Liverpool vs Everton

Mynd: Everton FC

Þrítugasta umferð ensku Úrvalsdeildarinnar hefst á laugardaginn, kl. 11:30, með stórleik en þá mætir Everton á Anfield. Landsleikjahléið er nú loksins að baki en það reyndist ekki bara hálf óvelkomin pása eftir tvo sigra Everton í röð (með 7-0 markatölu) heldur reyndist það báðum liðum dýrt. Everton missti Coleman í fótbrot og Funes Mori í hnémeiðsli en Liverpool liðið varð fyrir blóðtöku líka þegar þeir misstu Lallana í meiðsli. Hvað Coleman varðar kemur Holgate líklega til með að leysa hann af hólmi en Holgate hefur spilað 9 leiki með Everton á tímabilinu og hefur enn ekki tapað leik. Funes Mori hefði að öllum líkindum ekki byrjað gegn Liverpool hvort eð er, því hann missti sæti sitt í miðverðinum aftur til Jagielka fyrir tveimur leikjum síðan og Jagielka átti flotta innkomu í liðið og hjálpaði til við að halda hreinu í báðum leikjunum síðan þá. Fyrir landsleikjahlé leit út fyrir að Everton hefði misst Morgan Schneiderlin í meiðsli út tímabilið en þær kærkomnu fréttir bárust að meiðsl hans væru minni en haldið var í fyrstu og hann á því séns í leikinn.

Form þessara tveggja liða á árinu 2017 er mjög ólíkt, því Liverpool náðu aðeins einum sigurleik í deild allan janúarmánuð og febrúar að auki. Samtals léku þeir 12 leiki á því tímabili, sigruðu tvo, gerðu fjögur jafntefli og töpuðu 6 leikjum. Einn af þessum sigrum var reyndar gegn Plymouth í FA bikarnum en það hjálpaði þeim lítið því þeir töpuðu í næstu umferð fyrir Wolves og höfðu stuttu áður dottið út gegn Southampton í EFL bikarnum. Þeir hafa þó eitthvað náð að rétta úr kútnum í mars, tveir sigrar og eitt jafntefli.

Everton liðið hefur verið á blússandi siglingu á árinu 2017 og aðeins tapað einum deildarleik á því tímabili. Liðið virðist auk þess hafa tryggt sér sæti í Evrópudeildinni á næsta ári, sem var markmiðið fyrir tímabilið — allavega þarf eitthvað óvænt að gerast til að svo verði ekki, eins og að Leicester vinni Meistaradeildina. Allt héðan í frá er því bara bónus en með hagstæðum úrslitum gegn Liverpool væru aðeins þrjú stig í fjórða sætið, eins og staðan er í dag og það myndi setja ansi mikla spennu í baráttuna um fjórða sætið. Það getur allt gerst ennþá.

Ástæða góðs gengis Everton síðan um áramót liggur í breyttu leikskipulagi en Koeman vék frá 4-2-3-1 kerfinu sem hann notar gjarnan — hjá Everton með þá Mirallas, Deulofeu, Lennon, Bolasie og Valencia á köntunum. Breytingin fólst í því að fórna einum frammiliggjandi kantmanni fyrir miðjumann og síðan þá hefur Everton aðeins tapað einum deildarleik (frá því um miðjan desember, um það bil). Við það gaf Koeman ungliðanum Tom Davies tækifæri, en hann er aðeins 18 ára og fyrirliði U19 ára landsliðsins enska. Tækifærið nýtti hann afskaplega vel og hefur verið fastamaður á miðjunni hjá Everton, eins og við þekkjum. Það verður gaman að sjá hvernig hann reynist í derby leiknum, en hann hefur komið með flotta innspýtingu á miðjuna á tímabilinu og er uppalinn í Liverpool borg þannig að hann lifir fyrir svona leiki (líkt og Baines og Barkley). Með þessu náði Koeman að finna gott jafnvægi milli sóknar og varnar — 26 mörk skoruð í síðustu 10 Úrvalsdeildarleikjum og aðeins 7 mörk á sig — þar af sjö sinnum haldið markinu hreinu. Einnig hefur Barkley blómstrað í þessu leikskipulagi en aðeins De Bruyne og Eriksen hafa skapað fleiri færi í ensku Úrvalsdeildinni á tímabilinu og aðeins Gylfi Sigurðsson er með fleiri stoðsendingar á árinu.

Meiðsladeildin er stærsta áhyggjuefnið í augnablikinu en auk Coleman og Funes Mori eru þeir Bolasie og McCarthy frá og Schneiderlin tæpur, eins og áður sagði. Við spáum því að Schneiderlin verði orðinn nægilega góður (uppfært: 31. mars: Schneiderlin missir af leiknum) og líkleg uppstilling því: Robles, Baines, Williams, Jagielka, Holgate, Gana Gueye, Schneiderlin Barry, Davies, Barkley, Calvert-Lewin, Lukaku. Hjá Liverpool er Lallana meiddur og Jordan Henderson tæpur. Uppfært 31. mars: Klopp sagði á blaðamannfundi að þeir Lallana, Henderson og Sturridge myndu allir missa af leiknum vegna meiðsla.

Öll augu verða á Lukaku sem er í fantaformi þessa dagana, hefur skorað níu mörk í sínum 6 síðustu deildarleikjum (og hefur reyndar verið að skora í landsleikjum í millitíðinni líka). Hann varð á dögunum fyrsti erlendi leikmaðurinn í ensku Úrvalsdeildinni til að ná að skora 80 mörk fyrir 24ra ára aldur og er einn af þeim sem tilnefndir voru sem leikmaður mars mánaðar í ensku Úrvalsdeildinni (úrslitin verða kynnt á næstunni). Einnig gaman að segja frá því að ekkert lið hefur dreift markaskoruninni á jafn marga leikmenn og Everton, eða 15 talsins.

Áður en við látum þessu lokið er rétt að óska Evertonmanninum og landsliðsmanninum, Herði Björgvini Magnússyni, til hamingju með sitt fyrsta A-landsliðsmark fyrir Ísland. Vonandi mörg slík á leiðinni.

En, Liverpool næstir kl. 11:30 á laugardaginn. Leikurinn er í beinni á Ölveri — ekki missa af honum!