Everton – Southampton 3-0

Mynd: Everton FC.

Þetta var erfið fæðing en flóðgáttirnar brustu þegar Enner Valencia kom inn á og Everton náði að setja þrjú mörk. Spilamennskan hefði mátt vera betri framan af en við tökum þrjú stig. Flott byrjun á árinu.

Uppstillingin: Robles, Baines (fyrirliði), Funes Mori, Williams, Coleman, Gana, Davies, Lennon, Barkley, Calvert-Lewin, Lukaku. Varamenn: Hewelt, Jagielka, Mirallas, Cleverley, Barry, Valencia, Holgate. Calvert-Lewin með sinn fyrsta byrjunarleik fyrir félagið og Davies með sinn annan.

Fyrri hálfleikur hálf-flatur, liðin í erfiðleikum með að ná upp góðu spili og tafir vegna meiðsla hjálpuðu ekki til. Bæði lið misstu nefnilega mann út af á fyrstu tíu mínútunum. Southampton misstu Cedric Soares sem renndi sér inn í auglýsingaspjald og fékk skurð á hnakka. Everton missti stuttu síðar ungliðann Calwert-Lewin af velli vegna ökklameiðsla og kom Mirallas inn á fyrir hann. Í millitíðinni átti Barkley fyrsta skot Everton á mark á 4. mínútu.

Barkley setti svo Lukaku inn fyrir með stungusendingu á 17. mínútu en miðvörður Southampton náði að þvinga hann til hliðar og loka á hann. Skotið frá honum varið í horn af markverði.

Southampton með skot á 18. mínútu en beint á Robles. Auðvelt.

Sóknarþungi Everton jókst þegar á leið og allar sóknir Everton að fara í gegnum Barkley á þessum kafla. Everton mun meira með bolta en Southampton. Náðu upp góðum kafla í kringum 25. mínútu og það eina sem rauf taktinn var skyndisókn Southampton þar sem þeir skoruðu með rangstæðum leikmanni sem setti boltann í netið með hendi. Réttilega dæmt af.

Southampton áttu sinn kafla í kringjum 37. mínútu og þeirra besta færi kom frá Rodriguez sem með einstaklingsframtaki náði að komast inn fyrir vörn Everton en skaut rétt yfir.

Lukaku fékk svo stungu frá Lennon rétt undir lok fyrri hálfleiks og komst einn inn fyrir en dómari mat hann rangstæðan. Var ekki endursýnt, ekki gott að segja.

0-0 í hálfleik. Everton með tvö skot sem hitti á rammann (í 8 tilraunum), Southampton með 1 (í 6 tilraunum).

Hálf slök byrjun á seinni hálfleik og lítið að frétta framan af, þangað til Lennon var skipt út af fyrir Enner Valencia á 61. mínútu. Þá var eins og lifnaði yfir sóknarleik Everton.

Leikurinn opnast upp svolítið í kjölfarið og það voru Southampton menn sem voru nærri því að skora. Einn þeirra komst inn fyrir vörn Everton en Robles mætti honum og gerði sig breiðan og varði boltann.

Mark Everton kom svo loksins á 72. mínútu. Coleman sendi háan bolta fyrir mark, Lukaku skallaði niður og Forster, í marki Southampton, varði með fæti. Boltinn út í teig en hrökk af Lukaku og beint á Enner Valencia sem var upp við markið og þrumaði inn. 1-0 Everton.

Southampton gáfu þetta svo frá sér með vítaspyrnu á 80. mínútu. Varnarmaður Southampton með glórulausa tæklingu að aftan frá á Enner Valencia og Baines öruggur á punktinum, sendi markvörð í vitlaust horn. 2-0 Everton. Valencia búinn að skora eitt mark og skapa annað.

Southampton menn áttu skot á 82. mínútu en aftur var Robles vel á verði. Barkley var svo skipt út af á 84. mínútu fyrir Barry. Koeman greinilega að loka sjoppunni.

Southampton reyndu hvað þeir gátu en þetta var ekki þeirra dagur, komust í færi stuttu síðar en Williams með frábæra hreinsun á línu í horn.

Lukaku setti svo punktinn yfir I-ið með flottu marki á 88. mínútu. Southampton menn voru að komast í skyndisókn þegar Baines tók sprettinn og skriðtæklaði boltann yfir til Davies sem var fljótur að hugsa og sendi beint fram á Lukaku sem hamraði boltann í netið. 3-0. Game over.

Einkunnir Sky Sports: Joel (7), Baines (7), Funes Mori (6), Williams (7), Coleman (7), Gana (6), Davies (6), Lennon (5), Barkley (7), Calvert-Lewin (3), Lukaku (6). Varamenn: Mirallas (6), Valencia (8), Barry (2). Alltaf hálf kjánalegt að sjá gefnar einkunnir fyrir leikmenn sem eru innan við 10 mínútur á velli, en kannski er það bara ég. Enner Valencia valinn maður leiksins.