Man United – Everton 2-0

Mynd: Everton FC.

Elvar Örn tók að sér að skrifa pistil um leik Everton gegn United þar sem Finnur var vant við látinn. Elvar hafði þetta um leikinn að segja:

Everton átti ekki sinn besta leik í dag gegn sterku liði Man Utd en margir bjuggust við hálfgerðu varaliði United sem eiga að spila eftir þrjá daga í meistaradeildinni gegn Real Madrid.

Uppstilling Everton var nokkuð hefðbundin en þó varð breyting rétt fyrir leik þar sem Distin var ekki hress og því kom Heitinga í hans stað í vinstri miðvörðinn. Ekki mjög heppileg uppákoma í ljósi þess að frammistaða Heitinga hefur verið mikið gagnrýnd í undanförnum leikjum í hægri miðvarðarstöðunni. Það átti líka eftir að koma á daginn að vörnin var veikari fyrir vikið. Liðið annars skipað Howard, Baines, Jagielka, Heitinga, Neville, Gibson, Osman, Mirallas, Fellaini, Pienaar og Anichebe tekin framfyrir Jelavic í sókninni. Varamenn voru Mucha, Jelavic, Naismith, Oviedo, Hitzlsperger, Stones og Duffy.

United stilltu upp sterku liði eins og áður sagði og var það greinilegt á fyrstu mínútunum þar sem þeir voru mikið snarpari og betri á öllum sviðum og fyrstu 15 mínúturnar voru eign United. Þegar nokkrar mínútur voru liðnar af leiknum komst Van Persie í dauðafæri þar sem hann komst framhjá Howard en skaut í stöng fyrir opnu marki en Neville var full aftarlega sem gerði Persie réttstæðan. Á þrettándu mínútu kom sending á Persie þar sem Heitinga var illa staðsettur og missti hann Persie framhjá sér og Persie sendir boltann á Giggs sem setur boltann létt í hægra hornið, stöngin inn. Satt best að segja afleit byrjun en Everton komst svo betur og betur inn í leikinn og Osman átti flott langskot sem De Gea varði vel í horn. Mirallas átti einnig nokkra góða spretti á hægri kantinum og einn slíkur endaði með sendingu á Anichebe rétt fyrir framan markið en Anichebe náði ekki skoti á markið og Rafael hreinsaði í horn. Möguleikar voru fyrir Everton að jafna en eftir þessar tilraunir þá sendir Rafael stungu á Van Persie en vörn Everton var mjög framarlega nema enn og aftur gleymdi Neville sér í rangstöðulínunni og Van Persie brunar að marki og kemst framhjá Howard og rennir boltanum í markið, þó með viðkomu í Heitinga sem reyndi að verja markið, 2-0 fyrir United í hálfleik.

Everton voru nokkuð sterkir í seinni hálfleik án þess að skapa sér alvöru marktækifæri en Phil Jones hafði haldið Fellaini í gíslingu með góðum árangri. Jelavic var skipt inná fyrir Anichebe á 57 mínútu og Naismith kom inná fyrir Mirallas þegar 70 mínútur voru liðnar og ég hefði viljað sjá Oviedo einnig inná í stað Pienaar en svo varð ekki. Þó Everton væru mikið með boltann var það mikið á eigin vallarhelmingi og varnaleikur United var frábær með Vidic í fararbroddi, maður leiksins að mínu mati en Rafael var einnig gríðarlega öflugur. United áttu t.a.m. tvær stórhættulegar sóknir, en í þeirri fyrri átti Jonny Evans tvær tilraunir með skalla og skoti sem Howard varði frábærlega og Rooney fylgdi reyndar eftir með þriðja skotið á markið á sömu sekúndu sem Jelavic varði nánast við marklínuna. Seinna átti Cleverley frábært skot sem virtist stefna í þverslá og hugsanlega inn en Howard varði aftur meistaralega. Síðla leiks komst Jelavic í flott færi en var ranglega dæmdur rangstæður og niðurstaða var 2-0 United í vil.

Einkunnir leikmanna á skysports.com er Howard 7, Baines 6, Jagielka 6, Heitinga 5, Neville 6, Pienaar 7, Gibson 5, Osman 6, Mirallas 6, Fellaini 5, Anichebe 5 og loks leikmenn sem skipt var inná Jelavic 6, Naismith 5. Hjá United voru 9 leikmenn með 7 í einkunn og Vidic með 8.

Nokkuð sáttur við þessa einkunnargjöf og Howard kom í veg fyrir stærra tap má segja. Mér fannst spurning hvort Neville eigi skilið að fá 6 í einkunn þá sér í lagi fyrir að klikka tvisvar á rangstöðulínu varnarinnar og í bæði skiptin varð úr dauðafæri og annað endaði í stöng en hitt í markinu. Heitinga var slakur og Jagielka þurfti reyndar margoft að fara yfir á vinstri hlutann til að sjá um svæði Heitinga en hann var allt of oft framarlega og seinn aftur. Jagielka á jafnvel meira skilið en 6 fyrir vikið. Pienaar fannst mér slakur en fær hér 7 í einkunn. Óvenju döpur frammistaða hjá Gibson í dag verð ég að segja.

Enn og aftur er Heitinga á vörum manna vegna lélegrar frammistöðu og ég fer ekki ofan af þeirri skoðun minni að nú er kominn tími á að Duffy fái að spreyta sig í vörninni ef Distin eða Jagielka eru fjarverandi. Það verður einnig spennandi að sjá hvort að nýi leikmaðurinn John Stones sé tilbúinn í hægri bakvörðinn en það vantar akkúrat meiri hraða í hægri bakvörðinn þá í takt við Baines á þeim vinstri.

Næsti leikur Everton er næsta laugardag í FA bikarnum á útivelli gegn Oldham sem hreinlega verður að vinnast. Síðan mætum við Norwich og Reading í deildinni svo möguleiki ætti að vera á að ná í nokkur stig þar.

Skrifað í fjarveru Finns
Elvar Örn