Everton – Man United 1-2

Mynd: Everton FC.

Vel á þriðja tug Íslendinga á pöllunum að horfa á þennan leik, þar með talið nær öll stjórn klúbbsins. Gaman að þessu! Meistari Ingvar Bærings reddaði skýrslu fyrir ritara og við kunnum honum besti þakkir fyrir og gefum honum orðið…

Uppstilling: Pickford, Mykolenko, Coady, Tarkowski, Coleman (fyrirliði), Gana, Onana, Iwobi, Gordon, Gray, Maupay.

Varamenn: Begovic, McNeil, Keane, Calvert-Lewin, Davies, Vinagre, Rondon, Garner, John.

United meira með boltann án þess að gera nokkuð með hann fyrstu 4 mínúturnar. Onana vann boltann á fimmtu mín, kom honum á Gray sem kom honum áfram á Iwobi sem skoraði með flottu skoti.

Dalot prjónaði sig inn í vítateig á 8. mín en Tarkowski blokkaði skotið.

14. mín, Gana tapar boltanum á miðjunni, Martial átti flotta sendingu á Antony sem skoraði.

Litlu munaði að United kæmist yfir 5 mín seinna þegar Gana reyndi sendingu á Onana en hann var ekki að horfa, Eriksen komst inn í sendinguna og átti skot sem Pickford varði, Coleman hreinsaði frákastið í horn sem ekkert varð úr. Minútu seinna prjónaði Martial sig í gegnum vörnina en Pickford varði.

Allt of mikið af slökum sendingum hjá báðum liðum, sérstaklega Everton.

Á 37. mín tapaði Mykolenko boltanum á vítateigslínunni og United skoraði, en sem betur var dæmd rangstaða.

42. mín, Rashford með góða fyrirgjöf á Casemiro sem fékk frían skalla en hitti sem betur fer ekki í markið.

44. mín, Ronaldo kemur United yfir eftir sendingu frá Casemiro sem vann boltann af Iwobi, því miður verðskuldað.

Fleira markvert gerðist ekki í fyrri hálfleik, kannski sem betur fer því Everton var bara með fyrstu 5 mínúturnar og máttu þakka fyrir að forysta United var ekki stærri í hléi.

Onana fékk gult spjald fyrir brot eftir 50 mín eftir að hann hafði misst boltann klaufalega frá sér. Stuttu síðar braut Casemiro svo á Onana og hefði vel getað fengið gult spjald fyrir, en ótrúlegt en satt, bara aukaspyrna.

Everton átti ágæta sókn á 62. mín og Coleman fékk hálffæri en náði ekki að stýra boltanum á markið. Gordon fékk svo gult spjald fyrir að vinna boltann af Bruno. Gordon er því kominn í bann gegn Tottenham í næsta leik.

Á 67. mín fór Gordon út af fyrir McNeil.

Everton fékk sína fyrstu hornspyrnu á 70. mín sem McNeil tók beint á kollin á Onana sem því miður skallaði yfir markið.

Á 74. mín braut Bruno illa á Tarkowski, en fékk merkilegt nokk ekki gult spjald.

Dominic Calvert Lewin og Garner komu svo inn á í sínum fyrsta leik á tímabilinu í stað Gana og Coleman.

Rashford skoraði á 80. mín, en hann hafði tekið boltann með hendinni svo það taldi ekki.
McTominay braut illilega á Gray á 85. mín og fékk gult spjald fyrir og mátti teljast heppin að sleppa með það því hann fór með takkana í sköflunginn á Gray.

Gray átti fyrirgjöf á 90. mín á Onana sem því miður hitti ekki á markið. Mínútu síðar átti Garner gott skot sem De Gea varði í horn, en úr því varð ekkert.

Everton fékk nokkrar hornspyrnur í uppbótartímanum en náði ekki að nýta þær. Niðurstaðan því 1-2 tap.

Allt of mikið um klaufagang í vörninni og á miðjunni í fyrri hálfleik sem lagði grunninn að þessu tapi. Seinni hálfleikur mun betri en það vantaði þennan fræga herslumun. Of margir leikmenn líka að spila undir getu, sérstaklega í fyrri hálfleik, þar sem Gray, Gordon, Onana og Maupay voru arfaslakir. Næstu leikir gegn Tottenham og Newcastle eru báðir á útivelli og ef Everton ætlar að fá eitthvað út úr þeim verða þeir að gera miklu miklu betur en í kvöld.

Einkunnir Sky Sports: Pickford (6), Coleman (6), Coady (6), Tarkowski (6), Mykolenko (6), Gueye (5), Iwobi (7), Onana (6), Gordon (5), Maupay (5), Gray (6). Varamenn: McNeil (6), Garner (7), Calvert-Lewin (6).