Everton.is

"El Pintita"

Skrifað af: Einar Guðberg Jónsson
Þriðjudagur, 15. desember 2009 17:48

Jæja nú hrynja inn slúðurfréttirnar af leikmannamarkaðinum. Staðfest hefur verið að Everton er búið að leggja inn 8,5 milljón evru boð í "El Pintita" eða Fernando Gago, en hann spilar með Real Madrid. Gago er frá Argentínu og heyrst hefur að hann sé mjög ósáttur við að hafa vermt tréverkið að mestu á leiktíðinni. Hann vill fara frá Madrid, en óvíst er hvort að Pellegrini vilji missa hann. Gago er 23 ára og varnarsinnaður miðjumaður, hann kom til Real frá Boca Juniors árið 2007. Hann hefur spilað 28 landsleiki fyrir A landslið Argentínu síðan 2007.

Þá eru bornar til baka sögur þess efnis að Rakitic sé á förum frá Schalke, hvorki til Everton né annars félags.

Heyrst hefur einnig að Moyes ætli að bjóða 6,6 milljónir evra í Aiden McGeady sem spilar með Celtic. Aiden er 23 ára írskur kantmaður og hefur spilað yfir 200 leiki með Celtic og skorað í þeim 30 mörk. Greinilegt er að Moyes einblínir á miðjumenn fyrir janúargluggann.

Stærsta fréttinn er kannski sú að Moyes hefur sagt að hann hafi ekki á móti því að deila leikvangi með Liverpool. Hann sagði að saga félagana væri svo samtvinnuð að það ætti ekki að vera vandamál. Spurning hvort menn hafi álit á þessu?

Góðar stundir.

Nokkrar stuttar

Skrifað af: Einar Guðberg Jónsson
Þriðjudagur, 15. desember 2009 08:16

Liverpool er að undirbúa 7 milljóna punda boð í Lois Saha, þeir vilja að hann komi á Anfield og spili við hliðina á Torres. Moyes sagði að samingaviðræður væru í gangi við Saha og hann vonaðist til að samningar náist fljótlega, ekkert hefur heyrst frá Saha sjálfum. Nokkur lið á meginlandinu vilja fá Saha til sín og hann getur byrjað viðræður við þau lið í janúar, en ljóst þykir að hann klári tímabilið með Everton.

Howard var fyrirliði í fyrsta skipti gegn Chelsea, hann sagðist hafa verið að rifna úr stolti. "Það er ekki á hverjum degi sem maður fær á sig þrjú mörk og fer af velli skælbrosandi", þetta sagði Howard eftir leikinn.

Þá að leikmannamarkaðinum. Heyrst hefur að Moyes sé búinn að kokka upp 7 milljóna punda boð í Lewis Holtby, leikmann Schalke. Þessi strákur er 19 ára og er talinn vera eitt mesta efni Þjóðverja. Þó svo að hann sé nýlega kominn til Schalke og er með 4 ára samning þá getur hann farið frá Schalke sem er í gríðarlegum fjárhagsvandræðum. Faðir Holtby er enskur og frá Liverpool og líkt og faðir sinn er Holtby mikill Everton aðdáandi og væri meira en lítið til í að spila fyrir Everton.

Einnig hefur heyrst að Everton séu búnir að bjóða ungum dönskum markverði, Nicolai Larsen, að spila reynsluleik gegn Celtic. Þessi markvörður spilar með u-19 ára landsliði Dana.

Meira síðar, góðar stundir!

Útungunarvélin hjá Everton

Skrifað af: Einar Guðberg Jónsson
Mánudagur, 14. desember 2009 11:17

Ég rakst á grein á Aboutaball.co.uk um Akademíuna hjá Everton. Þar er verið að segja að Everton geti tekið hrós fyrir þeirra starf þar. Í greininni er sagt frá því að á meðan þeir klúbbar sem hafa verið taldir bestir í ungliðastarfinu, Arsenal, Man Utd og fleiri, leita til meginlands Evrópu eftir ungum leikmönnum. Leitar Everton uppi leikmenn frá Bretlandseyjum. Mikið lof er borið á ungliðastarf Everton í þessari grein og hvet ég ykkur til að skoða hana, en hana má nálgast hér.

Ekki er margt nýtt að frétta af leikmannamarkaðnum en líklegt er að samingar náist um Landon Donovan á næstu dögum, eða allavegana fyrir jól, þetta er þó algjörlega óstaðfest.

Þá er Moyes að skoða 22 ára skoskan framsækinn miðjumann eða sóknarmann. Graham Dorrans frá West Brom, talið er að verðmiðinn á honum sé 4 milljónir punda. Moyes verður að keppa við Sunderland, Villa, Birmingham og Stoke til að ná honum til Everton. Graham þessi hefur náð þokkalega góðum árangri með West Brom og er talinn vera nokkuð gott efni.

Ég mun reyna að setja inn allt slúður og staðfestar fréttir af leikmannamarkaðinum um leið og þær berast.

Góðar stundir!

Þetta mjakast!!

Skrifað af: Einar Guðberg Jónsson
Sunnudagur, 13. desember 2009 09:06

Góðan daginn, í gær náðist fínn árangur með því að gera 3-3 jafntefli við Chelsea. Held að maður verði að vera ánægður með þau úrslit í ljósi meiðslalista okkar. Saha heldur áfram að halda okkur á floti. Þess vegna eru ekki nógu góðar fréttir að Saha hefur ekki skrifað undir nýjan samning hjá Everton. Klausa í samningi hans gerir það að verkum að hann getur samið við hvaða lið sem er núna í janúar. Heyrst hefur að erkióvinirnir í Liverpool séu á höttunum á eftir Saha. Benitez er loks búinn að fatta að hann þarf einhvern frammi við hliðina á Torres. Nú er bara vonandi að Moyes nái að fá Saha til að setja nafn sitt á blað. Við þurfum á honum að halda.

Þá hefur heyrst að Man. Utd og Chelsea hafi mikinn áhuga á að fá Jack Rodwell til sín. Rodwell hefur þó gefið það út að hann sé hollur David Moyes og vilji ekki fara frá Everton. Hann segir að Moyes hafi treyst á hann og þakkar honum fyrir að hafa gefið honum tækifæri þegar hann var 16 ára gegn AZ Alkmaar og varð þar af leiðandi yngsti leikmaður Everton til að leika í Evrópukeppni.

Nú fyrst Yobo er orðinn meiddur er líklegt að Moyes þurfi að leita fyrir sér á leikmannamarkaðnum að varnarmanni sem og sóknarmanni. Moyes hefur viðurkennt að viðræður við Landon Donovan séu komnar langt á leið og það styttist í að þeir geti gefið upp hvort samingar hafi náðst eður ei.

Þá hefur heyrst að Moyes sé að skoða Ivan Rakitic, leikmann Shalcke í þýskalandi. Fjárhagserfiðleika þýska liðsins hefur gert það að verkum að nokkrir hátt launaðir leikmenn þeirra verða seldir á klink í janúar. Rakitic er vinstri vængmaður sem hefur þó spilað sem sóknarmaður með landsliði Króatíu.

Þá er einnig talið að Everton, ásamt fleiri liðum muni skoða Kazim-Richards, leikmann Fenerbache, en hann hefur verið settur á sölulista eftir að hafa verið uppvís að kynlífshneiksli ásamt fleiri liðsfélögum sínum.

Meira síðar, góðar stundir!

Janúar nálgast!!!

Skrifað af: Einar Guðberg Jónsson
Miðvikudagur, 09. desember 2009 13:24

Það er svo sem ekki mikið að frétta af markaðinum, eða hvað Moyes er að spá. Það eina sem staðfest er að Moyes er að reyna að fá Landon Donovan að láni frá LA Galaxy. Það gæti reyndar verið ágætis hugmynd.

Landon Donovan er 27 ára gamall, hann hefur leikið með LA Galaxy síðan árið 2005 og skorað fyrir þá 64 mörk í 121 leik. Hann hefur áður reynt fyrir sér í Evrópu en kannski ekki alveg náð að festa sig þar. Hann hefur spilað 120 A landsliðsleiki fyrir Bandaríkinn og skorað í þeim 42 mörk. Hér má sjá myndband af Landon.

Þá eru nú einhverjar hugmyndir upp að Moyes sé á eftir Diego Forlan, þó er talið að hann sé utan þess verðbils sem Moyes hefur á milli handanna.

Meira síðar, góðar stundir!

"Everton getur ekki skorað inn um hlöðudyr."

Skrifað af: Einar Guðberg Jónsson
Þriðjudagur, 01. desember 2009 14:50

Ekki fór nú vel fyrir okkar mönnum á sunnudaginn, en það þýðir ekki að væla það. Tim Cahill hefur reyndar gefið frá sér yfirlýsingu sem hljóðar eitthvað í líkingu við að "leikmenn Everton gætu ekki skorað um hlöðudyr." Vonandi er það nú ekki alveg rétt, en nokkuð ljóst þykir að menn þurfa að fara að reima skónna betur á sig.

Næsta verkefni er á morgun 2.desember klukkan 18:00, en þá er leikur í evrópudeildinni gegn AEK. Sigur er nauðsyn til að halda okkur inni í þeirri keppni. Yobo verður ekki með, eins eru Heitinga og Neill ekki gjaldgengir í leikinn. Talið er að Moyes muni spara Saha fyrir leikinn gegn Tottenham. Líklegt byrjunarlið er Howard; Gosling, Hibbert, Distin, Baines; Rodwell, Bilyaletdinov, Fellaini, Pienaar; Cahill ©; Jo.

Þá hefur heyrst að Moyes sé mjög hrifinn af Serbanum Danko Lazovic, sem leikur með PSV í Hollandi. Heyrst hefur að Danko sé til í að skipta yfir til Englands og Everton sé góður kostur í stöðunni. Moyes var að fylgjast með öðrum Serba Milan Jankovic en telur Danko betri kost. Spurning hvort að Moyes fái eitthvað fé til kaupa í janúar, en félagið skilaði 6,7 milljón punda tapi á árinu, sem er hrikalegur viðsnúningur. Kenwright er greinilega að leita mjög stíft að fjarsterkum aðilum til að koma að fjármögnun félagsins um þessar munir, hann hefur gefið það sterklega til kynna í fjölmiðlum upp á síðkastið. Einnig hefur hann gefið út stuðningsyfirlýsingu við David Moyes. Einnig er talið líklegt að Paul Scharner hjá Wigan komi yfir til Everton í janúar fyrir um 3 miljónir punda, en hann hefur gefist upp á Wigan. Ákvæði í samningi hans segir til um að það þurfi að borga 6 milljónir fyrir losun hans frá Wigan, en talið er að það gjald helmingist þar sem það er mjög stutt eftir af samningi hans.

Jæja þá er bara að vona það besta með morgundaginn, góðar stundir.