Chelsea – Everton 1-0

Mynd: Everton FC.

Þessi skýrsla kemur vel seint þar sem ég var fastur í hlíðum Hlíðarfjalls þegar leikurinn byrjaði — örugglega þar sem allt var fullt af Sunnlendingum að reyna að spóla sig upp brekkuna og valda stíflum (full disclosure: ég er sjálfur Sunnlendingur en var á betur útbúnum bíl þessa helgina). Ég hringdi því í snatri í varamann til að sjá um skýrsluna en sá var greinilega of depressívur eftir leik til að skila af sér skýrslu þannig að ég ætla að rita nokkur orð — þó ég hafi ekki séð allan leikinn. 🙂

Uppstillingin var svipuð og búist var við: Howard, Baines, Distin, Jagielka, Coleman, Barry, McCarthy, Pienaar, Osman, Mirallas, Traore. Lukaku orðinn heill, sem er mikið gleðiefni, en ekki gjaldgengur í þennan leik þar sem hann er að láni frá Chelsea.

Það er alls ekki mjög langt síðan maður var alltaf með hnút í maganum yfir að mæta undir stjórn Moyes á heimavöll Arsenal, Chelsea, City og United enda var Moyes mjög duglegur að stilla væntingum í hóf og tala um að þetta væri eins og að vera mættur með hníf í byssubardaga — eins og við þekkjum vel. Það er þó annað uppi á teningunum undir stjórn Martinez sem lítur á alla leiki sem mögulega sigurleiki ef pressað er rétt á veikleika andstæðingana. Og við getum verið stolt af okkar mönnum í þessum leik því það var ekki að sjá (frekar en í leiknum gegn Tottenham) að Everton væru á útivelli í leiknum. Þvert á móti voru þeir sprækari aðilinn í leiknum og Chelsea menn virkuðu þunglamalegir og svifaseinir lungað úr leiknum, sá allra lélegasti þeirra þó Oscar sem var kippt út af í hálfleik. Þó grunar mig að stjóri Chelsea hefði líklega viljað kippa fleirum út af ef fleiri en þrjár skiptingar hefðu verið í boði. Everton menn áttu mun betri færi í fyrri hálfleik, til dæmis var Osman nálægt því að skora en Cech hélt Chelsea inni í leiknum með frábærri markvörslu.

Maður var hálf fúll með stöðuna 0-0 í hálfleik miðað við frammistöðuna og færin sem og í fyrri hluta seinni hálfleiks þegar Osman átti t.d. skot sem fór í Mirallas, breytti um stefnu og endaði næstum í netinu ef ekki hefði verið fyrir aðra frábæra markvörslu Cech.

Þegar fór að síga á seinni hlutann dró aðeins úr okkar mönnum og Chelsea komust betur inn í leikinn og fengu betri færi. Nokkrum sinnum fór um mann en Howard og Distin áttu stórgóðan leik og náðu að koma í veg fyrri að nokkuð kæmi úr sóknarfærum Chelsea. Martinez reyndi þrjár skiptingar (Barkley, Deulofeo og McGeady) en enginn þeirra í nægilega góðri leikæfingu og skemmst frá því að segja að ekkert kom út úr þeim skiptingum. Nákvæmlega ekkert. Barkley og Deulofeu þó sýnu verri en McGeady. Þeim öllum til varnar, verður þó að segja að það er mikilvægt að þeir fái mínútur svo þeir verði komnir í form á lokasprettinum.

Ég sagði við félaga mína þegar leið að lokum leiks að þetta væri leikur markvarðanna þar sem hvorugu liðanna tókst að finna leiðina í netið og leit út fyrir 0-0 jafntefli sem maður hefði verið nett ósáttur með (þó ekki hefði verið hægt að kvarta yfir því að taka fjögur stig af Chelsea á tímabilinu). En rétt undir lok leiks (í uppbótartíma) fengu Chelsea menn mjög svo óverðskuldaða aukaspyrnu (eina af alltof mörgum í leiknum), því endursýning sýndi að ekki var um aukaspyrnu að ræða. Lampard sendi fyrir þar sem Terry náði að setja fótinn í fyrirgjöfina og Howard gat lítið annað gert en að slá til boltans sem endaði í netinu. 1-0 sigur Chelsea í höfn rétt fyrir leikslok.

Chelsea höfðu ekki tapað á heimavelli undir stjórn Murinho í 73 leikjum en voru nokkuð heppnir með að fá þrjú stig úr þessum leik. Svona er þetta stundum.

Leikjaprógrammið í næstu leikjum er West Ham, Newcastle, Cardiff, Swansea og Fulham og það hlýtur að vera hægt að ná nokkuð af stigum úr þeim leikjum. Ef ekki, þá höfum við allavega FA bikarinn enn um sinn allavega. 🙂

Einkunnir Sky Sports: Howard 7, Baines 7, Distin 7, Jagielka 7, Coleman 7, McCarthy 7, Barry 7, Pienaar 6, Mirallas 6, Osman 7, Naismith 6. Varamenn: McGeady 6, Deulofeu 6, Barkley 6. Chelsea markvörðurinn og vörnin fengu 7 (að Azpilicueta undanskildum, með 6) en restin af liði þeirra var með 6 (fyrir utan Hazard sem fékk 7).