Lille – Everton 0-0

Mynd: Everton FC.

Everton sótti stig í dag á erfiðum útivelli í Frakklandi gegn Lille, liðinu sem á pappír var talið sterkasta liðið í riðlinum. Einhverjir fréttamiðlar höfðu stillt þessum leik upp sem baráttu belgísku framherjanna tveggja, Lukaku og Origi, en það var lítið um flugeldasýningu þar, enda Lukaku á bekknum mestan hluta leiks. Leikurinn var enda lítið fyrir augað, leikur tveggja sterkra varna og lítið um færi.

Uppstillingin: Howard, Baines, Distin, Jagielka, Hibbert, Besic, Barry, McGeady, Pienaar, Barkley, Eto’o. Varamenn: Joel, Gibson, Lukaku, McCarthy, Atsu, Coleman, Alcaraz. Markahæsti maður Everton, Naismith, var hvíldur — fór ekki einu sinni með til Frakklands og Eto’o fékk því tækifæri í byrjunarliðinu.

Eto’o átti flott samspil á 17. mínútu þegar hann og Pienaar tóku flottan þríhyrning inni í teig Lille og ef móttakan hjá Eto’o hefði verið betri hefði hann verið kominn í dauðafæri gegn markverði. Það hafðist þó ekki og færið fór forgörðum.

Lille áttu svo skot af löngu færi á 25. mínútu en rétt framhjá stönginni. Endursýning sýndi reyndar að Howard hefði varið. Og þar með er eiginlega fyrr hálfleikur upp talinn, ótrúlegt en satt. Ekkert að gerast og staðan 0-0.

Eto’o átti skot á mark úr aukaspyrnu á 54. mínútu en skotið varið. Lukaku kom svo inn á fyrir Pienaar á 63. og skóp strax dauðafæri fyrir McGeady en markvörður varði skotið og varnarmaður hreinsaði áður en boltinn gat lekið yfir línuna. Líklega besta færi leiksins.

Atsu inn á fyrir McGeady á 81. mínútu og Barkley út af fyrir einhvern sem ég sá ekki hver var, enda fékk hann um þrjár sekúndur af spilatíma.

0-0 því staðreynd. Ekki skemmtilegasti leikurinn til að horfa á en ef einhver hefði boðið mér jafntefli úr þessari viðureign fyrir leik þá hefði ég tekið því. Everton í efsta sæti riðilsins og ósigraðir í Evrópu og tveimur erfiðum útileikjum lokið. Gæti alveg verið verra.