Everton – West Brom 0-0

Mynd: Everton FC.

Fyrsti keppnisleikur Roberto Martinez á Goodison. Óbreytt lið: Howard, Baines, Distin, Jagielka, Coleman, Pienaar, Osman, Fellaini, Mirallas, Barkley, Jelavic. Varamenn: Joel, Heitinga, Kone, Deulofeu, Naismith, Stones, Anichebe.

Leikurinn fór rólega af stað, og lítið að gerast við mark beggja liða fyrstu mínúturnar. Bæði lið að þreifa fyrir sér en Everton tók af skarið. Pienaar átti tvö færi í kringum 10. mínútu, skotfæri sem og mjög flott skallafæri sem var varið með tilþrifum af Ben Foster sem átti stórleik í marki West Brom. Ekkert að gerast hinum megin vallarins enda Anelka úr leik í bili hjá þeim og Distin með Shane Long algjörlega í vasanum allan leikinn. West Brom náðu ekki skoti *að* marki fyrr en á 23. mínútu og það var vel framhjá rammanum.

Everton greinilega ákveðnara og Mirallas átti fast skot utan teigs sem var vel varið í horn — eina af ellefu hornspyrnum sem Everton fékk (WB fengu eina) og alltaf var Olsson, miðvörður West Brom, mættur til að hanga í Fellaini — var með hann í górillugripi sem dómarinn, Roger East, lét algjörlega afskiptalaust (eins og þulurinn benti á) — nema þegar Fellaini gafst upp og reyndi að brjótast úr gripinu. West Brom menn mjög heppnir að fá ekki á sig víti. Gersamlega óþolandi.

Coleman átti flott skot innan teigs á 38. mínútu en Foster með enn eina glæsilegu markvörsluna. Þá fjórðu í leiknum. Og það var það helsta sem gerðist í fyrri hálf-leik. Everton fengu reyndar þrjú horn með mjög stuttu millibili í lokin (hangið og hangið í Fellaini) og náðu upp ágætri pressu en ekki hafðist það. Um tíma voru West Brom menn farnir að tefja undir lok fyrri hálfleiks, greinilega mjög kátir með jafntefli enda sýndu þeir litla tilburði til að reyna að vinna leikinn og parkeruðu rútunni fyrir framan markið á löngum köflum. Eða eins og Steve Clark orðaði það eftir leikinn: „today was about digging in and getting a good result“.

0-0 í hálfleik. Everton með boltann 61% og hafði nokkra yfirburði á vellinum. West Brom aðeins náð fjórum tilraunum á þeim tíma en ekkert þeirra hitti markið. Everton með 10 tilraunir, þar af fjögur færi sem markvörður varði vel.

Seinni hálfleikurinn byrjaði eins og sá fyrri — rólega. Eina hættan frá West Brom var úr föstum leikatriðum, til dæmis á 50. mínútu þegar aukaspyrna skapaði smá glundroða í vörn Everton en Jelavic hreinsaði frá. Þulurinn hafði á orði að „Sóknir WB [væru] ekki upp á margar loðnur“.

Baines svaraði strax í næstu sókn með eitraðri fyrirgjöf fyrir markið af vinstri kanti en vantaði menn í teiginn til að klára dæmið. Coleman með eitraða fyrirgjöf hinum megin á 54. mínútu en Ben Foster ver. Hornin komu svo í röðum hjá Everton þangað til Osman tók þrumuskot að marki, boltinn fór í hausinn á varnarmanni og breytti vel um stefnu (sirka 50 gráður eða svo) og aftur fyrir endalínu. Og dómarinn dæmdi að sjálfsögðu… markspyrnu (waaaat?!!!).

Þetta var þó bara grín miðað við næstu mistök dómarans, þar sem hann kórónaði arfaslaka frammistöðu sína í leiknum. Everton í skyndisókn, Pienaar með boltann (að mig minnir) og Jelavic tekur sprettinn fram, býst við stungusendingu inn fyrir vörnina og er að fara að skilja Olsson eftir í rykinu. Olsson sér hvað verða vill og hvað gerir hann? Jú, hann stígur skrefið fyrir hlaupið frá Jelavic (sem er að horfa aftur fyrir sig til að sjá hvar Pienaar sendir boltann) dúndrar öxlinni í Jelavic. Stórhættulegur leikur. Gæti þetta verið spjald — jafnvel rautt? Uh, nei. Minnir að dómarinn hafi ekki einu sinni dæmt brot á þetta (andvarp).

Mirallas átti skot innan teigs á 61. mínútu en varið og svo gerðust undur og stórmerki þegar West Brom náði loks skot á markið í fyrsta skipti og Howard þurfti í fyrsta skipti í raun og veru að vinna fyrir kaupi sínu (verja í horn). Merkilegt að Howard næði ennþá að halda fullri athygli svo lítið var að gera hjá honum.

Naismith og Kone skipt inn á fyrir Mirallas og Jella á 72. mínútu. West Brom með annað færi á 73. mínútu sem eiginlega varð til úr engu, en Howard varði glæsilega frá Long. West Brom að komast aðeins betur inn í leikinn.

Á 75. mínútu fer markvörður West Brom, Ben Foster, út af meiddur og þá hugsaði maður sér gott til glóðarinnar enda Foster búinn að vera þeirra langbesti leikmaður og koma þeim oft til bjargar. Sóknarmaður þeirra, Shane Long, einnig út af á 80. mínútu (enda búinn að eiga frústrerandi leik), og Brunt inn á. Sá gerði þó lítið sem ekkert í lokin að ég sá.

Á 81. mínútu kom langbesta færi leiksins. Jagielka sendi einfaldan bolta inn í teig, beint á Fellaini sem tók hann á kassann og lagði hann þannig glæsilega fyrir sér og komst inn fyrir vörnina — og skaut strax. Boltinn auðveldlega framhjá (vara)markverði West Brom en í innanverða stöngina og út í teig aftur og eftir smá glundroða náðu þeir að hreinsa. Þarna varð það manni endanlega ljóst að þetta myndi ekki detta með okkar mönnum þrátt fyrir yfirburðina.

Dómarinn gaf Barkley gult fyrir tæklingu en endursýning sýndi vel að hann fór í boltann. Dómarinn samur við sig. Andvarp. Coleman átti ágætis skot rétt fyrir lok leiks (87. mín) en varamarkvörður þeirra varði í horn — það tíunda í leiknum. Fellaini greinilega á þeim tímapunkti búinn að gefast upp á að fá eitthvað frá dómaranum og farinn að bíða utan teigs í hornum og hlaupa inn þegar boltinn berst (til að forðast górillugripin).

Á lokamínútum leiksins átti Coleman sendingu fyrir markið sem tók sveig og yfir markvörðinn, í neðanverða slána og út aftur. West Brom að sleppa með skrekkinn, enn eina ferðina — tveir boltar í tréverkinu og margar frábærar markvörslur frá Ben Foster.

Barkley átti skot á 92. mínútu sem virtist fara í hendi varnarmanns inni í teig (og Barkley sýndist mér vilja víti) en endursýning sýndi að líklega fór hann í brjóstkassann. Everton fékk svo 11. hornspyrnuna undir lok leiks en varið í horn og dómarinn flautaði þar með leikinn af.

0-0 lokastaðan og West Brom að halda hreinu í fyrsta sinn á Goodison í 30 ár.

Það er sjaldnast gaman að horfa á leiki þar sem lið parkera rútunni fyrir framan mark sitt og bjóða upp á lítið frammi við — sérstaklega þegar ekki tekst að brjóta þau lið niður og setja allavega eitt mark. Það var raunin í dag — hálf leiðinlegur leikur — og mjög frústrerandi að horfa upp á færin fara forgörðum. Tvö stig töpuð, aftur — en við fengum þó nóg að færum til að gera út um leikinn en ekki hafðist það. Everton með boltann 62% leiks og með átta tilraunir á markið (samtals 21 skot). West Brom með tvær (!) á markið í sjö tilraunum.

Einkunnir Sky Sports: Howard 7, Baines 7, Distin 5, Jagielka 6, Coleman 8, Pienaar 7, Osman 6, Fellaini 6, Mirallas 6, Barkley 7, Jelavic 6. Varamenn: Kone og Naimsith báðir með 5 (enda ekki lengi inn á). Markvörðurinn Foster besti maður West Brom, með 8 í einkunn, aðrir með lægra.

Ég gapi yfir einkunn Distin hér að ofan en báðir miðverðir okkar (Jagielka og Distin) stóðu sig mjög vel í leiknum, og héldu Shane Long alveg niðri. Baines fínn og Coleman mjög góður. Mér fannst hins vegar Osman slakur í leiknum og Mirallas sömuleiðis en Fellaini og Pienaar stóðu sig ágætlega. Barkley fínn en Jelavic ekki alveg nógu öflugur frammmi. Everton vantar bit frammávið — ekkert nýtt þar. Kone bætti ekki miklu við þó þegar hann kom inn á og eftir á að hyggja hefði ég viljað sjá Anichebe inn fyrir Jelavic — minnugur sigurmarksins sem hann skoraði á móti þeim á útivelli um árið.