Undirbúningur á fullu og einn þjálfari ráðinn

Mynd: Everton FC.

Roberto Martinez lét aldeilis til sín taka á leikmannamarkaðinum undanfarna daga og maður átti jafnvel von á að leikmennirnir héldu áfram að streyma inn. Þetta reyndist þó rólegri dagur en undanfarið en samt var eitthvað nýtt að frétta því ráðið var í þjálfunarstöðu. Dennis Lawrence var nefnilega í dag kynntur sem aðstoðarmaður Alan Stubbs við þjálfun á U21 árs liðinu (sjá viðtal). Dennis var partur af þjálfarateyminu hjá bæði Wigan og Swansea og þessi ráðning kemur því kannski ekki á óvart en það var snemma augljóst að Martinez vildi ekki bara þá sem stóðu upp úr sem leikmenn Wigan með sér til Everton heldur einnig þá stjórnendur sem hann treysti til að hafa sér við hlið. Lawrence er þegar mættur til starfa í Austurríki til að vinna með leikmönnum á undirbúningstímabilinu.

Leikmenn Everton flugu á þriðjudeginum til Austurríkis, fengu höfðinglegar móttökur og hafa nú nokkra daga til að undirbúa sig undir leikinn við Austria Vín (sem leikinn verður á sunnudaginn). Yfirlit yfir fyrsta daginn má sjá hér: myndasafn og vídeó. Myndasafn af degi 2 er svo hér en hægt er einnig að lesa hugrenningar Vellios-ar um fyrstu daga æfinganna hér. Og ekki má gleyma skemmtilegu viðtali við Silvain Distin.

Fimm beinar útsendingar af leikjum Everton í bresku sjónvarpi voru kynntar í dag og raskast leikjaplanið eitthvað af þeim sökum en fjórir heimaleikir og einn útileikur verða sýndir beint: Chelsea (heima), Newcastle (heima) Manchester City (úti), Tottenham (heima) og leikurinn við litla bróður (heima). Íslendingar þurfa þó ekki að hafa áhyggjur af beinum útsendingum því eftir því sem ég kemst næst hafa 365 miðlar tryggt sér réttinn til að sýna vel flesta leikina beint hér á landi.

Þetta er einnig tíminn fyrir slúðrið en nokkrir leikmenn voru orðaðir við klúbbinn í viðbót við þá sem komnir eru: Junior Malanda, Mohammed Rabiu, Aiden McGeady og Victor Moses að láni.