Arsenal – Everton 0-0

Mynd: Everton FC.

Everton mætti Arsenal á útivelli í kvöld í fjörugum og skemmtilegum leik sem var í járnum allan tímann en reglulega leit út fyrir að öðru liðinu myndi takast að stela sigrinum.

Barkley kom óvænt inn í byrjunarliðið þar sem kletturinn okkar á miðjunni, Osman, náði ekki í hópinn, líklega vegna meiðsla. Fellaini tók hans stöðu og Barkley fékk að spila í holunni. Uppstillingin því: Howard, Baines, Distin, Jagielka, Coleman. Pienaar og Mirallas á köntunum, Gibson og Fellaini á miðjunni. Barkley í holunni fyrir aftan Anichebe.

Everton byrjaði leikinn af krafti, var meira með boltann og skapaði sér þrjú færi/hálf-færi í fyrri hálfleik. Mirallas komst einn á móti markverði en missti boltann of langt frá sér þannig að markvörðurinn náði til hans. Gibson átti síðar flotta fyrirgjöf en vantaði mann. Jagielka (eða var það Coleman?) sendi svo stoðsendingu á 7. mínútu sem splundraði vörn Arsenal og setti Pienaar inn fyrir — einan á móti markverði en Pienaar skaut yfir slána úr ákjósanlegu færi. Illa farið með gott færi. Everton var nokkuð mikið með boltann og alltaf að „banka á dyrnar“ í leit að glufum en tókst ekki að komast í nógu góð færi.

Merkilega lítið að gerast hinum megin vallarins en Arsenal náði lengi vel ekki einu sinni skoti á markið og þegar það loksins tókst (á 24. mínútu) var skotið slakt og Howard ekki í neinum vandræðum. Fellaini greinilega vorkenndi þeim þegar hann átti furðulega hreinsun (innan okkar teigs) beint á sóknarmann Arsenal utan teigs en sá þakkaði bara fyrir sig og skaut yfir.

Næst fór svo í hönd tímabil þar sem liðin skiptust á að missa boltann og brjóta á hvoru öðru. Gibson fékk gult fyrir… tja, eitthvað sem mér sýndist Mirallas gera og hann var svo stálheppinn að fá ekki annað gult þegar hann stoppaði hraðaupphlaup með því að stíga fyrir sóknarmann Arsenal. Dómarinn var alls ekki samkvæmur sjálfum sér í fyrri hálfleik — kannski í þessu tilfelli að jafna fyrir mistökin áður en það var nokkuð um það að hann spjaldaði Everton leikmann og sleppti svo Arsenal manni fyrir sambærileg eða verri brot. Giroud fékk t.d. að klippa niður Coleman að aftan frá og sleppa alveg með það.

Barkley átti skot af löngu færi rétt fyrir hálfleik, alveg út við stöng en markvörður Arsenal varði. Barkley lagði svo boltann fyrir Anichebe sem var næstum kominn einn á móti markverði en varnarmaður Arsenal náði að pota í boltann.

Arsenal menn lifnuðu eiginlega ekki við fyrr en rétt fyrir hálfleik og fengu færi leiksins úr skyndisókn, frábær fyrirgjöf frá hægri (Ramsey?) og þar var Giroud mættur einn á móti markverði með varnarmenn í bakinu en stýrir boltanum á óskiljanlegan hátt framhjá markinu. Persie hefði klárað það færið. 0-0 í hálfleik.

Everton byrjaði seinni hálfleikinn vel og náði pressu á Arsenal en þeir komust smám saman betur inn í leikinn og komust í sífellt hættulegri færi. Til dæmis þegar Baines átti aukaspyrnu á frábærum stað sem fór í vegginn og allt í einu komin stórhættuleg skyndisókn hinum megin, sem fjaraði svo reyndar út, sem betur fer. Sama með aðra stórhættulega skyndisókn þeirra nokkru síðar, reyndar. Stígandi samt hjá Arsenal, þó þeir næðu aðeins einu skoti á mark fyrsta klukkutímann (í 6 tilraunum) á móti þremur frá Everton (í jafn mörgum tilraunum).

Síðasta hálftímann var nokkuð meiri pressa á Everton en fyrstu tvo og Arsenal fengu nokkrar hornspyrnur í röð og einhverjar aukapsyrnur en vörnin hélt vel. En á 66. mínútu kemur moment leiksins þegar Barkley fékk boltann rétt utan teigs, lék á Arteta (að mig minnir) og náði að komast frá Wilshere og skaut þessu líka glæsiskoti að marki. Boltinn hins vegar sleikti utanverða stöngina við samskeytin en markvörðurinn átti ekki séns í boltann. Þetta var svona „Remember the name!!“ moment, samanber þegar Rooney skoraði sigurmarkið… gegn Arsenal á Goodison.

Pressan jókst þó stöðugt frá Arsenal en Everton gerði vel í að vera alls staðar fyrir og koma í veg fyrir að Arsenal menn kæmust í almennileg færi. Lappirnar á Fellaini þvældust alls staðar fyrir öllum boltum og Distin og Jagielka áttu fantagóðan leik sem og Coleman sem var algjörlega frábær í leiknum — skapaði usla frammi og var fyrsti maður aftur til að stoppa sóknir Arsenal manna. Eins og þegar hann stal boltanum af Arteta sem var að komast í dauðafæri. Arsenal mun hættulegri og litu oft út fyrir að vera að fara að skora en bæði lið greinilega staðráðin í að sækja sigur.

Anichebe komst reyndar í færi rétt undir lok leiksins þar sem hann átti að gefa sendingu út til hægri í teignum á mann í dauðafæri en ákveður að einhverjum orsökum að skjóta í staðinn af löngu færi og yfir. Honum var kippt út af med det samme á 90. mínútu fyrir Naismith. Jelavic hafði auk þess komið inn á tæpum 15 mínútum áður.

Þetta fjaraði svo út í lokin — engin almennileg færi í lokin og þrátt fyrir að bæði lið hefðu fengið tækifæri til að taka þrjú stig í leiknum endaði þetta því markalaust. Maður sér mikið eftir að Everton hafi ekki sett mark í fyrri hálfleik (hvað þá ef Barkley hefði skorað glæsimark í seinni!). Jafntefli mjög sanngjörn úrslit, þó maður hefði náttúrulega vonast eftir þremur stigum til að hleypa spennu í baráttuna um meistaradeildarsæti. Það er þó alls ekki slæmt að taka stig af erfiðum útivelli og spilamennskan fín.

Einkunnir Sky Sports: Howard 7, Baines 8, Distin 8, Jagielka 9, Coleman 8, Pienaar 6, Fellaini 8, Gibson 6, Mirallas 8, Barkley 8, Anichebe 5. Varamenn: Jelavic 6, Oviedo og Naismith með 5 (fengu bara örfáar mínútur). Svipaðar einkunnir hjá Arsenal, en nokkuð lægri: þrjár áttur, fjórar sjöur og fjórar sexur.

Nokkuð sammála einkunnagjöfinni. Vörnin öll og Howard í fantaformi, sérstaklega Jagielka og Coleman. Anichebe og Gibson áttu meira en 5 skilið og Barkley var frábær. Alltaf óttaðist maður það versta þegar hann fékk boltann þar sem hann getur verið mistækur, enda ekki nema táningur en hann átti flottan leik og hefði átt markið skilið (sem hann setti næstum því).

Draumurinn um meistaradeildarsætið ekki alveg úti en erfitt prógram fyrir höndum. Tveir næstu leikir (Sunderland úti og Fulham heima) eru leikir sem hafa reynst okkur vel undanfarin ár. Vonandi bara að sigurgangan haldi áfram þar. Áfram bláir!