Ipswich – Everton 0-2

Mynd: Everton FC.

Stórleikur áttundu umferðar ensku úrvalsdeildarinnar er viðureign Everton við Ipswich á þeirra heimavelli sem skv. plani átti að hefjast klukkan 14:00. Einhver tæknivandamál voru hins vegar að plaga gestgjafana fyrir leik, sem olli því að stuðningsmenn voru í vandræðum með að koma inn á leikvanginn og því var leiknum frestað um 15 mínútur til að reyna að leysa úr því.

Uppstillingin: Pickford, Mykolenko, Keane, Tarkowski (fyrirliði), Young, Gana, Doucouré, Ndiaye, McNeil, Harrison, Calvert-Lewin.

Varamenn: Virginia, Begovic, O’Brien, Coleman, Patterson, Dixon, Armstrong, Mangala, Beto.

Sem sagt, tvær breytingar frá leiknum við Newcastle, en Mykolenko kemur inn í liðið í stað Garner og fer í vinstri bakvarðarstöðuna og Gana kemur inn sem djúpur miðjumaður í stað Mangala. Þessar breytingar eru líklega vegna meiðsla, því hvorki Garner né Mangala eru í hóp. Branthwaite hvergi sjáanlegur heldur.

Leikurinn hófst kl. 14:17, Everton í svörtu og hvítu — heimaliðið Ipswich í bláu.

Ágætis byrjun frá Everton, létu boltann ganga vel og náðu fljótt að setja pressu á Ipswich. En það var Ipswich menn sem áttu fyrsta færið og það kom eftir eftir skyndisókn. Þeir gerðu vel í að ná að losna undan þungri pressu Everton og bruna hratt upp völlinn og koma boltanum á mann á auðum sjó inni í miðjum teig. Þurfti bara að setja boltann á rammann en lúðraði honum langt upp í stúku.

Everton fékk dauðafæri á 7. mínútu þegar Calvert-Lewin náði að stela boltanum af aftasta varnarmanni og komst einn á móti markverði — sem varði meistaralega frá honum. Bæði lið búin að fara illa með dauðafæri á upphafsmínútunum. Ipswich staðráðnir í að spila bolta alltaf út úr teig — án þess að vera með réttan mannskap í það, og það kom þeim næstum í koll þar. Það er fullt af mistökum að finna í vörn þeirra.

Og áður en 10 mínútur voru liðnar bættist annað dauðafæri við, þegar Ndiaye fann McNeil óvaldaðan inni í teig, nálægt D-inu, en, í stað þess að skjóta í fyrstu snertingu, reyndi McNeil að leggja boltann fyrir sig, sem hleypti Ipswich manni fyrir skotið og sótti þar með brot á McNeil.

En Everton náði að komast yfir á 18. mínútu eftir að tveir varnarmenn Ipswich afgreiddu ekki út úr teig háa fyrirgjöf frá Harrison af hægri kanti yfir á fjærstöng. Einn varnarmaður þeirra skallaði á samherja í eigin teig og sá einfaldlega lagði boltann snyrtilega fyrir Ndiaye sem þakkaði fyrir sig með því að þruma boltanum í netið. 0-1 fyrir Everton! 

Á 22. mínútu náðu miðjumenn Everton að finna Calvert-Lewin inni í teig með langri hárri sendingu og hann náði að snúa og skjóta, af sæmilega stuttu færi, lágum bolta á mark, en markvörður Ipswich kom þeim aftur til bjargar. McNeil var svo nálægt því að skora beint úr hornspyrnu eftir að markvörður var að gera sig kláran í eitthvað skógarhlaup út í teig. Markvörðurinn náði hins vegar að redda sér þar.

En á 28. mínútu dæmdi Michael Oliver, dómari leiksins, víti á McNeil þegar leikmaður Ipswich náði að þræða sig í gegnum vörnina og reyndi skot en sparkaði í legginn á McNeil í stað boltans. Við sáum þetta gerast í síðasta leik, gegn Newcastle — þegar Calvert-Lewin fékk ekki víti og VAR komst að réttri niðurstöðu í þetta skiptið (enda steig McNeil ekki á ökklann á sóknarmanni áður en hann plantaði fæti fyrir skotið, líkt og varnarmaður Newcastle í síðasta leik). 

Leikurinn var svolítið flatur í kjölfar vítaspyrnunnar sem var tekin aftur en á 40. mínútu komst Everton í 0-2 eftir horn! Smá fram og til baka inni í teig en á endanum datt boltinn fyrir McNeil, við D-ið, sem sneri á varnarmann og fann Keane með stungusendingu vinstra megin í teig. Sendingin var aðeins of utarlega í teignum og maður átti ekki von á að Keane næði að gera sér mat úr þessu — en það gerði hann með stæl. Brá sér í gervi Erling Haaland og þrumaði á nærstöng upp í þaknetið! Staðan orðin 0-2!

Ipswich höfðu á þessum tímapunkti enn ekki náð skoti á rammann, og það breyttist ekki fram að hálfleik. Everton hins vegar komið með fjórar tilraunir á rammann eftir mark númer tvö! Everton náði svo fimmtu tilraun á rammann á 48. mínútu, þegar Young reyndi skot beint út aukaspyrnu, en ekki mikil hætta.

0-2 í hálfleik. Everton mun betra liðið í fyrri hálfleik.

Á 55. mínútu tók miðvörður Ipswich sig til og nánast bara rétti Ndiaye boltann á miðsvæðinu. Ndiaye þakkaði pent fyrir sig og brunaði í skyndisókn sem endað með skoti á mark af nokkuð löngu færi, en markvörður varði. Sömuleiðis nokkru síðar þegar McNeil reyndi skot hægra megin í teig, utarlega, eftir horn á 61. mínútu.

Leikur Ipswich var hálf flatur í seinni hálfleik og lítil ógnun. Þeir reyndu tvær tvöfaldar skiptingar, sú fyrra hjálpaði þeim ekkert en þeir náðu smá pressu eftir þá síðari á 70. mínútu. En það skilaði sér ekki í almennilegum færum. Þeir náðu sínu fyrsta skoti á rammann á 80. mínútu (eftir tæpar 90 mínútur af fótbolta, ef aukamínúturnar 6 í fyrri hálfleik eru meðtaldar). Sú tilraun var hins vegar beint á Pickford og engin hætta. Mangala kom svo inn á fyrir Ndiaye á 82. mínútu — Ipswich þá búnir að skipta út helming af sínum útileikmönnum.

Ipswich menn náðu annarri tilraun á mark á 89. mínútu — það var langskot utan af velli en Pickford vel á verði og sló það til hliðar.

Everton fékk svo eitt dauðafæri í blálokin, þegar Harrison setti Calvert-Lewin inn fyrir vörnina með glæsilegri stungusendingu á síðustu sekúndum leiksins, þar sem Calvert-Lewin komst einn á móti markverði, en aftur sá markvörður við honum. Það reyndist það síðasta markverða sem gerðist í leiknum. 

Fyrsti útisigurinn þar með í höfn og hann var aldrei í hættu. Þetta var fjórði leikur Everton án taps í röð, með tvö stig að meðaltali í þeim leikjum. Fín frammistaða í dag frá Everton, sem voru mun betri aðilinn í leiknum og sáu til þess að eitt gult spjald væri það eina sem Ipswich tóku með sér úr leiknum.

Einkunnir Sky Sports: Pickford (7), Young (8), Tarkowski (7), Keane (8), Mykolenko (8), Gueye (7), Doucoure (7), Ndiaye (8), Harrison (7), McNeil (7), Calvert-Lewin (7). Varamenn: Mangala (6).

Hjá Ipswich náði enginn yfir 6 í einkunn og meirihluti byrjunarliðs þeirra fékk 5.

Maður leiksins að mati Sky var Michael Keane.