Man United – Everton 1-1

Mynd: Everton FC.

Skemmtilegur og opinn leikur, nokkuð um færi og hálffæri. Sigur virtist í höfn fram á lokamínútu en síðustu andartökin afdrifarík.

Uppstillingin: Robles, Baines, Williams, Jagielka, Holgate, Barry, Davies, Gana, Barkley, Mirallas, Lukaku. Varamenn: Stekelenburg, Valencia, Calvert-Lewin, Lookman, Pennington, Kenny, J. Williams.

Allt annað að sjá til Everton í fyrri hálfleik en í tja… bara öllum síðasta leik og þeir uppskáru eftir því. United fengu reyndar tvö dauðafæri í byrjun leiks, fyrst Zlatan en Williams blokkeraði hann og hitt endaði í rangstöðu (og reyndar vel varið hjá Robles).

Everton óx inn í leikinn eftir það og fengu horn á 20. mínútu sem Jagielka skoraði úr. Williams vann skallaeinvígi í horninu og framlengdi á Jagielka upp við mark, sem var með bakið í markið. Marcus Rojo var að djöflast í bakinu á honum allan tímann en Jagileka nýtti styrkinn og stóð fastur — náði skoti á mark, gegnum klofið á De Gea og inn. Jagielka allan tímann með bakið í markið og gerði vel að ná skoti á mark. Staðan orðin 0-1 Everton og allt vitlaust á vellinum — Everton megin allavega, þar sem áhorfendur létu vel í sér heyra.

Mirallas gaf kjánalega aukaspyrnu á 30. mínútu sem United voru næstum búnir að skora úr — skotið beint úr aukaspyrnu var varið af Robles en United skutu frákastinu í slá. Herrera átti svo langskot á 38. mínútu sem Robles varði glæsilega í horn.

0-1 í hálfleik.

United sterkara liðið í seinni hálfleik og lögðu allt kapp á að jafna. Eftir því sem leið á hálfleikinn urðu þeir þó meira og meira direct og fóru að dæla boltum inn í teig á Zlatan og Fellaini, en Everton varðist vel og kom þeim boltum frá að mestu. United áttu reyndar skalla í slá eftir aukaspyrnu á 55. mínútu þegar Young sendi fyrir og Pogba skallaði í slána. Þar skall hurð nærri hælum.

Róaðist leikurinn eitthvað eftir það en United voru líklegri að bæta við. Mirallas svo skipt út af fyrir Pennington á 66. mínútu.

Zlatan átti skallamark á 71. mínútu en dæmdur rangstæður. Erfitt að segja hvort það hafi verið rétt — sýndist það vera tæpt, en held að línuvörður hafi verið að gefa merki um að Zlatan hafi verið að koma úr rangstöðunni, ekki endilega það að hann hafi verið rangstæður þegar sendingin kom. Gildir einu — ekkert mark.

Lukaku fékk svo flott færi stuttu síðar þegar hann fékk langa sendingu fram og sneri á Rojo og komst alla leið upp að endamörkum en skotið varið í horn. Við höfum séð hann skora með sama hætti, til dæmis nýverið gegn Sunderland, en í þessu tilfelli hefði hann átt að gefa á Barkley sem var á auðum sjó hinum megin.

Barkley skipt út af fyrir Calvert-Lewin á 80. mínútu og sókn United varð stöðugt örvæntingarfyllri. Það leit út fyrir að vörn Everton héldi þó, alveg þangað til á síðustu mínútu Fergy-time þegar United fengu eitthvert skítavíti þegar Williams handlék boltann þegar hann ætlaði að reyna að skalla frá. Zlatan öruggur á punktinum og reddaði stigi fyrir United. Williams út af með rautt og missir því af leiknum við Leicester.

Ótrúlega svekkjandi jafntefli niðurstaðan og Koeman aðeins hársbreidd frá því að verða fyrsti stjórinn í Úrvalsdeildinni til að sigra United þrisvar í röð á heimavelli. Hrikalegt að missa niður sigur á síðustu andartökunum enda hefði Everton komist upp í 5. sæti, upp fyrir United og Arsenal.

Einkunnir Sky Sports: Robles (7), Baines (8), Jagielka (8), Williams (7), Holgate (8), Barry (8), Davies (7), Gueye (8), Barkley (7), Mirallas (7), Lukaku (7). Varamenn: Calvert-Lewin (6), Pennington (6). United menn í 6-um og 7-um en enginn einn sem stóð upp úr.