Man City – Everton 2-1

Mynd: Everton FC.

Það var risaleikur í dag kl. 17:30, en þá mætti Everton á heimavöll Englandsmeistara Manchester City. Þetta var þriðji leikur Everton undir stjórn Ancelotti og leikmenn mættu fullir sjálfstrausts eftir tvo sigurleiki í röð. Það reyndist hins vegar þrautin þyngri að stoppa leikmenn City á þeirra eigin heimavelli.

Uppstillingin: Pickford, Holgate, Mina, Coleman, Digne, Gylfi, Delph, Sidibé, Bernard Davies, Calvert-Lewin, Richarlison.

Varamenn: Stekelenburg, Baines, Michael Keane, Walcott, Tosun, Davies, Moise Kean.

De Bryune í byrjunarliði City en þeir Silva, Sterling og Aguero byrjuðu á bekknum. Bernard var listaður í uppstillinguni en var skipt út á síðustu stundu fyrir Davies.

Everton átti fyrsta færi leiksins þegar Gylfi sá hlaup Colemans inn í teig og sendi frábæran bolta á hann sem Coleman lagði fyrir sig og skaut að marki en Bravo í marki City varði vel í horn.

City menn sýndu hvers þeir eru megnugir þegar þeir opnuðu vörn Everton upp á gátt og Phil Foden, við fjærstöng, potaði inn sendingu sem hann fékk frá hægri kanti. En VAR kom Everton þar til bjargar þegar í ljós kom að Mahrez var rangstæður í aðdragandinn.

Þeir vildu víti stuttu síðar þegar Mahrez komst inn fyrir vörnina og Digne braut á honum, en dómarinn dæmdi (ranglega) rangstöðu. VAR lagaði það og skar líka úr um vítið – ekkert víti, enda hafði Mahrez handleikið boltann í aðdragandanum (með báðum höndum, meira að segja).

City fengu annars ekki mikið af færum í fyrri hálfleik, allavega ekki neitt sem Pickford átti í vandræðum með. En Everton leikmennirnir voru ansi mikið að elta skuggana í þessum hálfleik, eins og liðum er tamt þegar þau mæta City.

0-0 í hálfleik.

Stíflan hlaut að bresta að lokum og gerði það á 51. mínútu þegar Gabriel Jesus átti frábært skot innan teigs sem Pickford kom fingri á, en boltinn lak inn við samskeytin uppi. 1-0 fyrir City.

Everton fékk fínt færi strax eftir markið, skallafæri frá Calvert-Lewin eftir horn en boltinn í varnarmann City og rétt framhjá stöng.

Gabriel Jesus lét svo aftur til sín taka á 57. mínútu þegar hann fékk stungu eftir frábæran undirbúning samherja sinna og laumaði boltanum inn fyrir marklínu með föstu skoti alveg út við stöng niðri í hornið vinstra megin. 2-0 fyrir City.

Walcott kom þá inn á fyrir Coleman og Moise Kean fyrir Gylfa.

En Richarlison svaraði fyrir Everton með marki á 70. mínútu, eftir skot frá Walcott inni í teig hægra megin. Boltinn breytti um stefnu af varnarmanni og fór yfir á fjærstöng þar sem Richarlison var mættur og potaði inn (sjá mynd). Staðan orðin 2-1. Viðeigandi að Richarlison skyldi skora því það var hann sem hóf sóknina með því að komast inn í slaka sendingu Bravo til varnarmanns.

Gabriel Jesus var hársbreidd frá því að ná þrennu á 76. mínútu þegar hann kom boltanum framhjá Pickford en boltinn fór í stöngina og út. Þar skall aldeilis hurð nærri hælum.

Everton hélt svo baráttunni út leikinn en tókst ekki að jafna. 2-1 tap gegn fyrnasterku liði City því lokaniðurstaðan.

Einkunnir Sky Sports: Pickford (7), Coleman (7), Sidibe (6), Mina (5), Digne (6), Holgate (5), Delph (7), Davies (6), Gylfi (5), Richarlison (6), Calvert-Lewin (5). Varamenn: Walcott (6), Kean (5).

10 Athugasemdir

  1. Einar Gunnar skrifar:

    Ég verð sáttur með jafntefli úr þessari viðureign. En hef nokkrar áhyggjur af gulaspjaldi Mina, en vona það besta. Koma svo!!

  2. Halli skrifar:

    Ég hefði nú heldur vilja sjá Sidibe tekinn af frekar en Coleman

  3. Ingvar Bæringsson skrifar:

    Verra gat það verið. Skil ekki hvers vegna Tom Davies var settur inn í staðinn fyrir Bernard, hann er ekki nógu góður og það kom ekkert út úr honum.

    • Finnur skrifar:

      Bernard var listaður í uppstillingu en kippt út á síðustu stundu. Kannski var hann veikur eða meiddist í upphitun eða eitthvað.

      • Ingvar Bæringsson skrifar:

        Mina tæklaði hann víst eitthvað í upphitun og hann meiddist á hné.

        • Teddi skrifar:

          Já þetta með meiðsli Bernard kom fram í upphitun á BT Sports. Kæmi á óvart ef að Davies og Gylfi byrja báðir á sunnudag, ekkert að ganga upp hjá þeim, sérstaklega Gylfa.

  4. þorri skrifar:

    kæru félagar veit einhver kl hvað leikurinn á sunnudaginn hjá Everton Liverpool

    • Ari S skrifar:

      Sæll Þorri og gleðilegt ár. Ég kíkti á livescore og sá að hann er settur á kl 16:;01

      This weekend’s FA Cup third-round fixtures will all kick off with a one-minute delay as part of the Football Association’s Heads Up campaign to promote mental well-being amongst fans.

      Sem að gæti verið þýtt á þennan hátt…

      Leikir helgarinnar í þriðju umferð FA bikarsins munu allir byrja mínútu seinna. En það er partur af átaki hjá Enska knattspyrnusambandinu til að stuðla að andlegri vellíðan meðal aðdáenda.

      • Ari S skrifar:

        …. eða allra og þá leikmanna að sjálfsögðu líka… ég er ekki alveg klár á þessari þýðingu… j;)

  5. þorri skrifar:

    sælir og gleðilegt ár.þá fer að stitast í aðal leikinn.ég er svolítið spentur fyrir honum.eigum við ekki að segja að við vinnum í dag fyrsti tableikurinn hjá Liverpool.vitið þið hvort leikurinn sé opinn hjá stöð2 sport.