Leeds vs. Everton í 3. umf. deildarbikarsins

Everton á leik kl. 18:45 við Leeds á Elland Road á morgun í þriðju umferð deildarbikarsins.

Fyrirliði Leeds, Lee Peltier, er tæpur fyrir leikinn og David Norris og Paul Green eru meiddir. Hjá okkur er Gibson meiddur og Hibbert líklega tæpur en Jelavic kemur aftur í hópinn (mjög góðar fréttir) eftir að hafa misst af einum og hálfum deildarleik út af meiðslum á hné eftir samstuð. Líklegt þykir einnig að Distin verði með í þessum leik eftir að hafa fengið að verma bekkinn í leiknum gegn Swansea.

Það verður erfitt að spá um uppstillingu í leiknum þar sem stutt er í bæði síðasta og næsta leik á eftir bikarnum. Everton ætlar að taka bikarkeppnirnar alvarlega á tímabilinu og fróðlegt að sjá hvaða lið verður inni á. Ég á mjög erfitt með að spá um liðið. Oviedo verður líklega inn á, gæti ég trúað, en hvort það verður fyrir Baines eða Pienaar veit ég ekki. Mirallas gæti verið í nokkrum stöðum fyrir aftan Jelavic. Moyes gæti hvílt Fellaini til að halda honum ferskum. Ætli sé ekki best að láta lesendur giska… hvaða lið haldið þið að byrji inni á?

Þessi tvö lið áttust reglulega við einu sinni, eða þangað til Leeds féll úr Úrvalsdeildinni tímabilið 2003/04 en liðin hafa mætst 115 sinnum, og Leeds unnið 50 af þeim leikjum en þrjátíu og þrjá leiki hefur Everton unnið (þrjátíu og tvisvar sinnum hefur orðið jafntefli). Tölfræðin lítur því alls ekki vel út, sérstaklega ekki þegar aðeins leikir á heimavelli Leeds eru skoðaðir því Everton hefur aðeins unnið 5 leiki þar í 57 viðureignum (Leeds unnið 37 og 15 jafntefli). Everton gerði 1-1 jafntefli á Elland Road tímabilið sem Leeds datt úr Úrvaldsdeildinni en tapaði leiknum tímabilið á undan, stuttu áður en Moyes tók við Everton. Hann stýrði svo Everton til sigurs á Leeds á Goodison Park, 4-0 rétt tæpu ári síðar. Moyes hefur því ekki tapað með Everton gegn Leeds. Þessi lið hafa hins vegar tvisvar áður mætst í deildarbikarnum og vann Leeds báða leikina 4-1, annan heima, hinn úti.

Það eru þó aðrir tímar nú og allt aðrir leikmenn sem koma til með að spila þennan leik á morgun.

Ánægjulegt að sjá að Victor Anichebe er að sýna af hverju Moyes hefur haldið tryggð við hann en á árinu 2012 eru aðeins um 96 leikmínútur milli marka hjá honum og aðeins 66 mínútur milli marka ef bara þetta tímabil er skoðað — ef löglega markið sem dæmt var af gegn Newcastle er tekið með í reikninginn. Jelvic leikur líklega bikarleikinn á morgun en ég myndi hafa hann á bekknum í næsta deildarleik og gefa Anichebe séns.

Það er búið að vera ýmislegt í fréttum undanfarna daga, til dæmis það að John Terry lýsti því yfir að hann væri hættur að spila með landsliðinu. Þetta ætti að vera Jagielka hvatning til að taka stöðu hans í liðinu og vonandi nýtir hann það vel. Baines og Moyes voru líka í fréttum en Baines sagði að hann hefði ekki leikið í betra Everton liði en núverandi liði og Moyes sagði að Evrópukeppni ætti að vera raunhæft markmið fyrir Everton í ár.

Einhver tók það saman hver staðan í deildinni væri ef hún hefði byrjað 1. janúar 2012 og þar er Everton í þriðja sæti rétt á eftir Manchester liðunum (United efst). Neðst af þeim liðum sem léku í úrvalsdeildinni á síðasta tímabili eru QPR, Liverpool og Aston Villa.

Í öðrum fréttum er það helst að ungstirnið okkar, Ross Barkley, tryggði Sheffield Wednesday stig á móti Bolton þegar hann jafnaði úr víti og bakvörðurinn Bidwell framlengdi lán sitt hjá Brentford um mánuð. Einnig er U18 ára liðið komið á sigurbrautina en þeir lögðu Blackburn U18 3-1 með tveimur mörkum frá Chris Long og einu frá bakverðinum Ibou Touray. U21 árs liðið leikur við Blackburn U21 á morgun á sama tíma og aðalliðið leikur bikarleikinn.