Man City – Everton 3-1 (Deildarbikar)

Mynd: Everton FC.

Uppstillingin fyrir City leikinn: Joel, Baines, Funes Mori, Jagielka, Stones, Barry, Cleverley, Osman, Deulofeu, Barkley, Lukaku. Varamenn í kvöld: Howard, Coleman, Oviedo, McCarthy, Lennon, Pienaar, Kone.

Sem sagt, Mori kom inn í miðvörðinn og Stones þar af leiðandi færður í hægri bakvörð. Að öðru leyti svipað og síðast, nema Kone inn fyrir Mirallas og Cleverley inn fyrir Besic.

Man City liðið byrjaði leikinn betur, náðu góðri pressu á Everton en það var Everton sem komst fyrst í færi þegar Deulofeu tók allt í einu sprettinn, stakk vinstri bakvörðinn þeirra af á 4. mínútu og komst inn í teig hægra megin en varnarmaður City náði að blokkera fyrirgjöfina í horn. Reddaði þeim fyrir horn.

Um einstefnu var þó að ræða frá City fyrir utan einstaka skyndisókn frá Everton. Ein slík gaf þó mark frá Barkley. Hann losaði sig við Otamendi og hljóp með boltann upp að vítateig nánast óáreittur, og hlóð bara í skotið með varnarmenn fyrir framan sig og þrumaði framhjá markverði. 1-0 og staðan samanlagt 3-1 fyrir Everton.

En City menn svöruðu á 23. mínútu með marki og reyndist það enn eitt grísamarkið sem Everton fær á sig. Skot frá Fernandinho utan teigs fór í neðanvert lærið á Baines, niður í jörð og í fullkominn boga yfir Robles. Staðan orðin 1-1 og samtals 3-2 fyrir Everton sem voru því enn á leið í úrslit á Wembley með þeirri niðurstöðu.

Viðvörunarbjöllurnar hringdu þó all verulega á 35. mínútu þegar Aguero var óheppinn að skora ekki úr langskoti sem fór í innanverða stöng og út. Silva náði viðstöðulausu skoti sem fór beint á Robles. Heppnin með Everton í það skiptið.

1-1 í hálfleik. Skemmtilegur leikur í fyrri hálfleik.

Everton fékk gullið tækifæri til að klára leikinn á 47. mínútu þegar Deulofeu komst í skyndisókn, Barkley setti hann einn inn fyrir vörnina en markvörður City varði frá honum úr dauðafæri. Illa farið með gott færi.

City svöruðu með skalla í stöng frá Silva hinum megin og Yaya Toure við það að ná frákastinu en náði ekki að pota inn. City menn hertu þumalskrúfuna og á 60. mínútu fannst manni sem mark frá City lægi í loftinu. Þá skipti Martinez inn McCarthy og Kone fyrir Deulofeu og Osman á 60. mínútu og róaðist spil Everton mikið við það. Þáttur Kone fór ekki framhjá þulunum sem bentu á að hann væri líkamlega sterkur og héldi boltanum vel, sem átti þátt í að taka bitið úr leiknum aðeins þar sem City virtust vera að ná undirtökunum fram að því.

Fyrsti leikur McCarthy á árinu 2016, gott að sjá hann á velli.

Pellegrini svaraði skiptingu Martinez með því að setja Kevin De Bruyne inn á, dýrasta Man City leikmann allra tíma og hann átti aldeilis eftir að breyta gangi leiksins með því að koma að tveimur mörkum en bæði þóttu þau heldur vafasöm.

De Bryune skoraði fyrst sjálfur mark á 69. mínútu eftir að Sterling hafði missti boltann aftur fyrir endamörk en línuvörður sá það ekki. Fyrirgjöfin endaði beint hjá De Bryune inni í teig fyrir framan mark og hann þrumaði inn. Staðan orðin 2-1 fyrir City og þar með jafnt 3-3 samanlagt.

De Bruyne var svo aftur að verki þegar hann sendi háa og langa sendingu inn í teig utan af hægri kanti beint á Aguero sem var „borderline offside“ eins og þulirnir bentu á. Aguero náttúrulega með frábæran skalla sem endaði í netinu. Staðan orðin 3-1 og City þar með við stjórnvölinn þar sem staðan úr báðum viðureignum var orðin 4-3 samtals fyrir City.

Coleman var strax skipt inn á fyrir Stones á 78. mínútu. Tólf mínútur eftir af leiknum til að minnka muninn og komast í framlengingu. Everton voru þó manni færri næstum allan tímann þar sem Barkley var með blóðnasir sem bara vildu. ekki. stoppa. Rétt fyrir uppbótartíma kom hann inn á og þá misstu City menn leikmann af velli þegar De Bruyne meiddist illa undir lokin.

City menn því einum færri í fimm mínútur af viðbótartíma og Everton reyndu hvað þeir gátu til að jafna en ekki tókst það. City menn fara því áfram í úrslit Deildarbikarsins á kostnað okkar manna.

Heldur súrt að horfa upp á, sérstaklega í ljósi þess að síðustu tvö mörk þeirra þóttu vafasöm (sérstaklega það sem De Bruyne skoraði), en svona er þetta bara. Óheppni og léleg dómgæsla hefur gert útslagið í síðustu þremur leikjum Everton í röð núna: tvö vafasöm mörk í kvöld, deflection mark hjá Swansea í deild (og City í þessum leik) og svo kolólöglegt mark hjá Chelsea á brúnni þegar komið var vel fram yfir uppbótartíma. Varla einleikið en hlýtur að fara að falla með okkar mönnum bráðum.