Everton – Aston Villa 2-1

Mynd: Everton FC.

Everton mætti Aston Villa á heimavelli í dag og maður vonaðist til þess að leikmenn kæmu brjálaðir til leik eftir slysið á þriðjudaginn síðasta en jafnframt hálf smeykur þar sem sóknarlínan er orðin ansi þunnskipuð eftir meiðsli Lukaku og maður sá því ekki hvaðan mörkin ættu að koma. Nýi sóknarmaður Everton, Lucina Traore, kynntur fyrir leik en hann var ekki leikfær fyrir leikinn.

Uppstillingin fyrir Villa leikinn var eftirfarandi: Howard, Baines, Distin, Jagielka, Stones, Osman, McGeady, Barry, McCarthy, Barkley, Mirallas. Osman því á vinstri kanti og McGeady á hægri og Mirallas frammi, eins og beðið hefur verið um eftir að Lukaku meiddist. Nú fengi maður loksins að sjá hvað Mirallas gæti frammi en það var staða sem hann hefur spilað í grísku deildinni.

Og Everton virtist ætla að byrja með látum því McGeady átti eftir horn flott skot sem hafnaði í nærstönginni og fór út aftur. Everton með boltann 65% leiks eftir 15 mínútur og létu boltann ganga vel manna á milli en sköpuðu sér afskaplega lítið af færum í fyrri hálfleik. McGeady átti annað skot innan teigs á 26. mínútu en skotið arfaslakt og beint á markvörð. Villa menn þó lítið betri, þeir áttu eitt skot sem fór langt upp í stúku og engin hætta í sókninni hjá þeim eiginlega allan leikinn.

Barkley var felldur á 32. mínútu við miðju, greinilegt brot en ekkert dæmt, kannski vegna þess að Barkley reyndi hvað hann gat til að halda jafnvægi en gekk ekki. Ó.þol.andi að refsað sé fyrir að reyna að standa í lappirnar. Villa tóku tvær fljótar snertingar fram völlinn og komust í dauðafæri og sóknarmaður þeirra náði að skjóta boltanum gegnum lappirnar á Howard. 0-1 fyrir Villa. Algjörlega óverðskuldað.

Everton svaraði næstum því strax þegar Mirallas náði hjólhestaspyrnu á mark eftir fyrirgjöf en varnarmaður bjargaði í horn sem ekkert kom úr.

0-1 í hálfleik og ansi þungt í manni hljóðið þar sem hvorugt lið leit út fyrir að eiga eftir að skora fleiri mörk og Mirallas gerði lítið annað í sókninni en að safna hornspyrnum og rangstæðum. Maður var farinn að hugsa að jafntefli væri nú kannski ekki slæm úrslit úr því sem komið var. Tölfræðin leit þó ágætlega út, Everton með boltann 70% í fyrri hálfleik, með 5 tilraunir á markið (1 sem rataði á rammann), Villa með 2 tilraunir á markið, ein á rammann.

Martinez gerði tvær lykilskiptingar í leiknum, aðra í hálfleik þegar Barkley fór út af og Pienaar kom inn en Pienaar bætti upp fyrir arfaslakan leik gegn litla bróður á þriðjudaginn og átti frábæran leik.

Everton mun betra liðið á vellinum en lítið gekk þó að skora. Hver stórsóknin á fætur annarri fór forgörðum án almennilegs færis og afraksturinn eingöngu hver hornspyrnan á fætur annarri (13 horn samtals í öllum leiknum, Villa menn fengu eina!).

Osman komst reyndar innfyrir vinstri megin eftir stungusendingu (frá Pienaar?) en skotið varið í horn og markspyrna dæmd. Einn af nokkrum mjög skrýtnum dómum í leiknun. Osman komst aftur í færi hinum megin teigs eftir flotta sendingu inn í teig frá Stones, Osman með bak í mark en sneri sér og skaut. Skotið hins vegar slakt og beint á markvörðinn.

Hvert hornið á fætur öðru fylgdi í kjölfarið en Everton náði ekki að nýta nein þeirra. Pienaar átti fast skot eftir eitt hornið en beint á Guzan í markinu.

Hin lykilskipting Martinez kom á 69. mínútu þegar Stones var skipt út af fyrir Naismith. Martinez greinilega að blása til stórsóknar (sóknarmaður fyrir varnarmann) enda voru yfirburðir Everton töluverðir í leiknun.

Benteke var næstum búinn að skora sjálfsmark í leiknum þegar varnarmaður Villa skallaði boltann í hausinn á honum, en Villa menn sluppu með skrekkinn. Boltinn rétt framhjá markinu. Það kom þó ekki að sök því varamennirnir Pienaar og Naismith náðu frábærlega saman á 72. mínútu þegar Everton jafnaði. Pienaar fékk boltann frá Barry að mig minnir, við D-ið á teignum og „flikkaði“ boltanum inn fyrir þvöguna þar sem Naismith kom á hlaupinu og tók við boltanum og var kominn einn á móti markverði. Ekki ósvipað færi og Jelavic fékk í 4-0 sigrinum gegn Stoke (og lét verja frá sér) en Naismith átti í engum erfiðleikum með að klára færið. Everton loksins búið að jafna. 1-1.

En Everton menn voru ekki hættir. Mirallas sótti brot rétt utan teigs þegar varnarmaður Villa sparkaði hann niður. Mirallas gerði sér lítið fyrir og átti enn eina glæsi-aukaspyrnuna alveg við nærstöng sem svoleiðis söng í netinu. 2-1 fyrir Everton!!

Hibbert inn á fyrir McGeady á 86. mínútu og örskömmu síðar hefði Everton átt að skora þriðja markið þegar Pienaar sendi fyrir en Naismith skallaði beint á markvörð úr ágætis færi.

Villa menn áttu skot rétt yfir undir lok leiks, sem var þeirra fyrsta almennilega skot í seinni hálfleik, að mig minnir. Samtals áttu þeir 4 skot í öllum leiknum en aðeins eitt sem rataði á rammann (mark þeirra í fyrri hálfleik).

Everton með 12 skot, 5 á rammann og varla að Villa menn fengju boltann (Everton með hann 71% leiks). Sigur Everton í höfn og jafnframt fín úrslit úr öðrum leikjum: United og Newcastle töpuðu bæði (United fyrir Stoke og Newcastle fyrir Sunderland). Að auki gerðu Tottenham menn jafntefli. Nú þarf Anichebe bara að tryggja West Brom sigurinn gegn litla bróður á morgun og umferðin er fullkomnuð! 🙂

Einkunnir Sky Sports: Howard 6, Baines 6, Distin 6, Jagielka 7, Stones 6, Osman 7, McCarthy 7, Barry 6, McGeady 7, Barkley 5, Mirallas 8. Varamenn: Pienaar 8, Naismith 7, Hibbert 4 (sökum þess hvað hann fékk fáar mínútur). Skil reyndar ekki af hverju einkunnir byrja ekki í 6 og fara upp og niður eftir frammistöðu, frekar en að gefa mönnum sem fá 3 mínútur í leiktíma fjóra í einkunn.

En, höfum ekki áhyggjur af því. 2-1 sigur í höfn. Akkúrat meðalið sem við þurftum! Everton komið á sigurbrautina aftur.