Wolves – Everton 1-1

Mynd: Everton FC.

Everton átti leik í dag við Úlfana á útivelli, í næstsíðustu umferð Úrvalsdeildarinnar. Það var mikil spenna og eftirvænting fyrir þessum leik — allavega Everton megin, en tímabil Úlfanna var búið. Þeir sigldu lygnan sjó í 13. sæti, með ekki neitt sem þeir höfðu til að keppa að og maður óskaði sér að leikmenn þeirra væru vonandi bara með hugann við það að komast brátt í sumarfrí.

Tölfræðin fyrir leik leit svona út:

Maður óskaði sér að Everton næðu upp sömu stemningu og í Brighton leiknum, því sigur hefði farið langleiðina með að klára dæmið og bjarga Everton frá falli. Jafntefli hins vegar í dag þýddi að bæði Leeds og Leicester gátu komist yfir Everton með sigri um helgina og þá væri komin svaka pressa á Everton að sigra Bournemouth í lokaumferðinni og treysta á hagstæð úrslit.

Þetta voru leikirnir sem eftir voru þegar leikurinn var spilaður:

Uppstillingin: Pickford (fyrirliði), Tarkoswki, Mina, Patterson, Gana, McNeil, Doucouré, Onana, Garner, Iwobi, Calvert-Lewin.

Varamenn: Begovic, Lonergan, Holgate, Keane, Welch, McAllister, Gray, Maupay, Simms.

Ég get ekki lýst því hvað það var mikill léttir að sjá Calvert-Lewin í byrjunarliðinu en það er athyglisvert að sjá að það er enginn náttúrulegur vinstri bakvörður í liðinu — en heilir 6 miðjumenn í byrjunarliðinu, þannig að Dwight McNeil fékk það hlutverk að spila í vinstri bakverði í dag, í fjarveru Mykolenko.

Úlfarnir byrjuðu með hættulegri sendingu fyrir mark á fyrstu mínútum, frá hægri kanti sem sigldi framhjá öllum. Hinum megin fékk Calvert-Lewin skotfæri en setti boltann í utanvert hliðarnetið.

Skemmtilegur og spennandi fyrri hálfleikur annars. Everton í góðum gír og voru betri aðilinn fyrstu 20 mínúturnar. Eina hættan sem Wolves sköpuðu var þessi áðurnefnd sending fyrir mark. 

Á 10. mínútu komst Calvert-Lewin í ákjósanlega stöðu nálægt marki en há og stutt sending frá Doucouré, sem var mættur vinstra megin, var eiginlega fyrir aftan hann, þannig að Calvert-Lewin náði ekki góðum skalla. Svipað uppi á teningnum stuttu síðar, þegar Iwobi reyndi háa sendingu utan af velli vinstra megin, en ekki í réttri hæð fyrir Calvert-Lewin til að ná góðum skalla.

Everton fékk dauðafæri eftir hornspyrnu á 27. mínútu. Dwight McNeil sendi háan bolta fyrir og Mina náði skalla, en yfir markið. Hefði viljað sjá Calvert-Lewin ná til boltans, þar sem hann var fyrir aftan Mina og í raun í betra skallafæri.

Á 29. mínútu fór Patterson svo út af vegna meiðsla, því miður. Keane inn á fyrir hann. Þetta sló Everton svolítið úr takti, sem hentaði Wolves vel.

Tölfræðin sýndi 6 skot frá Everton fram að því, ekkert skot frá Wolves. 

En svo kom suckerpunch mark alveg þvert gegn gangi leiksins, þegar Everton, í bullandi sókn, misstu boltann. Onana átti slæma sendingu á Gana og Traore hjá Wolves brunaði fram með boltann. Hvorki Gana né Onana kusu gula spjaldið til að stoppa Traore og hann komst því alla leið inn í teig og náði skoti. Pickford varði vel, en boltinn fór til Hee Chan sem var óvaldaður og setti boltann í autt netið. 1-0 fyrir Wolves.

Traore komst aftur í hættulegt færi, þegar hann tók sprettinn framhjá Keane í hægri bakverði og komst inn í teig en sú sókn fuðraði upp einhvern veginn.

Rétt fyrir lok hálfleiks fór Calvert-Lewin út af vegna meiðsla. Svakalega slæmar fréttir fyrir Everton. Gray kom inn á fyrir hann.

Fjórum mínútum bætt við en fyrri hálfleikur endaði 1-0. 

Iwobi átti fínt skot utan teigs hægra megin, stefndi í átt í hornið uppi vinstra megin, en markvörður náði að grípa.

Wolves fengu gott skotfæri á 60. mínútu, reyndu skot upp í vinkilinn vinstra megin en nokkuð vel framhjá markinu. Stuttu síðar reyndu þeir reyndu sama leikinn aftur, en í hægri vinkilinn í þetta skiptið en aftur vel framhjá. Pickford líklega með það samt í bæði skiptin. Wolves höfðu náð að vinna sig inn í leikinn á þeim tímapunkti og voru sterkara liðið, sem var ekki gott, en það lifnaði aðeins yfir Everton síðar.

Gray átti fast skot rétt utan teigs sem rataði á mark en markvörður varði í horn.

Holgate og Maupay komu svo inn á fyrir Onana og Gana á 81. mínútu og Dyche skipti þá yfir í 4-4-2. Everton lágu á pressunni í stöðugri sókn nánast allar síðustu mínúturnar, en Wolves alltaf stórhættulegir í skyndisóknum.

Í einni slíkri á 92. mínútu komust þeir í skotfæri á móti Pickford, sem varði glæsilega. Hrikalega mikilvæg varsla.

Hinum megin var Michael Keane farinn að spila sem fremsti maður. Pínu spes, en segir kannski allt sem segja þarf um stöðuna sem var eftir á varamannabekknum því það voru bara tveir markverðir og þrír kjúklingar eftir á bekknum í lokin. Enginn eftir til að koma inn og breyta leiknum.

9 mínútum hafði verið bætt við og Everton hélt áfram að pressa stöðugt. Fengu hverja hornspyrnuna á fætur annarri. Pickford mættur í teigin líka undir lokin — öllu flaggað, þar með talið eldhúsvaskinum, eins og Bretinn orðar það.

Á 99. mínútu var maður búinn að tapa voninni algjörlega en þá gerðist hins vegar hið ótrúlega þegar Wolves stíflan brast loksins. Tarkowski náði að vinna einvígi við markvörð Wolves, boltinn barst til Keane sem sendi stutta lága sendingu fyrir mark frá hægri, beint á Yerry Mina, fyrir framan mitt mark, sem þrumaði framhjá varnarmönnum og Maupay sem kastaði sér frá.  Staðan allt í einu 

Mark á ögurstundu, sem gæti skipt gríðarlega miklu máli þegar öllu er á botninn hvolft! 

Tölfræðin lítur núna svona út:

Einkunnir Sky Sports: Pickford (7), Patterson (6), Tarkowski (7), Mina (7), Iwobi (7), Gueye (7), Onana (6), Garner (7), McNeil (7), Doucoure (7), Calvert-Lewin (7). Varamenn: Keane (7), Gray (7).

Maður leiksins, að mati Sky Sports, var Yerry Mina.