Stoke vs. Everton

Mynd: Everton FC.

Það er gaman fyrir okkur stuðningsmennina þegar leikjaplanið er þétt, hvort sem það er til að gleyma slæmum úrslitum eða vegna þess að ekki er langt að bíða til að sjá meira af því góða — eins og eftir leikinn gegn Newcastle í gær. Næsti leikur er nefnilega nú um helgina, kl. 15:00 á laugardaginn, gegn Stoke á útivelli en þetta er 5. leikur Everton á síðustu 14 dögum og sá síðasti áður en leikirnir fara að dreifast á fleiri daga.

Stoke liðið hefur ekki átt sjö dagana sæla síðan þeir unnu Norwich þann 13. þessa mánaðar en síðan þá hafa þeir dottið út úr bæði League cup og FA cup og aðeins fengið 1 stig af 9 mögulegum í deild, með 0-6 í markatölu. Reyndar má eiginlega segja að frá því að þeir unnu okkar menn á Goodison Park 3-4 undir lok árs þá hefur hvorki gengið né rekið hjá þeim en þeim til varnar má benda á að flestir þessara leikja voru á útivelli. Þeir koma því örugglega til með að líta á þennan leik á heimavelli sem gríðarlega mikilvægan leik til að rétta af skútuna og komast á sigurbrautina aftur. Á móti kemur að Everton gengur mun betur á útivelli en heima enda hefur liðið varla tapað á útivelli á tímabilinu þannig að þetta verður eitthvað.

Martinez sagði í viðtali að meiðsli Stones væru í lærvöðva en væru ekki alvarleg. Flestir stuðningsmenn voru hvort eð er á því að hvíla hann aðeins enda hefur Funes Mori fyllt skarð hans mjög vel og liðið verið að halda hreinu. Eitthvað segir mér að meiðsli Lukaku séu ekki eins alvarleg og óttast var, þó Collocini hafi rekið hnéð í bakið á honum að því er virtist að ástæðulausu í síðasta leik (nema til að reyna bæta líkurnar á að forðast tap). Ég er ekkert bitur, nei nei. 🙂

Ef Lukaku missir af leiknum verður þetta þó í fyrsta skipti á tímabilinu, að mig minnir, sem hann er frá. Ljóst er þó að nýi sóknarmaður Everton, Niasse, er ekki tilbúinn til að leiða línuna enda er hann nýkominn úr vetrarfríi úr rússnesku deildinni og því myndi það reynast hlutskipti Kone. Að öðru leyti er ekki mikið að frétta úr meiðsladeildinni, þannig að líklegt er að liðsuppstillingin verði svipuð — nema Martinez ákveði að hvíla einhverja. Ekkert að frétta af Howard ennþá.

Líkleg uppstilling því: Robles, Oviedo, Mori, Jagielka, Coleman, Barry, McCarthy, Cleverley, Lennon, Barkley, Lukaku/Kone.

Ýmislegt annað að frétta, sumt nýtt, sumt eldra:

Ef mörk er það sem þú ert að leita að þá er Goodison Park rétti staðurinn fyrir þig — en þú vilt líklega forðast Old Trafford eins og heitan eldinn…

Nýi leikmaður Everton, Shani Tarashaj, var valinn besti ungliði svissnesku deildarinnar 2015 í verðlaunaathöfn á dögunum en hann er nú á láni hjá Grasshoppers. Og talandi um lánsmenn: nokkrir aðrir leikmenn Everton eru að gera það gott sem lánsmenn með öðrum liðum.

Og í lokin rétt að minnast á það að Yarmalenko, sem Everton hefur að sögn verið lengi á höttunum eftir, sagði í viðtali að hann myndi kjósa Everton fram yfir Barcelona — sem í mínum bókum þýðir að hann er með hausinn á réttum stað (hvort sem af félagaskiptunum verður eða ekki).

En Stoke eru næstir á laugardaginn. Ykkar spá?

Munið líka að það fer hver að verða síðastur að skrá sig á árshátíð Everton sem haldin verður á næstu dögum. Ekki missa af því!