Everton vs. Southampton

Mynd: Everton FC.

Það er ekkert sem fær mann til að gleyma skelli á borð við þann sem við fengum gegn Sunderland eins og annar leikur örfáum dögum síðar, í þetta sinn á heimavelli gegn Southampton. Þeir sitja nú í 9. sæti deildar með 27 stig úr 18 leikjum en komust á ágætis skrið fyrr á tímabilinu þó þeir hafi nokkuð dalað síðan. Sigur þeirra gegn Cardiff í síðasta leik var fyrsti sigur þeirra í sjö umferðum.

Maður þorir varla að minnast á hvað langt er síðan Southampton hafa unnið á Goodison Park (hint: þar var í nóvember 1997), en 7-1 sigur Everton á þeim árið áður er stærsti sigurleikur Everton frá upphafi í Úrvalsdeildinni. Ef þetta hljómar kunnulega þá er þetta nánast það sama og ég skrifaði í upphituninni fyrir Sunderland leikinn en við vitum alveg hvernig það fór (Sunderland er hitt liðið sem Everton hefur unnið 7-1 í Úrvalsdeildinni). Við skulum vona að eldingu slái ekki niður tvisvar á sama staðinn en ljóst er þó að leikurinn ætti að vera meira fyrir augað (en leikurinn gegn Sunderland) þar sem Southampton líta betur út á velli en Sunderland (með fullri virðingu fyrir þeim síðarnefndu).

Komið hefur í ljós að Mirallas fór út af undir lok fyrri hálfleiks gegn Sunderland til að ræða við lækninn en í ljós kom að hann var með einhverja magapest og var því skipt út af. Það stendur þó ekki í veg fyrir að hann verði til reiðu á morgun. Óvíst er hvort Baines nái Southampton leiknum en Howard og Barry verða í eins leiks banni og missa því af honum. Barkley er jafnframt einu spjaldi frá því að fara í bann (sem myndi vera á móti Stoke), en ef hann sleppur við gult falla spjöld hans niður þar sem árið er á enda. Hjá Southampton eru Nathaniel Clyne, Artur Boruc og Victor Wanyama meiddir en Morgan Schneiderlin í banni.

Ég vonast til að sjá Osman á miðjunni í staðinn fyrir Barry, svo hann fái tækifæri til að bæta fyrir mistökin og sýni stórleik. Líkleg uppstilling: Robles, Oviedo, Distin, Jagielka, Coleman, Pienaar og Mirallas á köntunum, Osman og McCarthy á miðjunni, Barkley fyrir aftan… tja… Jelavic? Hann þarf að sanna sig fyrir nýju liði ef hann vill fara í janúar en Martinez staðfesti nefnilega í viðtali að tvö félög hafi haft samband og lýst yfir áhuga á Jelavic. Mér sýnist því á öllu að hann verði ekki leikmaður Everton þegar febrúarmánuður byrjar og það kæmi mér ekkert á óvart þó Heitinga fari líka, eins og áður hefur komið fram á þessum vef.

Í öðrum fréttum er það helst að Duffy framlengdi lánssamninginn hjá Yeovil fram til loka tímabils.

En Southampton á morgun kl. 13:30. Sjáumst á Ölveri!