Everton – Man United 2-0

Mynd: Everton FC.

Enn á ný er uppskera David Moyes í þessum viðureignum Everton og Manchester United afskaplega rýr. En við grátum það ekki lengur. Uppstillingin komin: Howard (fyrirliði), Baines, Distin, Stones, Coleman, McCarthy, Barry, Mirallas, Barkley, Naismith og Lukaku. Varamenn: Robles, Hibbert, McGeady, Deulofeu, Osman, Garbutt, Alcaraz.

Leikurinn var í járnum framan af og liðin skiptust á að ná yfirhöndinni. Lítið um alvöru færi í byrjun, kannski helst eitt sem Naimsith fékk en skaut yfir — og sömuleiðis lítið um skot að marki. En svo náði Everton að brjóta ísinn þegar Phil Jones, sem lá í teignum, varði skot Lukaku með hendi á 26. mínútu. Og Clattenburg dæmdi víti, ótrúlegt en satt! Baines setti boltann í mitt markið. 1-0 fyrir Everton. Everton hefði reyndar geta fengið aðra vítaspyrnu nokkru áður í leiknum, að mér sýndist — þó ég hafi ekki náð endursýningunni, en Clattenburg ekki sammála því. Hann gat þó ekki sleppt tveimur vítaspyrnum í röð — það hefði verið full gróft!

Eftir 35 mínútna leik var United ekki búið að hitta einu sinni á mark Everton og átti aðeins eftir að ná því einu sinni í öllum hálfleiknum, að mig minnir, en það var skalli beint á Howard upp úr horni, rétt fyrir hálfleik.

Mirallas átti stórhættulega fyrirgjöf frá hægri sem Lukaku reyndi að renna sér á og var hársbreidd frá því að ná til knattarins og stýra honum í netið.

United héldu boltanum nokkuð vel og náðu pressu á Everton en mikill meirihluti sókna þeirra virtist brotna niður þegar boltinn nálgaðist vítateiginn enda leikmenn Everton með góða einbeitingu gegnum allan leikinn og fljótir að stíga út, mæta mönnum og eyða hættunni. Þeir voru auk þess mjög vakandi fyrir skyndisóknum og uppskáru vel eftir eina slíka.

Það var á 41. mínútu þegar Everton náði flottri skyndisókn sem endaði með því að Coleman sendi frábæra stungusendingu á Mirallas sem hljóp inn í teig hægra megin, var spilaður réttstæður af vinstri bakverði United (Buttner) og setti boltann í netið framhjá De Gea. 2-0. Allt brjálað á Goodison Park!

United áttu skalla úr horni rétt fyrir hálfleik, en beint á Howard eins og áður sagði.

2-0 í hálfleik og þó United hefðu verið meira með boltann virkuðu þeir síður en svo sem vel smurð vél. Everton hafði sýnt góða baráttu og varist vel þegar á reyndi. Vel verðskuldað að vera 2-0 yfir. Maður var smeykur við þennan leik fyrirfram en í hálfleik var ekki laust við að maður undraðist hvað þetta hefði verið auðvelt í fyrri hálfleik. Distin út af í hálfleik og Alcaraz inn á.

United setti pressu á Everton í upphafi seinni hálfleiks, Rooney komst í hálffæri upp við mark sem var hreinsað í horn og Kagawa reyndi skot af löngu en beint á Howard. En svo náði Everton að komast betur í takt við leikinn.

Alcaraz átti skalla úr horni stuttu síðar en beint á De Gea. Lítil hætta. United svaraði í sömu mynt; með auðveldum skalla frá Kagawa beint á Howard á 58. mínútu.

Mirallas, sem átti frábæran leik í dag, bjó til færi fyrir Lukaku upp úr nánast engu með mjög langri sendingu fram af hægri kanti inn í teig, kom honum inn fyrir vörn United en skot Lukaku ekki nógu gott og því varið. Á þeim tímapunkti var um klukkutími liðinn af leiknum og Everton átt fjögur skot á markið en United aðeins eitt.

Pirringurinn í United mönnum jókst með hverri mínútunni sem leið og náði hámarki þegar Rooney reyndi ljóta tæklingu á McCarthy og hefði það getað endað illa. McCarthy lá eftir þau viðskipti og haltraði nokkuð eftir en Rooney slapp við spjald.

Barkley út af fyrir Osman á 69. mínútu.

Mirallas skapaði aftur færi, í þetta skipti á 76. mínútu, og kom þar með Naismith í dauðafæri en Naismith náði ekki að klára það. Þremur mínútum síðar kom aftur skyndisókn frá Everton: fjórir sóknarmenn á móti þremur varnarmönnum United sem endaði með því að boltinn barst til Naismith vinstra megin í vítateignum sem náði mjög flottu skoti. De Gea þurfti að hafa sig allan við, kastaði sér á fjærstöngina og rétt náði að slá boltann í horn. Var á leiðinni stöngina inn og United menn prísuðu sig sæla. Ekkert kom þó úr horninu né næstu skyndisókn Everton.

Rooney var næstum búinn að minnka muninn rétt fyrir lok leiks þegar hann fékk stungusendingu inn í teig vinstra megin og komst einn á móti markverði en Howard varði stórglæsilega í horn af „point blank range“.

Everton svaraði með þungri sókn og skoti frá Mirallas sem var varið í horn — sem ekkert kom úr. McGeady kom inn á í blálokin en breytti litlu. Lokastaðan 2-0 og stuðningsmenn Everton sungu til Moyes „You’re getting sacked in the morning“!!

Frábær sigur í dag. 6 stig tekin af United á tímabilinu, í fyrsta skipti síðan 1969. Ekki slæmt og enn séns á sæti í Meistaradeild!

Einkunnir Sky Sports: Howard 7, Baines 7, Distin 7, Stones 9, Coleman 9, Barry 7, McCarthy 7, Mirallas 8, Barkley 6, Naismith 7, Lukaku 8. Varamenn: Alcaraz 8, Osman 5, McGeady 5. United með heila NÍU leikmenn sem fengu 5 í einkunn, þar af sjö úr byrjunarliðinu! Þrír aðrir með 6 og markvörður þeirra með 7. Minnir að þetta séu lægstu einkunnir sem ég hef séð andstæðinga Everton fá á Goodison Park á tímabilinu!

Gleðilega páska!