Vefsíða Everton.is (og opinn þráður)

Það hefur ekki gefist tóm til að kynna fyrir ykkur almennilega þessa nýju og glæsilegu vefsíðu Everton.is, sem Þórarinn Jóhannsson — gallharður Everton maður — hannaði fyrir okkur í frítíma sínum. Þórarinn gerði eiginlega gott betur og skipti út vefumsjónarkerfinu öllu í leiðinni, en gamla kerfið var bæði óþjált í meðförum, hægvirkt og farið að láta á sjá.

Nýja kerfið færir Everton síðuna okkar til nútímans og ég held við getum öll verið stolt af. Vefsíðan nýja fylgir í mörgu hönnuninni á gamla kerfinu, eins og það að efst er hægt að nálgast leikjalista Everton (https://everton.is/leikir) sem og úrslitin í leikjum tímabilsins (leiktímar yfirfærðir yfir á íslenskan tíma, að teknu tilliti til daylight saving). Einnig er í haus vefsins að finna ýmsan fróðleik um aðdáendaklúbbinn og sögu Everton félagsins.

Uppi í hægra horni má sjá lista yfir nýjustu kommentin frá ykkur lesendum sem og handhægan lista yfir 5 nýjustu fréttirnar (sjá mynd).

Aðeins neðar í hægri dálkinum (til hægri við þessa setningu) má sjá svokallað stikkorðaský en það er samansafn af stikkorðum sem fylgja fréttunum á síðunni, þar sem tíðni stikkorðs ræður leturstærð. Ef smellt er á stikkorð birtist listi af öllum fréttum á everton.is síðunni sem innihalda stikkorðið sem valið var. Til dæmis er hægt að sjá yfirlit yfir öll kaup Everton á tímabilinu. Eða skoða allar leikskýrslur, upphitunarfærslur fyrir leik (stikkorð: leikur) og allt það helsta um Chuck Hibbert-Norris, svo fátt eitt sé nefnt. Hvet ykkur til að prófa það og láta í ykkur heyra ef við gleymum að stikkorðs-merkja fréttir.

Hér að neðan má sjá kommentakerfi undir fréttinni en ekki þarf að stofna sérstaka notendur (eins og í gamla kerfinu) til að fá að leggja inn komment. Það eina sem þarf er að gefa upp nafn og tölvupóstfang (tölvupóstfangið verður ekki birt á síðunni) og þá er hægt að skrifa komment í reitinn fyrir neðan fréttina.

Hafa ber í huga (varðandi kommentakerfið) að ekki allir stuðningsmenn Everton hafa Fésbókar- eða Google+ reikning og því eiga komment sem þið leggið inn í kommentakerfið hér (á everton.is) að getað náð til mun fleiri stuðningsmanna en ef komment er sett á færsluna á Facebook/Google+. Endilega látið sem mest í ykkur heyra; þetta verður miklu skemmtilegra ef fólk les ekki bara heldur tekur virkan þátt í umræðunum hér á everton.is líka.

En látum þetta nægja af vefsíðunni í bili. Við hjá everton.is vonum bara að þið njótið nýja vefsins og fréttanna sem þar birtast. Vil einnig nota tækifærið og þakka Þórarni Jóhanns kærlega fyrir frábært starf í þágu everton.is vefsins á undanförnum árum. Hann á miklar þakkir skildar.

Orðið er annars laust í kommentakerfinu fyrir það sem ykkur liggur á hjarta. Everton hefur verið orðað við nokkra leikmenn undanfarið og svo er deildarbikarinn á miðvikudag. Er eitthvað sem þið viljið ræða?