Everton tók á móti Manchester City í dag og líklegt að City menn hafi andað léttað að sjá Cahill ekki í byrjunarliðinu. Lengi vel leit út fyrir að Everton-grýla Manchester City yrði brátt kveðin niður því við áttum slakan fyrri hálfleik og fengum varla almennilegt færi á meðan City fékk nokkur dauðafæri og hefðu getað verið 3-0 yfir í hálfleik (en ekki bara 1-0 eftir mark frá Yaya Toure). Besta færi okkar átti Rodwell þegar hann skallaði boltann naumlega framhjá.
Þetta breyttist þó snarlega í seinni hálfleik þegar Beckford og sérstaklega Cahill komu inn á (væntanlega margir City menn andvarpað þar), en sá síðarnefndi hafði ekki verið inn á nema í 10 sekúndur þegar hann fiskaði aukaspyrnu á 65. mínútu sem Arteta sendi á Distin (fyrrum Man City mann) sem átti ekki í vandræðum með að klára það færi með góðum skalla. Við jöfnunarmarkið gjörbreyttist leikurinn, allt annað að sjá til Everton og það var eins og City menn yrðu skelkaðir, því þeir urðu allt í einu voðalega taugaveiklaðir og mistækir í vörninni og annað mark Everton lá í loftinu. Það kom svo nokkrum mínútum síðar (á 72. mínútu) eftir að Neville rauk upp völlin og sendi fyrir á Osman, minnsta manninn á vellinum, sem stökk manna hæst og skallaði glæsilega fram hjá markverðinum.
Við vorum nálægt því að bæta við öðru þegar Anichebe sendi fallega stungusendingu inn á Beckford sem var aðeins hársbreidd frá því að vera ekki rangstæður. Mörkin tvö nægðu þó til sigurs og því 7. sigurinn í síðustu átta leikjum við Manchester City í höfn. Grýlan er greinilega enn á lífi.
Ekki skemmtilegur fyrsti leikur Jolean Lescott við Everton eftir að hann var seldur til City og fékk hann að heyra það frá áhorfendum í hvert skipti sem hann fékk boltann. 🙂
Einkunnir Sky Sports: Howard 7, Heitinga 7, Jagielka 7, Hibbert 6, Baines 7, Distin 8, Neville 7, Arteta 7, Rodwell 7, Osman 7, Anichebe 7. Varamenn: Coleman 4, Cahill 6, Beckford 7. Hjá City fékk Toure 7, en restin þótti slök, aðallega fimmur og sexur (einstaka 4 og 3).
Comments are closed.