Tim Cahill seldur til NY Red Bulls

Mynd: Everton FC.

Everton staðfesti í kvöld sölu á Tim Cahill til MLS liðsins New York Red Bulls. Tim lék 278 leiki fyrir Everton frá því hann var keyptur frá Millwall árið 2004 og skoraði 68 mörk fyrir Everton (sem er mark í u.þ.b. fjórða hverjum leik), mörg þeirra með skalla — þrátt fyrir að vera ekki hár í loftinu. Cahill er talinn vera ein bestu kaup Moyes frá upphafi en Moyes fann þennan gimstein hjá Millwall og borgaði aðeins 1.5M punda fyrir hann á sínum tíma, sem þótti lítið á þeim tíma (eins og nú). Það er mjög mikil eftirsjá af honum enda hefur hann verið ákveðinn holdgervingur baráttuandans í Everton liðinu í gegnum árin og hefur verið mjög vinsæll meðal stuðningsmanna, jafnvel þó hann hafi farið í gegnum ákveðið þurrkatímabil á síðustu önn með Everton hvað mörk varðar. Hann er svo sannarlega búinn að vera í uppáhaldi hjá mér og mínum vinum um nokkurn tíma enda efaðist enginn um hliðhollustu hans gagnvart félaginu. Við þökkum Tim kærlega fyrir mjög góðar minningar og óskum honum velfarnaðar með New York liðinu í framtíðinni. Kaupverðið var ekki gefið upp en er talið vera líklega um milljón punda, eða rétt undir því verði sem greitt var fyrir hann á sínum tíma.