Austria Vín – Everton 2-1

Mynd: Everton FC.

Meistari Elvar Birgis sá um að fylgjast með þessum leik og ritaði hann eftirfarandi skýrslu:

Fyrsti leikur Everton á undirbúningstímabilinu 2013-2014 lauk með tapi gegn Austria Vienna með tveimur mörkum gegn einu marki Everton. Þetta var jafnframt fyrsti leikur liðsins undir stjórn hins nýja stjóra Roberto Martinez.

Þrátt fyrir tap þá var margt jákvætt í þessum leik og greinilegt að nýi stjórinn verður með nýjar áherslur við uppstillingu liðsins og verður forvitnilegt að sjá hvort Everton liðið muni verða beittara á fremsta hluta vallarins á komandi leiktíð.

Byrjunarliðið var Robles, Browning, Jagielka, Duffy, Baines, Osman, Gibson, Pienaar, Naismith, Vellios og Gueye. Martinez skipti flestum leikmönnum út af í hálfleik og þeir sem fengu að spreyta sig í þeim síðari voru Hibbert, Distin, Oviedo, Grant, McAleny, Junior, Fellaini, Kennedy, Anichebe og Mirallas.

Það voru því fjölmargir ungir leikmenn sem fengu að spreyta sig og enn eru nokkrir leikmenn í fríi en koma til með að bætast í hópinn í næstu viku.

Fyrra mark Austria kom á 14 mínútu eftir klaufalega sendingu Osman Jagielka á Osman (sem skrikar fótur á blautum vellinum) og Stankovic kemst inn í sendinguna og skorar fyrir heimamenn. Á 38 mínútu skoraði Stankovic úr vítaspyrnu eftir að Shane Duffy hafði handleikið knöttinn í vítateignum. Aðeins 2 mínútum síðar skoraði Vellios fyrir Everton eftir frábæra sendingu frá Baines. Skömmu síðar átti Everton að fá dæmt víti þegar brotið var greinilega á Naismith. Mirallas fékk síðan gullið tækifæri til að jafna einn á móti markmanni en í stað þess að setja boltann í marknetið ætlaði hann sér að leika á markvörðinn með smá krúsídúllum en markmaðurinn sá við honum.

Úrslitin verða þó að teljast sanngjörn þar sem Austria áttu nokkur góð færi sem voru t.a.m. glæsilega varin af Robles og þeir áttu einnig stangarskot. Þess má geta að Austria er að ljúka sínu undirbúningstímabili svo þeir komu betur undirbúnir til þessa leiks.

Hinn 21 ára gamli spænski markmaður sem Everton var semja um kaup á með 5 ára samningi stóð sig mjög vel og varði t.a.m. í þrígang maður á móti manni. Stór, stæðilegur og snöggur drengur þarna á ferð. Af ungu strákunum var Grant einna bestur en aðrir áttu frekar rólegan dag og Junior vil ég segja stóð sig síst af þeim ungu. Vellios gerði vel í markinu þar sem hann skallaði í markið og einnig var Fellaini sjóðandi heitur, þennan mann má bara ekki selja takk fyrir. Oviedo var magnaður sem og Baines og Gibson átti einnig fínan leik. Duffy fór vaxandi þegar leið á leikinn en hann fékk að spila allan leikinn. Hibbert var solid og Naismith kom eilítið á óvart.

Heilt yfir fannst mér hópurinn léttari á sér en maður hefur vanist í fyrsta leik á undirbúningstímabili og einnig var liðið að spila vel á köflum.

Næsti leikur liðsins er næstkomandi miðvikudag þar sem leikið er gegn Accrington Stanley úti og hefst leikurinn kl. 18:45 (að íslenskum tíma). 10 dögum síðar er leikið gegn Blackburn áður en liðið heldur til USA og spilar 3 magnaða leiki gegn Juventus og Real Madrid (eða LA Galaxy) og endar ferðina þar að spila við eitt eftirtalinna liða, AC Milan, Inter Milan, Valencia eða Chelsea, óhætt að segja að um veislu verði að ræða og væri magnað að sjá Everton leika gegn Real Madrid og annað Milan liðið auk Juventus. Undirbúningstímabilið endar með leik á Goodison þar sem Everton fær Real Betis í heimsókn.

Hægt er að horfa á 6 af leikjum undirbúningstímabilsins á EvertonTV þar sem hægt er að kaupa aðgang að 1 leik, USA leikjunum eða alla leikina.