Southampton – Everton 0-0

Mynd: Everton FC.

Everton mætti Southampton á útivelli í kvöld í leik sem lyktaði með 0-0 jafntefli. Þetta var fyrsti leikur Southampton undir nýjum stjóra eftir að Nigel Adkins (sem kom þeim upp um tvær deildir á tveimur tímabilum) var rekinn og það var greinilegt að allir leikmenn Southampton litu á þetta sem tækifæri til að sanna sig fyrir nýjum stjóra því þeir mættu grimmir til leiks og börðust af hörku um alla bolta, ljónhungraðir í sigur.

Uppstillingin kom svo sem ekki á óvart: Howard, Baines, Distin, Jagielka, Coleman. Pienaar á vinstri, Naismith á hægri. Osman og Neville á miðjunni. Fellaini fyrir aftan Jelavic. Naismith líklega umdeildasta valið. Mirallas á bekknum, sem var mjög kærkomið eftir tveggja mánaða meiðsli og Anichebe, super-söbbinn okkar, á bekknum líka. Heitinga sömuleiðis kominn aftur úr meiðslum. Gott að fá þessa menn aftur og Gibson og Hibbo vonandi ekki langt undan.

Fyrri hálfleikurinn var merkilega tíðindalítill af hálfu Everton og mjög lítið að gera í framlínunni því Everton liðið komst aldrei í gang fyrstu 45 mínúturnar og maður fór guðslifandi feginn með jafntefli í hálfleik því Southampton átti öll bestu færin og hefðu getað skorað ein þrjú mörk í fyrri hálfleik eða svo. Everton átti sinn versta hálfleik á tímabilinu. Einn í salnum (Eyþór) hafði á orði að Everton ætti að leyfa þeim að skora eitt mark til að vekja okkar menn af dvala. Þetta var alls ekki Everton liðið sem maður kannaðist við úr fyrri leikjum á tímabilinu og ekki að sjá að Southampton væri í neðri hluta deildarinnar. Einu færi Everton komu frá Naismith, fyrst skot meðfram jörðu sem markvörður varði og svo var Naismith með hálf-færi sem næstum skapaði dauðafæri. Þar með var það upptalið. Southampton mun meira með boltann, með mun fleiri horn og mun fleiri skot að marki. Þeim var bara fyrirmunað að skora. Annað hvort fóru þeir illa með gott færi eða Howard vel á verði í markinu.

Moyes hefur lesið yfir hausamótunum á leikmönnum því seinni hálfleikur var snöggtum skárri. Fellaini átti skot og Osman af löngu færi en hvorugt nýttist. Leikurinn batnaði þó sérstaklega með tilkomu Anichebe á 58. mínútu sem kom inn á fyrir Coleman (sem meiddist í leiknum). Coleman hefur því rétt rúmar tvær vikur til að ná sér heilum ef hann ætlar að ná leik írska landsliðsins þann 6. febrúar en hann var á dögunum valinn í hóp þeirra sem mæta Póllandi. Anichebe breytti leiknum töluvert því hann kom með ferskan blæ inn í liðið og náði strax að koma sér í færi og skapa færi fyrir aðra. Allt gott sem kom frá Everton í þessum leik fór í gegnum Anichebe, þar með talið fyrirgjöf fyrir markið þar sem Jelavic fékk frítt skot í dauðafæri en hitti ekki boltann og var skipt út af stuttu síðar. Anichebe átti líka frábært skot sem markvörður Southampton varði glæsilega og Anichebe lagði svo upp skotfæri fyrir Mirallas sem hitti ekki markið, greinilega ryðgaður eftir litla spilamennsku undanfarna tvo mánuði.  Moyes prófaði ýmsar útfærslur af kantmönnum í leiknum, prófaði Fellaini djúpan og Fellaini í holunni, Osman prófaði holuna og Mirallas lét sjá sig bæði á vinstri kanti og frammi með Anichebe, en allt kom fyrir ekki.  Þetta gekk ekki upp, ekki einu sinni manni fleiri þegar Puncheon, liðsmaður Southampton, þurfti að fara af velli til að kasta af sér þvagi. Grínlaust. Hvað er að frétta — er þetta Old Boys deildin??

Markverðirnir vörðu þó allt sem á markið kom og því endaði þetta með markalausu jafntefli í nokkuð fjörugum leik.

Einkunnir Sky Sports: Howard 7, Baines 7, Jagielka 5, Distin 6, Coleman 7, Pienaar 5, Osman 6, Neville 6, Naismith 6, Fellaini 7, Jelavic 5. Varamenn: Mirallas 6, Anichebe 7. Mér fannst Howard og varamaðurinn Anichebe eiga áttu skilið í leiknum og miðverðirnir okkar voru ekki svona lélegir. Ekki hægt að kvarta mikið yfir restinni þó mér finnist sumir eiga lægra skilið og aðrir aðeins (en alls ekki mikið hærra) skilið.