Everton – Liverpool 2-2

Mynd: Everton FC.

Í kvöld var komið að allra síðasta derby leiknum á Goodison Park þegar Liverpool kom í heimsókn í leik sem upphaflega átti að fara fram í desember en var frestað vegna veðurs.

Sú frestun kom sér ágætlega fyrir Everton því að gengi liðsins í desember var ekki upp á marga fiska, en algjör viðsnúningur hafði átt sér stað með endurkomu David Moyes og liðið hafði unnið síðustu þrjá úrvalsdeildarleiki í röð.

Bæði lið voru þó svolítið að sleikja sárin eftir að hafa dottið út úr FA bikarnum um síðustu helgi. Everton tapaði 2-0 gegn Bournemouth, sem voru búnir að vera á töluverðri siglingu í úrvalsdeildinni, á meðan Liverpool fengu háðulega útreið gegn botnliði ensku B-deildarinnar, Plymouth Argyle.

Nokkuð var um meiðsli í herbúðum okkar manna, en þeir Nathan Patterson, Seamus Coleman, Dwight McNeil, Dominic Calvert-Lewin, Armando Broja og Youssef Chermiti voru allir meiddir. Auk þess var óljóst með Vitaly Mykolenko, sem var hvíldur í FA bikarleiknum vegna minniháttar meiðsla á kálfa, en hann var þó orðinn heill fyrir leik. Nýi leikmaður okkar, Charly Alcaraz, byrjaði á bekknum.

Hvað Liverpool varðar þá voru þeir að spila sínu sterkasta liði en ég heyrði að varnarmaðurinn Joe Gomez hefði spilað á ný eftir meiðsli í FA bikarleiknum — en aðeins enst í 11 mínútur og haltraði þá út af.

Pressan var öll á Liverpool sem þurftu sigur í kvöld til að reyna að slíta sig frá liðunum sem eru að anda ofan í hálsmálið á þeim, en Goodison Park hefur ekki reynst þeim gjöful mið undanfarið, eins og við þekkjum, því þeir höfðu aðeins unnið tvo af síðustu 12 leikjum á okkar ástsæla heimavelli — og þurftu að auki að þola 2-0 tap á síðasta tímabili, sem gerði út um titilvonir þeirra, eins og kunnugt er. Gaman að rifja það upp hér…

Uppstillingin: Pickford, Mykolenko, Branthwaite, Tarkowski, O’Brien, Gana, Garner, Ndiaye, Doucouré, Lindström, Beto.

Varamenn: Virginia, Begovic, Keane, Young, Harrison, Alcaraz, Iroegbunam, Sherif, Heath.

Sem sagt, svipað upplegg og síðast, nema hvað Mykolenko kom inn í liðið í vinstri bakvörðinn, sem er mjög gott að sjá. Þetta er auk þess ekki alveg jafn þunnskipaður bekkur og í síðasta leik, en maður hefði kannski viljað sjá einn markvörð þar, frekar en tvo.

Leikmenn beggja liða virkuðu hálf taugaveiklaðir fyrstu tíu mínúturnar en það lagaðist þegar Everton fékk aukaspyrnu á 11. mínútu og skoruðu í kjölfarið.

Markið var einfalt, lág stunga frá Branthwaite í gegnum vörn Liverpool, beint í hlaupaleiðina hjá Beto. Hægri bakvörður þeirra spilaði Beto réttstæðan og hann setti boltann snyrtilega framhjá Allison. 1-0 fyrir Everton!

En Mac Allister náði að jafna með skalla á 15. mínútu eftir háa fyrirgjöf inn í teig. Hálfgert grísamark – skallaði aftur fyrir sig einhvern veginn og hitti rétt innfyrir stöng. Tvö mörk eftir samtals tvær tilraunir hjá liðunum.

En svo reið ógæfan aftur yfir þegar Ndiaye fór meiddur út af á 25. mínútu og Harrison kom inn á.

Liverpool fengu eitt færi í lok uppbótartíma, en Diaz var hvort eð er rangstæður. Ennþá bara eitt skot á mark hjá hvoru liði (ef löglegar sóknir eru taldar).

1-1 í hálfleik.

Everton fékk fínt færi á 53. mínútu þegar há sending kom inn í teig, beint á Doucouré, sem skallaði framhjá. Harrison átti svo skot að marki eftir að Doucouré og Beto náðu að fífla Van Dick, en skotið frá Harrison fór rétt framhjá stöng.

Á 57. mínútu átti Conor Bradley að fá sitt seinna gula spjald, fyrir að stoppa skyndisókn í fæðingu, og Michael Oliver fór í vasann… og hætti svo við. Týpískt. Slot kippti Bradley að sjálfsögðu strax út af. Guilty as charged. Alltaf þarf Liverpool hjálp frá dómurunum.

Og til að bæta gráu ofan á svart átti Everton að fá viti á 61. mínútu, þegar varnarmaður Liverpool sló boltann frá (innan teigs) þegar Beto var að komast í gegn. Ó. Þol. Andi.

Everton kom svo boltanum í netið á 67. mínútu, en O’Brien var réttilega dæmdur rangstæður í aðdragandanum.

Everton skapaði glundroða í vörn Liverpool á 70. mínútu, þegar Van Dick sendi boltann beint á Tarkowski, sem var við D-ið, en hann hikaði og sendi svo á Doucouré sem átti slakt skot.

Liverpool, sem ekki búið að geta rassgat í öllum seinni hálfleiknum, náðu að sjálfsögðu setja annað grísamark á 75. mínútu. Óverðskuldað mark og hver var þar að verki, annar en Salah, sem potaði inn eftir pinball í teignum? Fyrir utan eina háa stoðsendingu inn í teig hafði Salah ekki sést allan leikinn, sem við verðum að gefa Mykolenko hrós fyrir — hann virðist hafa ágætis tök á honum.

Gueye og Lindström fóru út af fyrir Alcaraz og Iroegbunam á 75. mínútu og Garner var svo skipt út af fyrir Young á 87. mínútu.

Ég verð líka að minnast á það að í lokin fékk Liverpool að klára skyndisókn þegar ekki færri en TVEIR leikmenn Everton lágu í grasinu með höfuðmeiðsli. Hvernig réttlætir maður svoleiðis?!?

En, sem betur fer var réttlætinu fullnægt þegar Everton jafnaði í blálokin — sem var ekkert nema sanngjarnt, þar sem Everton hafði verið betra liðið í seinni hálfleik. Everton fékk aukaspyrnu og náðu hárri sendingu fyrir mark frá vinstri kanti. Á leið sinni í gegnum teiginn fékk boltinn að skoppa milli manna, þangað til Iroegbunam framlengdi með skalla á Tarkowski sem þrumaði inn hægra megin í teig. Og það varð allt vitlaust.

YNDISLEGT!!

VAR reyndi sitt besta til að finna eitthvað til að bjarga Liverpool. Fyrst var rangstaða athuguð og útilokuð. Svo var einhver minniháttar snerting skoðuð en einnig útilokuð og þá fengum við að öskra úr okkur lungun aftur!

Áhorfendur sungu hástöfum annað árið í röð „You lost the league at Goodison Park!“. Vonandi reynist það rétt en allir góðir menn fögnuðu allavega innilega á Ölveri.

En þetta var ekki búið því í kjölfarið fylgdi yndisleg dramatík eftir að dómarinn flautaði til leiksloka, því Liverpool liðið gjörsamlega missti hausinn! Curtis Jokes fékk rautt spjald fyrir slagsmál, og Arne Slot og aðstoðarstjóri þeirra, Spike Hasselhöff, eða hvað hann nú heitir, fengu sömu meðferð fyrir mótmæli. Fyrir okkur Everton (og reyndar Arsenal stuðningsmenn líka) var þetta bara aukabónus fyrir kvöldið! Meira svona! It’s the gift that keeps on giving!

Einkunnir Sky Sports: Pickford (6), Mykolenko (6), Tarkowski (8), Branthwaite (7), O’Brien (6), Garner (7), Gueye (6), Doucoure (6), Ndiaye (6), Lindstrom (6), Beto (7). Varamenn: Harrison (6), Alcaraz (6), Iroegbunam (6).

Maður leiksins að mati Sky: James Tarkowski.

Ef ég á að segja alveg eins og er þá — miðað við hvernig seinni hálfleikur þróaðist — voru Liverpool menn heppnir að fara með jafntefli úr þessum leik.

Við sem styðjum Everton höldum okkar striki, lítum björtum augum til framtíðar með nýjum velli og nýjum sigrum þar — og kætumst enn á ný með þessu frábæra lagi frá Elton John!

I Guess That’s Why They Call It The Blues!

Áfram veginn!