki fallegt, allavega ekki fyrir leikmenn Palace.